1 "ତଡ଼ାନ୍‌କୁ ମାରି ବୁବାର୍‍, ମି ଆଗ୍‌ଡ଼ି ନିଜେ ତରିଟାନ୍‍ ନାନୁ ଆମାକା ଇଜିନା, ଆକା ୱେନ୍‌ଡ୍ରୁ !" 2 ୱାରି ୱାଲେ ୱାନ୍‌ ଏବ୍ରି ବାସାଦାନ୍‍ ମାଟା ୱାର୍‍ଗିଜିନିକା ୱେନ୍‌ଜି ୱାର୍‌ ମାରି ଆଲେତାର୍‍ ମାରି ପାଉଲ ଇନ୍‍ଡ୍ରେଙ୍ଗ୍‍ଁ ଆସ୍‌ତାନ୍‌ : 3 ✝୨୨:୩ ପ୍ରେରିତ ୫:୩୪-୩୯.ନାନୁ ଅରେନ୍‌ ଜିହୁଦି, ସିଲିସିଆଦି ତାର୍ସସ୍‍ତୁ ନା ଜନମ୍‌, ମାତର୍‌ ନାନୁ ଜିରୁସାଲାମ୍‍ତୁ ପିରିତା ମାର୍ହା ମାରି ଗମଲିଏଲତି ଅରେନ୍‌ ସିସୁ ମାର୍ହା । ମା ଡକ୍ରାଦାଦାରି ନିୟମ୍‌ ନାନୁ ଟିକ୍‍ତାନ୍‍ ଅଜାତା ମାର୍ହା ମାରି ମି ୱାଜା ମାପୁରୁଦି ଉଣ୍ତିଙ୍ଗ୍‍ଁ ୱେଡ଼ିକା ମାର୍ହା । 4 ✝୨୨:୪ ପ୍ରେରିତ ୮:୩; ୨୬:୯-୧୧.ନାନୁ ଇୟା ସାରିଦୁ ସନି ଲୋକା ମୁସ୍‌କୁ ଜାଟି କିଜି ୱାରିଙ୍ଗ୍‍ଁ ଜିବନ୍‌ତୁ ଡାକ୍‍ସି ମାର୍ହା । ମେମାରି ନି ଆଇମା ୱିଜେରିଙ୍ଗ୍‍ଁ ତର୍‌ସି ଜଇଲ୍‌ତୁ ଅସି ମାର୍ହା । 5 ନା ଇୟା ମାଟା ସତ୍‌ ଜେ, ପେରି ଜାଜକ ନି ପେରି ଲୋକାମିଟିଙ୍ଗ୍‍ତି ସବାଦି ୱିଜେରେ ତେନି ସାକି । ଇୟା ଲୋକାଙ୍ଗ୍‌ ତର୍‌ସି ମାରି ସିକିଣିଦାନ୍‍ ତର୍‌ସି ଦଣ୍ଡ୍‌ ସିଦେଙ୍ଗ୍‌ ଇଜି ଜିରୁସାଲାମ୍‍ତୁ ତାତେଙ୍ଗ୍‍ଁ ଇଜି ନାନୁ ପେରି ଜାଜକତିମାଣାନ୍‌ ସିଟି ଅସି ଦାମାସ୍‍କସ୍‍ତୁ ମାନି ଜିହୁଦି ତଡ଼ାନ୍‌କା ଲାକ୍‌ତୁ ସର୍‌ଆ ।

6 "ନାନୁ ସଲ୍‍ସି ଏସ୍ତିୱାଲେ ଦାମାସ୍‍କସ୍‍ତି ଲାକ୍‌ତୁ ଆଜିମାର୍ହା, ମାଦ୍‌ଲାମ୍‌ ବେଡ଼ାଦୁ ବାଦଡ଼୍‍ତାନ୍‍ ଉନ୍‌ଡ୍ରି କାସ୍‍ନି ଜାୟ୍‌ ଆୟାଦାପ୍ରେନେ ନା ସାରିବେଡ଼୍‍ତି ତରାୟ୍‍ ଆତାତ୍‌ । 7 ନାନୁ ବୁମିଦୁ ମକମ୍‌ ପାଡ଼୍‍କ୍‍ସି ଆର୍‍ତା ମାରି ନା ଉଣ୍ତିଙ୍ଗ୍‍ଁ ମାଟା ୱେର୍‌ଆ, ‘ସାଉଲ, ସାଉଲ’ ନିନୁ ଏନ୍ଦା ନାଙ୍ଗିଁ କାସ୍ଟୁ ସିଜିନି ? 8 ନାନୁ ୱେନ୍‍ବାତା, ପ୍ରବୁ, ନିନୁ ