କରନ୍ତି ଗାଡ଼୍ତୁ ପାଉଲତି ସେବା ପାଣି
1 ଇୟା ୱେନ୍କା ପାଉଲ ଆତେନ୍ସ୍ ଡ଼ିସ୍ସି କରନ୍ତିଦୁ ୱାତାନ୍ । 2 ମାରି ୱାନ୍ ଆକିଲା ଦର୍ତି ଜିହୁଦି ଲୋକ୍ତିଙ୍ଗ୍ଁ ବେଟ୍ଆତାନ୍, ପନ୍ତଦୁ ୱାନ୍ ଜନମ୍ ଆତାମାର୍ହାନ୍; ସମ୍ରାଟ କ୍ଳାଡିୟସ୍ ୱିଜେରେ ଜିହୁଦି ଲୋକାଙ୍ଗ୍ ରୋମ୍ ଡ଼ିସ୍ତେଙ୍ଗ୍ଁ ଇଜି ଆଦେସ୍ ସିତାମାର୍ହାନ୍ଆକା, ୱାନ୍ ଏସ ଦିନ୍ ଆଗ୍ଡ଼ି ୱାନି ଆଡ଼୍ସି ପ୍ରିସ୍କିଲାଦି ୱାଲେ ଇଟାଲିଦାନ୍ ୱାତାମାର୍ହାର୍ । 3 ପାଉଲ ୱାରିଙ୍ଗ୍ଁ ବେଟ୍ଆଦେଙ୍ଗ୍ଁ ସଲ୍ସି ୱାରି ୱାଲେ ବାସାତାନ୍, ଇରିଙ୍ଗ୍ଁ ୱାନ୍ ବା ୱାରିୱାଜା ଗୁଡ଼େଏଙ୍ଗ୍ଁ ତିଆର୍ କିଜି ଜିଜି ମାର୍ହାର୍ । 4 ଜିହୁଦି ନି ଗ୍ରିକ୍ଲୋକା ମନ୍ତୁ ପ୍ରବୁଦି ଉଣ୍ତିଙ୍ଗ୍ଁ ବିସ୍ବାସ୍ କିବିସ୍ କିଦେଙ୍ଗ୍ଁ ଇଜି ୱିଜୁ ରମ୍ନି ଦିନ୍ତୁ ୱାନ୍ ପାର୍ତନା ଇଲୁଦୁ ୱାର୍ଗିଜି ମାର୍ହାନ୍ ।
5 ସିଲା ନି ତିମତି ମାସିଦନିଆଦାନ୍ ଡ଼େସି ୱାତି ୱେନ୍କା ପାଉଲ ଜିହୁଦି ଲୋକା ଲାକ୍ତୁ ଜିସୁଦି ସୁସମାଚାର୍ ପ୍ରଚାର୍ କିଦେଙ୍ଗ୍ଁ ପୁରା ସମୟ୍ ସିତାନ୍ ମାରି ଜିସୁଙ୍ଗୁଁ ମସିହ ଇଜି ସାକି ସିତାନ୍ । 6 ମାତର୍ ୱାର୍ ୱାନି ବିରୁଦ୍ତାନ୍ ନିନ୍ଦା କିଜି ଇର୍ହାର୍, ତାମେ ବାଦା ୱାଜା ୱାନ୍ ନିଜେଦି ଆଙ୍ଗିଁଦାନ୍ ଦୁଡ଼ି ସାଡ଼୍ସି ୱାରିଙ୍ଗ୍ଁ ଇର୍ହାନ୍, "ମି ନେତେର୍ ମି ତାଲା ମୁସ୍କୁ ୱାଙ୍ଗିଁତି, ଆରିଙ୍ଗ୍ ଆୟାଉଣ୍ତିଙ୍ଗ୍ ମିର୍ ନିଜେ ଦାଇ ଆନିଦେର୍ । ନାନ୍ ଇୟାଉଣ୍ତିଙ୍ଗ୍ଁ ଦାଇ ସିଲେ । ଆର୍ତିଙ୍ଗ୍ଁ ନାନ୍ ଅଣଜିହୁଦିରି ମାନୁ ସନା ।" 7 ଆବେଟ୍ ୱାନ୍ ୱାରିଙ୍ଗ୍ଁ ଡ଼ିସ୍ସି ମାପୁରୁଦି ପାର୍ତନା କିଜିମାନି ତିତସ୍ ଜୁସ୍ତ ଦର୍ତି ଅରେନ୍ ଅଣଜିହୁଦିଦି ଇଲ୍ତୁ ତେବାଦେଙ୍ଗ୍ଁ ସର୍ହାନ୍ । ଜୁସ୍ତଦି ଇଲୁ ଜିହୁଦି ପାର୍ତନା ଇଲୁ ଲାକ୍ତୁ ମାର୍ହାତ୍ । 