1 ପାଉଲ ନି ସିଲା ଆମ୍ଫିପଲି ମାରି ଆପଲନିଆ ଗାଡ଼୍‌ ସିଜି ସଲ୍‍ସି ତେସଲନିକିୟାଦି ଇତାର୍‌ । ଆବେ ଉନ୍‍ଣ୍ତ୍ରି ଜିହୁଦିରି ପାର୍‌ତନା ଇଲୁ ମାର୍ହାତ୍‌ । 2 ପାଉଲ ୱାନି ରିତି ଇସାବ୍‌ତାନ୍‌ ପାର୍‌ତନା ଇଲ୍‌ତୁ ସର୍ହାନ୍‍ । ଆବେ ପାକାପାକି ମୁନ୍‍ଣ୍ତ୍ରି ରମ୍‌ନି ଦିନ୍‌ ସାନ୍ଧି ଦାର୍ମୁସାସ୍ତ୍ରଦି ବାକ୍ୟ ଅସି ୱାନ୍‌ ଲୋକାଙ୍ଗ୍‌ ୱେର୍‌ତାନ୍‌, 3 ଦାର୍ମୁସାସ୍ତ୍ର ୱେର୍‌ସି ମାରି ବୁଜାକିଜି ସତ୍‌ ତର୍‍ତାନ୍‍ ଜେ, ମସିହଦି ଦୁକୁ ବଗାନିକା ମାରି ସାତି ମାଣାନ୍‌ ନିଙ୍ଗିଁକା ଦର୍‌କାର୍‌ ମାର୍ହାତ୍‌ । ପାଉଲ ଇର୍ହାନ୍‌, "ଏମେ ଜିସୁଦି ବିସୟ୍‌ ନାନ୍ ୱେର୍‌ସିନା, ୱାନ୍‌ ଆୟା ମସିହ ।" 4 ୱାରି ଲୋଇ ଏସ ଲୋକୁ ଇକା ବିସ୍‌ବାସ୍‌ କିଜି ପାଉଲ ନି ସିଲା ୱାଲେ ମିସାତାର୍‍; ଆୟାୱାଜା ନାଣ୍ତ ପେରି ଆଇମେକ୍‍ ମାରି ମାପୁରୁଦି ପାର୍‍ତନାକିନି ଗ୍ରିକ୍‌ ଲୋକା ଉନ୍‍ଣ୍ତ୍ରି ପେରି ଦଲ୍‌ ବା ୱାରି ୱାଲେ ମିସାତାର୍‍ ।

5 ମାତର୍‌ ଜିହୁଦି ଲୋକୁ ରିସା ଆତାର୍‌ ମାରି ଏସ ତାଗ୍‌ଇ ଗୁଣ୍‍ତି ଲୋକାଙ୍ଗ୍‌ ଉଣ୍ତା କିଜି ୱିଜୁ ଗାଡ଼୍‍କାଙ୍ଗ୍‍ଁ ମାଡ୍‌ଗୋଲ୍‌ କିବିସ୍‍ କିତାର୍‍ । ୱାର୍‌ ପାଉଲ ନି ସିଲେଙ୍ଗ୍‍ଁ ପୟ୍‌ଜି ଲୋକା ଲାକ୍‌ତୁ ତାନି ଉଣ୍ତିଙ୍ଗ୍‍ଁ ଜେସନ୍‍ ଦର୍‌ତି ଅରେନ୍‌ ଲୋକ୍‌ତି ଇଲୁଦିଙ୍ଗ୍‌ ୱିର୍‍ସିତାର୍‍ । 