କରନ୍ତି ଗାଡ଼୍ତୁ ପାଉଲତି ସେବା ପାଣି
1 ଇୟା ୱେନ୍କା ପାଉଲ ଆତେନ୍ସ୍ ଡ଼ିସ୍ସି କରନ୍ତିଦୁ ୱାତାନ୍ । 2 ମାରି ୱାନ୍ ଆକିଲା ଦର୍ତି ଜିହୁଦି ଲୋକ୍ତିଙ୍ଗ୍ଁ ବେଟ୍ଆତାନ୍, ପନ୍ତଦୁ ୱାନ୍ ଜନମ୍ ଆତାମାର୍ହାନ୍; ସମ୍ରାଟ କ୍ଳାଡିୟସ୍ ୱିଜେରେ ଜିହୁଦି ଲୋକାଙ୍ଗ୍ ରୋମ୍ ଡ଼ିସ୍ତେଙ୍ଗ୍ଁ ଇଜି ଆଦେସ୍ ସିତାମାର୍ହାନ୍ଆକା, ୱାନ୍ ଏସ ଦିନ୍ ଆଗ୍ଡ଼ି ୱାନି ଆଡ଼୍ସି ପ୍ରିସ୍କିଲାଦି ୱାଲେ ଇଟାଲିଦାନ୍ ୱାତାମାର୍ହାର୍ । 3 ପାଉଲ ୱାରିଙ୍ଗ୍ଁ ବେଟ୍ଆଦେଙ୍ଗ୍ଁ ସଲ୍ସି ୱାରି ୱାଲେ ବାସାତାନ୍, ଇରିଙ୍ଗ୍ଁ ୱାନ୍ ବା ୱାରିୱାଜା ଗୁଡ଼େଏଙ୍ଗ୍ଁ ତିଆର୍ କିଜି ଜିଜି ମାର୍ହାର୍ । 4 ଜିହୁଦି ନି ଗ୍ରିକ୍ଲୋକା ମନ୍ତୁ ପ୍ରବୁଦି ଉଣ୍ତିଙ୍ଗ୍ଁ ବିସ୍ବାସ୍ କିବିସ୍ କିଦେଙ୍ଗ୍ଁ ଇଜି ୱିଜୁ ରମ୍ନି ଦିନ୍ତୁ ୱାନ୍ ପାର୍ତନା ଇଲୁଦୁ ୱାର୍ଗିଜି ମାର୍ହାନ୍ ।
5 ସିଲା ନି ତିମତି ମାସିଦନିଆଦାନ୍ ଡ଼େସି ୱାତି ୱେନ୍କା ପାଉଲ ଜିହୁଦି ଲୋକା ଲାକ୍ତୁ ଜିସୁଦି ସୁସମାଚାର୍ ପ୍ରଚାର୍ କିଦେଙ୍ଗ୍ଁ ପୁରା ସମୟ୍ ସିତାନ୍ ମାରି ଜିସୁଙ୍ଗୁଁ ମସିହ ଇଜି ସାକି ସିତାନ୍ । 6 ମାତର୍ ୱାର୍ ୱାନି ବିରୁଦ୍ତାନ୍ ନିନ୍ଦା କିଜି ଇର୍ହାର୍, ତାମେ ବାଦା ୱାଜା ୱାନ୍ ନିଜେଦି ଆଙ୍ଗିଁଦାନ୍ ଦୁଡ଼ି ସାଡ଼୍ସି ୱାରିଙ୍ଗ୍ଁ ଇର୍ହାନ୍, "ମି ନେତେର୍ ମି ତାଲା ମୁସ୍କୁ ୱାଙ୍ଗିଁତି, ଆରିଙ୍ଗ୍ ଆୟାଉଣ୍ତିଙ୍ଗ୍ ମିର୍ ନିଜେ ଦାଇ ଆନିଦେର୍ । ନାନ୍ ଇୟାଉଣ୍ତିଙ୍ଗ୍ଁ ଦାଇ ସିଲେ । ଆର୍ତିଙ୍ଗ୍ଁ ନାନ୍ ଅଣଜିହୁଦିରି ମାନୁ ସନା ।" 7 ଆବେଟ୍ ୱାନ୍ ୱାରିଙ୍ଗ୍ଁ ଡ଼ିସ୍ସି ମାପୁରୁଦି ପାର୍ତନା କିଜିମାନି ତିତସ୍ ଜୁସ୍ତ ଦର୍ତି ଅରେନ୍ ଅଣଜିହୁଦିଦି ଇଲ୍ତୁ ତେବାଦେଙ୍ଗ୍ଁ ସର୍ହାନ୍ । ଜୁସ୍ତଦି ଇଲୁ ଜିହୁଦି ପାର୍ତନା ଇଲୁ ଲାକ୍ତୁ ମାର୍ହାତ୍ । 8 ଜିହୁଦି ପାର୍ତନା ଇଲ୍ତି ପେରିକାନ୍ କ୍ରିସ୍ପସ୍ ନି ୱାନି ଇଲ୍ତି ୱିଜେରେ ପ୍ରବୁମାନୁ ବିସ୍ବାସ୍ କିତାର୍ ମାରି କରନ୍ତିଦି ମାରି ନାଣ୍ତ ଲୋକୁ ପାଉଲଦି ସିକିୟା ୱେନ୍ଜି ବିସ୍ବାସ୍ କିତାର୍ ମାରି ଡୁବନ୍ ଅତାର୍ ।
9 ଉନ୍ଣ୍ତ୍ରି ନାଡ଼ା ପାଉଲ ଉନ୍ଣ୍ତ୍ରି ଦର୍ସନ୍ ପୟ୍ତାନ୍, ଦର୍ସନ୍ତୁ ପ୍ରବୁ ୱାନିଙ୍ଗ୍ଁ ଇର୍ହାନ୍, "ତିଲାମା, ପ୍ରଚାର୍ କିଜିମାନ୍ଆ । ଆବେଟାନ୍ ସୁପ୍ଚାପ୍ ତେବାମା, 10 ଇରିଙ୍ଗ୍ଁ ନାନ୍ ନି ୱାଲେ ଲାକ୍ତୁ ଲାକ୍ତୁ ମାନା । ଏନ୍ ନି କେତି କିଦେଙ୍ଗ୍ଁ ଆଟ୍ଏନ୍, ଇରିଙ୍ଗ୍ଁ ଇୟା ଗାଡ଼୍ତୁ ନା ନାଣ୍ତ ଲୋକୁ ମାନାର୍ ।" 11 ଆଦେଙ୍ଗ୍ଁ ପାଉଲ ଆବେ ମାପୁରୁଦି ବାକ୍ୟ ବିସୟ୍ତାନ୍ ସିକିୟା ସିଜି ବାର୍ସେକ୍ ଆଦା ତେବାତାନ୍ ।