8 ଜିହୁଦି ପାର୍ତନା ଇଲ୍ତି ପେରିକାନ୍ କ୍ରିସ୍ପସ୍ ନି ୱାନି ଇଲ୍ତି ୱିଜେରେ ପ୍ରବୁମାନୁ ବିସ୍ବାସ୍ କିତାର୍ ମାରି କରନ୍ତିଦି ମାରି ନାଣ୍ତ ଲୋକୁ ପାଉଲଦି ସିକିୟା ୱେନ୍ଜି ବିସ୍ବାସ୍ କିତାର୍ ମାରି ଡୁବନ୍ ଅତାର୍ ।
9 ଉନ୍ଣ୍ତ୍ରି ନାଡ଼ା ପାଉଲ ଉନ୍ଣ୍ତ୍ରି ଦର୍ସନ୍ ପୟ୍ତାନ୍, ଦର୍ସନ୍ତୁ ପ୍ରବୁ ୱାନିଙ୍ଗ୍ଁ ଇର୍ହାନ୍, "ତିଲାମା, ପ୍ରଚାର୍ କିଜିମାନ୍ଆ । ଆବେଟାନ୍ ସୁପ୍ଚାପ୍ ତେବାମା, 10 ଇରିଙ୍ଗ୍ଁ ନାନ୍ ନି ୱାଲେ ଲାକ୍ତୁ ଲାକ୍ତୁ ମାନା । ଏନ୍ ନି କେତି କିଦେଙ୍ଗ୍ଁ ଆଟ୍ଏନ୍, ଇରିଙ୍ଗ୍ଁ ଇୟା ଗାଡ଼୍ତୁ ନା ନାଣ୍ତ ଲୋକୁ ମାନାର୍ ।" 11 ଆଦେଙ୍ଗ୍ଁ ପାଉଲ ଆବେ ମାପୁରୁଦି ବାକ୍ୟ ବିସୟ୍ତାନ୍ ସିକିୟା ସିଜି ବାର୍ସେକ୍ ଆଦା ତେବାତାନ୍ ।
12 ଗାଲିୟୋ ଆକାୟା ରୋମିୟ ସାସନ୍କିନିକାନ୍ ମାନି ୱେଡ଼ାଦୁ, ଜିହୁଦି ଲୋକୁ ଉଣ୍ତାଜି ପାଉଲତିଙ୍ଗ୍ଁ ଆସ୍ସି ବିଚାର୍ କିନିମାନୁ ଅତାର୍ । 13 ୱାର୍ ଇର୍ହାର୍, "ଇୟା ଲୋକୁ ମା ନିୟମ୍ ବିରୁଦ୍ତି ରିତିଦାନ୍ ମାପୁରୁଦି ପାର୍ତନା କିଦେଙ୍ଗ୍ଁ ଲୋକାଙ୍ଗ୍ କାର୍ପିସ୍ନାନ୍ ।"
14 ପାଉଲ ଇନ୍ଡ୍ରେଙ୍ଗ୍ ସନିୱାଲେ, ଗାଲିୟୋ ଜିହୁଦିଲୋକାଙ୍ଗ୍ଁ ଇର୍ହାନ୍, "ଜଦି ଇବେ ଇନି ଦୋସ୍ବା ତାଗ୍ଇମାଟା ବିସୟ୍ ମାନାତ୍, ଆର୍ତିଙ୍ଗ୍ଁ ନି ଉଣ୍ତିଙ୍ଗ୍ଁ ତିର୍ ଆଜି ନି ମାଟା ୱେନିକା ନା ଉଣ୍ତିଙ୍ଗ୍ଁ ଟିକ୍ମାଟା ଆନାତ୍ । 15 ମାତର୍ ଇୟା ବାଦା ବିସୟ୍ କେବଲ୍ ନି ନିଜେଦି ନିତି ନିୟମ୍ ବଲ୍ ନି ଦରୁ ଜାଟିଦି ବିସୟ୍ ଆତିମାନିଙ୍ଗ୍ ନିଜେ ତେନି ବିଚାର୍ କିନିକା ନେଗେତ୍ । ନାନ୍ ଇୟାନାନି ବିସୟ୍, ବିସାର୍ କିଏ ।" 