6 ମାତର୍‌ ଆବେ ପାଉଲ ନି ସିଲେଙ୍ଗ୍‍ଁ ପୟ୍‍ଏଜି, ୱାର୍‌ ଜେସନ୍‍ ନି ଆଇ ଏସ ବିସ୍‍ବାସ୍‌ତି ତଡ଼ାନ୍‌କାଙ୍ଗ୍‌ ଗାଡ଼୍‌ତି ଅଦିକାରିରି ଲାକ୍‌ତୁ ରେଲ୍‌ଜି ତାସି ଆଉଲି ଆଜି ଇର୍ହାର୍‌, "ଇୟା ଲୋକୁ ସାରିବେଡ଼୍‍ତି ଜାଟି ଜଗଡ଼ା କିଜିନାର୍‍ ! ଇଲେଇ ୱାର୍‌ ମା ଗାଡ଼୍‌ତୁ ୱାତାମାନାର୍‌ 7 ମାରି ଜେସନ୍‍ ୱାରିଙ୍ଗ୍‍ଁ ୱାନି ଇଲ୍‌ତୁ ଇଟ୍‌ତାମାନାନ୍‌ । ଜିସୁ ଦର୍‌ତି ମାରି ଅରେନ୍‌ ରାଜା ମାନାନ୍‌ ଇଜି ୱେର୍‌ସି ୱାର୍‌ ସମ୍ରାଟଦି ୱିଜୁ ନିୟମ୍‌ ଅମାନ୍ୟ କିଜିନାର୍‍ ।" 8 ଇୟା ମାଟା ଇଜି ୱାର୍‌ ଲୋକାଙ୍ଗ୍‌ ନି ଅଦିକାରିରି ଲୋଇ ନାଣ୍ତ ରିସା ନି ଜାଟି ଜଗଡ଼ା କିଜିନାର୍‍ । 9 ଅଦିକାରିର୍‍ ଜେସନ୍‍ ନି ବିସ୍‍ବାସିରି ମାଣାନ୍‌ ଡାବୁଙ୍ଗୁଁ ଅସି ୱାରିଙ୍ଗ୍‍ଁ ମୁକୁଡ଼ା କିଜି ଡ଼ିସ୍‍ତା ସିତାର୍‍ ।

10 ନାଡ଼ା ଆତିୱେନ୍‍କା ବିସ୍‍ବାସ୍‌ତି ତଡ଼ାନ୍‌କୁ ପାଉଲ ନି ସିଲେଙ୍ଗ୍‍ଁ ବେରିଆଦୁ ପକ୍‌ତାର୍‌ । ୱାର୍‌ ଆବେଟାନ୍‍ ଇଜି ଜିହୁଦିରି ପାର୍‌ତନା ଇଲୁଦୁ ସର୍ହାର୍‍ । 11 ତେସଲନିକିୟାଦି ଲୋକା ବାଦ୍‌ଲୁ ଆବେଣି ଲୋକୁ ନାଣ୍ତ ନେସ୍‌ତେଙ୍ଗ୍‌ ୱେଡ଼ିକା ମାର୍ହାର୍‍ । ୱାର୍‌ ନାଣ୍ତ ୱେଡ଼ିକାଦାନ୍‌ ସିସୁରି ବାକ୍ୟ ୱେର୍‌ଆର୍‌ ମାରି ପାଉଲଦି ମାଟାଦି ସତ୍‌ ମାଟା ନେସ୍‍ତେଙ୍ଗ୍‍ଁ ଇଜି ୱିଜୁଦିନ୍‌ ଦାର୍ମୁସାସ୍ତ୍ର ପଡ଼ାଜି ୱେନ୍‍ବାଜି ମାର୍ହାର୍‍ । 12 ୱାରି ଲୋଇ ନାଣ୍ତ ଲୋକୁ ବିସ୍‍ବାସ୍‍ କିତାର୍‍ । ନାଣ୍ତ ସନ୍‌ମାନ୍‍ତି ଗ୍ରୀକ୍‍ ଆଇମେକ୍‍ ମାରି ଗ୍ରିକ୍‌ ଲୋକୁ ବିସ୍‍ବାସିରି ୱାଲେ ମିସାତାର୍‍ । 