16 ଇକା ଇଜି ୱାନ୍ ୱାରିଙ୍ଗ୍ଁ ବିଚାର୍ କିନି ବାଡିଦାନ୍ ସପ୍ତାର୍ । 17 ୱାର୍ ପାର୍ତନା ଇଲ୍ତି ପେରିକାନ୍ ସୋସ୍ଥନାତିଙ୍ଗ୍ଁ ଆସ୍ସି ବିଚାର୍କିନି ଆଗ୍ଡ଼ି ମାଡ୍ ଡାକ୍ତାର୍ । ମାତର୍ ଗାଲିୟୋ ଆୟା ଉଣ୍ତିଙ୍ଗ୍ଁ ମନ୍ ସିଏତାନ୍ ।
ସିରିଆଦି ଆଣ୍ଟିୟୋକଦୁ ପାଉଲ ଡ଼େସିୱାତାନ୍
18 ପାଉଲ କରିନ୍ତିଦୁ ବିସ୍ବାସ୍ତି ତଡ଼ାନ୍କା ୱାଲେ ନାଣ୍ତ ଦିନ୍ ତେବାତାନ୍ । ୱେନ୍କା ୱାରିଙ୍ଗ୍ଁ ଡ଼ିସ୍ସି ପ୍ରିସ୍କିଲା ନି ଆକିଲା ୱାଲେ ସିରିଆ ତରିନ୍ ଏରୁ ନାସି ସର୍ହାର୍ । କେଙ୍କ୍ରେୟାଦାନ୍ ଏରୁତୁ ନାତେଙ୍ଗ୍ ଆରାମ୍ କିନି ଆଗ୍ଡ଼ି ୱାନି ଉନ୍ଣ୍ତ୍ରି ନିୟମ୍ ଇସାବ୍ତାନ୍ ୱାନି ତାଲା ଟାଙ୍ଗୁଁରୁ ଆତାନ୍ । 19 ୱାର୍ ଏପିସସ୍ତୁ ଇତି ୱେନ୍କା ପାଉଲ ପ୍ରିସ୍କିଲା ନି ଆକ୍ୱିଲେଙ୍ଗ୍ଁ ପୋକ୍ତାନ୍ । ୱାନ୍ ଆବେ ପାର୍ତନା ଇଲୁଦୁ ସଲ୍ସି ଜିହୁଦିଲୋକା ୱାଲେ ଦାର୍ମୁ ବିସୟ୍ତାନ୍ ୱାର୍ଗିତାର୍ । 20 ଲୋକୁ ୱାନିଙ୍ଗ୍ଁ ମାରି ବେସି ଦିନ୍ ତେବାଦେଙ୍ଗ୍ଁ ଇର୍ହାର୍, ମାତର୍ ୱାନ୍ ରାଜି ଆଏତାନ୍ । 21 ସନି ୱେଡ଼ାଦୁ ୱାନ୍ ୱାରିଙ୍ଗ୍ଁ ଇର୍ହାନ୍, "ଜଦି ମାପୁରୁଦି ବଦା ତେବାନାତ୍, ନାନ୍ ମି ଲାକ୍ତୁ ଡ଼େସି ୱାନା ।" ୱେନ୍କା ୱାନ୍ ଜାହାଜ୍ ଏକ୍ସି ଏପିସସ୍ ଡ଼ିସ୍ସି ୱାତାନ୍ ।
22 ସିସେରିଆଦୁ ଇଜି ଆବେଟାନ୍ ୱାନ୍ ଜିରୁସାଲାମ୍ତୁ ସର୍ହାନ୍ ମାରି ମଣ୍ତଲିଦିଙ୍ଗ୍ଁ ମାଡ଼ିସ୍ କିଜି ଆବେଟାନ୍ ଆଣ୍ଟିୟକଦୁ ସର୍ହାନ୍ । 23 ଆବେ ଏସ ଦିନ୍ ସାନ୍ଧି ମାର୍ର୍ହି ୱେନ୍କା ମାରି ୱାନ୍ ସଲ୍ସି ଗାଲାତିୟ ନି ପ୍ରୁଗିଆ ରାଜିଦୁ ମଜାୟ୍ ସିଜି ସର୍ହାନ୍ ମାରି ସାର୍ଦୁ ବିସ୍ବାସିରିଙ୍ଗ୍ଁ ୱାରି ବିସ୍ବାସ୍ତୁ ଡାଟ୍ ଆଦେଙ୍ଗ୍ଁ ଇଜି ୱେଡ଼ିକା କିତାନ୍ ।