13 ମାତର୍‌ ଏସ୍ତିୱାଲେ ତେସଲନିକିୟାଦି ଜିହୁଦି ଲୋକୁ ୱେର୍‌ଆର୍‌ ଜେ ବେରିଆଦୁ ବା ପାଉଲ ମାପୁରୁଦି ବାକ୍ୟ ପ୍ରଚାର୍‌ କିଜିନାନ୍‍, ୱାର୍‌ ଆବେ ୱାଜି ଜାଟି ଜଗଡ଼ା କିଦେଙ୍ଗ୍‍ଁ ଇଜି ଲୋକାଙ୍ଗ୍‌ ଏଗ୍ରିସ୍‍ତାର୍‍ । 14 ବେଗି ବେଗି ବିସ୍‍ବାସ୍‌ତି ତଡ଼ାନ୍‌କୁ ପାଉଲ୍‍ତିଙ୍ଗ୍‍ଁ ସାମ୍‌ଦୁର୍‌ ପାଡ଼ିସିଜି ପକ୍‌ତାର୍‌; ମାତର୍‌ ସିଲା ନି ତିମତି ରିଏର୍‌ ବେରିଆଦୁ ତେବାତାର୍‌ । 15 ପାଉଲ୍‍ତିଙ୍ଗ୍‍ଁ ଅସି ମାର୍ହି ଲୋକୁ ୱାନି ୱାଲେ ଆତେନ୍‍ସ୍‍ ସାନ୍ଦି ସର୍ହାର୍‍ । ଆବେଟ୍‌ତାନ୍‌ ୱାର୍‌ ବେରିଆଦାନ୍‌ ଡ଼େସି ୱାଜି ସିଲା ନି ତିମତିଦିଙ୍ଗ୍‌ ଇର୍ହାର୍‌, ୱାର୍‌ ବେଗି ପାଉଲିତି ୱାଲେ ମିସାପିର୍‌ ଇଜି ପାଉଲ ଆଦେସ୍‌ ସିତାମାନାନ୍‌ ।

16 ଆତେନ୍‍ସ୍‍ ସିଲା ନି ତିମତିଙ୍ଗ୍‍ଁ କାପ୍‍କିନି ସମୟ୍‍ତୁ ଗାଡ଼୍‌ ଦିୟାମ୍‍କାଙ୍ଗ୍‌ ପୁରାଆତିମାନିକା ସୁଡ଼ୁଜି ପାଉଲ ନାଣ୍ତ ଦୁଃକ୍‌ ଆତାନ୍‍ । 17 ଆଦେଙ୍ଗ୍‍ଁ ୱାନ୍‌ ପାର୍‌ତନା ଇଲୁଦୁ ଜିହୁଦି ଲୋକା ୱାଲେ ମାପୁରୁଦି ପାର୍‍ତନାକିନି ଅଣଜିହୁଦିରି ୱାଲେ ଇୟା ବିସୟ୍‌ତାନ୍‌ ସବୁଦିନ୍‍ ୱାର୍‍ଗିଦେଙ୍ଗ୍‍ଁ ଆସ୍‌ତାନ୍‌ । ଗାଡ଼୍‌ତି ଡେଣା ବାଡିଆଙ୍ଗ୍‍ଁ ସନିୱାନିକା ଆଜିମାନି ଲୋକା ୱାଲେ ଆୟା ବିସୟ୍‌ତାନ୍‌ ୱାର୍‍ଗିତାର୍‍ । 18 ଏସ "ଏପିକ୍ୟୁରିଆନ୍‍ ନି ସ୍ଟୋଇକ୍‍" ସିକିୟା ଗୁରୁରି ୱାଲେ ୱାନି ଆସ୍‌ସିସାତାର୍‌ । ୱାରି ଲୋଇ ଏସଲୋକ୍‌ ଇର୍ହାର୍‌, "ଇୟା ବୁଦିସିଲିକାନ୍‌ ଇନିକା ଇନ୍‍ଡ୍ରେଙ୍ଗ୍‍ଁ ସଲ୍‌ସିନାନ୍‌ ?"

ଆଇକାର୍‌ ଇର୍ହାର୍‌, "ଆଇଦେସ୍‍ତି ଦିୟାମ୍‍କା ବିସୟ୍‌ତାନ୍‌ ୱାନ୍‌ ସୁସମାଚାର୍‌ ପ୍ରଚାର୍‌ କିନିକା ୱାଜା ଆଜିନାତ୍‌ ।" ଜିସୁ ନି ୱାନି ମାରିଡ଼େସି ନିଙ୍ଗିଁନି ବିସୟ୍‌ତାନ୍‌ ପାଉଲ ପ୍ରଚାର୍‌ କିନିକା ୱେନ୍‌ଜି ୱାର୍‌ ଇକା ଇର୍ହାର୍‌ । 19 ଆୟାଉଣ୍ତିଙ୍ଗ୍‌ ୱାର୍‌ ପାଉଲ୍‍ତିଙ୍ଗ୍‍ଁ ଆସ୍‌ତା ଅତାର୍‍ ମାରି ୱାନିଙ୍ଗ୍‌ ଏରିୟ ପାଗସ୍‍ ଦର୍‌ତି ଗାଡ଼୍‌ ମିଟିଙ୍ଗ୍‍ଁତୁ ତାସି ଇର୍ହାର୍‌, "ନିନ୍‌ ଏମେ ପୁନି ସିକିୟା ବିସୟ୍‌ତାନ୍‌ ୱେର୍‌ସିନି, ଆୟା ବିସୟ୍‌ତାନ୍‌ ମାପ୍‌ ନେସ୍‍ତେଙ୍ଗ୍‍ଁ ବଦା କିଜିନାପ୍‍ । 20 ନିନ୍‌ ୱେର୍‌ସି ମାନି ଏସ ମାଟା ମାଙ୍ଗିଁ କାବା ୱାଜିନାତ୍‍ । ମାପ୍‌ ତାନି ଅର୍ତ ନେସ୍‍ତେଙ୍ଗ୍‌ ବଦାକିନାପ୍‍ ।" 21 ଆତେନ୍‍ସ୍‍ତି ଲୋକୁ ମାରି ଆବେ ବାସାକିନି ଆଇଦେସ୍‍ତିକାର୍‍ ପୁନି ବିସୟ୍‌ ୱେନ୍‍ଡ୍ରେଙ୍ଗ୍‍ଁ ନି ଇନ୍‍ଡ୍ରେଙ୍ଗ୍‍ଁ ନାଣ୍ତ ଜିବନ୍‌ ନଜି ମାର୍ହାର୍‌ । ଇବେ ୱାର୍‌ ନାଣ୍ତ ସମୟ ସିଜି ମାର୍ହାର୍‌ ।

22 ପାଉଲ ଏରିୟ ପାଗସ୍‍ ଗାଡ଼୍‌ ମିଟିଙ୍ଗ୍‍ଁ ଆଗ୍‌ଡ଼ି ନିଲ୍‌ସି ଇର୍ହାନ୍‌, "ଆତେନ୍‍ସ୍‍ତି ବାସାନିଲୋକୁ, ମିର୍‌ ୱିଜେରେ ଦାର୍ମୁ ଲୋକୁ ଜଣା ପଡ଼ାଜିନାତ୍‍ ।" 23 ନାନ୍ ମି ଗାଡ଼୍‌ ବୁଲାଜି ସୁଡ଼୍‍ତି ୱାଲେ ମି ପୁଜାକିନି ବାଡିଦୁ ସୁଡ଼ୁତା । ଉନ୍‍ଣ୍ତ୍ରି ପୁଜା ସିନି ବେଦି ମୁସ୍‌କୁ ଉନ୍‍ଣ୍ତ୍ରି ନେସେଇ ମାପୁରୁଦି ଉଦେସ୍‍ତାନ୍‍, ରାସାତି ମାନିକା ବା ସୁଡ଼ୁତା । ମିର୍‌ ନେସ୍‍ଏନ୍‍ଣ୍ତା ଆମା ତାନିଙ୍ଗ୍‍ଁ ପୁଜା କିଜିନିଦେର୍‌, ଇଲେଇ ୱାନି ମାଟା ମି ଲାକ୍‌ତୁ ପ୍ରଚାର୍‌ କିଦେଙ୍ଗ୍‍ଁ ସଲ୍‍ସିନା । 