ଏପିସସ୍ ନି କରିନ୍ତିଦୁ ଆପଲୋ
24 ଆୟା ସମୟ୍ତୁ ଆଲେକ୍ଜାଣ୍ତ୍ରିଆ ଆଦୁ ଜନମ୍ ଆତିମାର୍ଇ ଆପୋଲୋ ଦର୍ତି ଅରେନ୍ ଜିହୁଦିଲୋକୁ ଏପିସସ୍ତୁ ୱାତାନ୍ । ୱାନ୍ ଅରେନ୍ ନେଗି ପ୍ରଚାରକ ନି ଦାର୍ମୁସାସ୍ତ୍ରଦୁ ୱାନି ନାଣ୍ତ ବୁଦି ମାର୍ହାତ୍ । 25 ୱାନ୍ ପ୍ରବୁଦି ସାରି ବିସୟ୍ତାନ୍ ସିକିୟା ପୟ୍ତାମାର୍ହାନ୍ ମାରି ଆତ୍ମାଦୁ ନାଣ୍ତ ୱେଡ଼ିକାଦାନ୍ ଜିସୁଦି ବିସୟ୍ତାନ୍ ସତ୍ ସିକିୟା ସିଜି ମାର୍ହାନ୍ । ମାତର୍ ଇୟା ବିସୟ୍ତାନ୍ ୱାନ୍ କେବଲ୍ ଜୋହନତି ଡୁବନ୍ ବିସୟ୍ ନେସ୍ତାମାର୍ହାନ୍ । 26 ପାର୍ତନା ଇଲୁଦୁ ୱାନ୍ ତିଲାଏନ୍ଣ୍ତା ସିକିୟା ସିଦେଙ୍ଗ୍ ଆସ୍ତାନ୍ । ୱାନି ସିକିୟା ୱେନ୍ଜି ପ୍ରିସ୍କିଲା ନି ଆକିଲା ୱାନିଙ୍ଗଁ ତାମେ ଇଲ୍ତୁ କୁକ୍ତା ଅତାର୍ ମାରି ଆବେ ୱାନିଙ୍ଗ୍ଁ ମାପୁରୁଦି ସାରି ବିସୟ୍ତାନ୍ ନେଗେନ୍ କିଜି ବୁଜାକିତାସିତାର୍ । 27 ୱେନ୍କା ଆପଲୋ ଆକାୟା ରାଜିଦୁ ସନ୍ଡ୍ରେଙ୍ଗ୍ଁ ଇଜି ବଦା କିତାନ୍ଆକା, ଏପିସସ୍ତି ବିସ୍ବାସ୍ତି ତଡ଼ାନ୍କୁ ୱାନିଙ୍ଗ୍ଁ ସାହାଜ୍ୟ କିତାର୍ ମାରି ୱାନିଙ୍ଗ୍ଁ ୱେଡ଼ିକାଦାନ୍ ଆସ୍ତେଙ୍ଗ୍ଁ ଇଜି ମାଡ଼ିସ୍ କିଜି ଆକାୟାଦି ବିସ୍ବାସିରିଙ୍ଗ୍ଁ ସିଟି ରାସ୍ତାନ୍ । ୱାନ୍ ଆବେ ଇଜି ମାପୁରୁଦି ଦୟାଦାନ୍ ବିସ୍ବାସି ଆତିମାନି ଲୋକାଙ୍ଗ୍ ନାଣ୍ତ ସାହାଜ୍ୟ କିତାନ୍ । 28 ଜିସୁ ଜେ ମସିହ, ୱାନି ସାକ୍ତିଦି ମାଟାଦିମାଟାଦାନ୍ ଦାର୍ମୁସାସ୍ତ୍ରଦାନ୍ ଇକା ସତ୍ ଇଜି ୱେର୍ନିୱାଲେ ୱାନ୍ ଜିହୁଦିଲୋକାଙ୍ଗ୍ଁ ଆରାକିତାନ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)