24 ✝୧୭:୨୪ ପ୍ରେରିତ ୭:୪୮.ମାପୁରୁ ଦୁନିଆ ନି ଆବେ ମାନି ୱିଜୁ ବିସୟ୍‌ ତିଆର୍‌ କିତାନ୍‌ । ୱାନ୍‌ ମୁସ୍‌କୁପୁର୍‌ ନି ଦୁନିଆଦି ପ୍ରବୁ । ଲୋକା କିକାଣ୍‍ ତିଆର୍‌ ଆତି ମନ୍ଦିର୍‍କାଙ୍ଗ୍‌ ୱାନ୍‌ ବାସାଏନ୍‍ । 25 ମାଡ୍‌ ୱାନି ଉଣ୍ତିଙ୍ଗ୍‍ଁ ପାଣି କିଜି ୱାନିଙ୍ଗ୍‍ଁ ସିଦେଙ୍ଗ୍‌ ଆଟ୍‍ନିନାନି ଇନି ବିସୟ୍‌ ୱାନ୍‌ ବଦା କିଏନ୍‌; ଇରିଙ୍ଗ୍‍ଁ ୱାନ୍‌ ୱିଜେରିଙ୍ଗ୍‍ଁ ଜିବନ୍‌, ପୁନ୍‍ଣ୍ତା ମାରି ୱିଜୁ ଦର୍‌କାର୍‌ ବିସୟ୍‌ ସିତାମାନାନ୍‌ । 26 ଅରେନ୍‌ ଲୋକ୍‌ତି ମାଣାନ୍‌ ୱାନ୍‌ ୱିଜୁ ଲୋକୁ ଜାତିଦିଙ୍ଗ୍‍ଁ ତିଆର୍‌ କିତାମାନାନ୍‍ ମାରି ୱାନି ଆଦେସ୍‍ତାନ୍‍ ୱାର୍‌ ଦୁନିଆଦି ନାଣ୍ତ ବାଡିଆଙ୍ଗ୍‍ଁ ବାସାନାର୍‍, ଏମେ ସମୟ୍‍ତୁ, ଏନ୍‌ ଏମେ ବାଡିଦୁ ବାସାନାନ୍‍, ଆଗ୍‌ଡ଼ିରାନ୍‌ ମାପୁରୁ ଆକା ତିଆର୍‌ କିତାମାନାନ୍‍ । 27 ୱାନି ଉଦେସ୍‌ ମାର୍ହାତ୍‌, ୱିଜେରେ ଏଣ୍ତେସ୍‌ ୱାନିଦି ପୟ୍‌ଜି ୱାନିଙ୍ଗ୍‍ଁ ପୟ୍‌ନାର୍‌ । ମାତର୍‌ ସତ୍‍ତାନ୍‍ ମାପୁରୁ ଆମାୱାନିମାଣାନ୍‍ ଆକ ସିଲେନ୍‌ । 28 ଇୟା ବିସୟ୍‌ତାନ୍‌ ଅରେନ୍‌ ଲୋକୁ ଇର୍ହାମାନାନ୍‌,

"ୱାନିମାନୁନେ ମା ଜିବନ୍‌ତି ଜିନିକା, ବୁଲାନିକା ନି ତେବାନିକା ।"

ମି ରାସ୍‌ନିୱାରି ଲୋଇ ଏସଲୋକ୍‌ ଇର୍ହାମାନାର୍‌,

"ମାପ୍‌ ବା ୱାନି କଡ଼ର୍‌ ।"

29 ମାପ୍‌ ମାପୁରୁଦି କଡ଼ର୍‌ ଆତିମାନିଙ୍ଗ୍‌ ଲୋକା ମାଣାନ୍‌ ତିଆର୍‌ଆତି ବାଙ୍ଗାଁରାମ୍‍, ୱେନ୍‍ଣ୍ତି ମାରି କାଲ୍‍ତାନ୍‍ ତିଆର୍‌ଆତି ବମାଦି ରୁପ୍‍ତାନ୍‍ ମାପୁରୁଦି ୱାଜା ଏତ୍‌କିଦେଙ୍ଗ୍‌ ଆଟ୍‌ଏଟ୍‍ । 30 ଲୋକୁ ମାପୁରୁଙ୍ଗ୍‍ଁ ନେସ୍‍ଇୱାଲେ ୱାନ୍‌ ଆୟା ଦସ୍‌ ଆସ୍‍ଏନ୍‌ ମାର୍ହାନ୍‌, ମାତର୍‌ ଇଲେଇ ଆୟାୱିଜୁ ୱିଜେରିଙ୍ଗ୍‍ଁ ୱାରି ପାପ୍‌ ସାରିଦାନ୍‍ ଡ଼େସିୱାଦେଙ୍ଗ୍‍ଁ ଇଜି ଆଦେସ୍‌ ସିଜିନାନ୍‌ । 31 ୱାନ୍‌ ଉନ୍‍ଣ୍ତ୍ରି ଦିନ୍‌ ତିର୍‌ କିତାମାନାନ୍‌ । ଆୟା ଦିନ୍‌ ୱାନ୍‌ ୱାନି ବାସେଆତି ଲୋକ୍‌ତି ମାଣାନ୍‌ ୱିଜୁ ଦୁନିଆଦି ନ୍ୟାୟ୍‌ ବିସାର୍‌ କିନାନ୍‌ । ଆୟା ଲୋକ୍‌ତିଙ୍ଗ୍‌ ସାତିମାଣାନ୍‌ ନିକ୍‍ତି ମାଣାନ୍‌ ୱାନ୍‌ ଇୟା ମାଟାଦି ସତ୍‍ ୱିଜେରରିଙ୍ଗ୍‍ଁ ୱେର୍‍ତା ମାନାନ୍‌ !

32 ପାଉଲତିମାଣାନ୍‌ ସାତି ମାଣାନ୍‌ ମାରିଡ଼େସି ନିଙ୍ଗିଁନି ବିସୟ୍‌ ୱେନ୍‌ଜି ୱାରି ଲୋଇ ଏସ ଲୋକୁ ୱାନିଙ୍ଗ୍‍ଁ ସେମାର୍‌କିତାର୍‍, ମାତର୍‌ ଆଇକାର୍‌ ଇର୍ହାର୍‌, "ନିବାଣ୍‍କୁ ଇୟା ବିସୟ୍‌ତାନ୍‌ ମାପ୍‌ ମାରି ଉନ୍‍ଣ୍ତ୍ରି ଦେବା ୱେନ୍‍ଡ୍ରେଙ୍ଗ୍‍ଁ ବଦା କିଜିନାପ୍‍ ।" 33 ଆୟା ନାଣ୍ତିରି ମିଟିଙ୍ଗ୍‍ଁ ଡ଼ିସ୍‌ସି ପାଉଲ ସର୍ହାନ୍‍ । 34 ଡାୟୋନିସିଅସ୍‍ ଦର୍‌ତି ମିଟିଙ୍ଗ୍‍ଁତି ଅରେନ୍‌ ଲୋକୁ, ଦାମାରି ଦର୍‌ତି ଅରେତ୍‌ ଆଇ ମାନି ମାରି ଏସ ଲୋକୁ ବିସ୍‌ବାସ୍‌ କିତେ ମାରି ୱାନି ୱାଲେ ମିସାତାର୍‌ ।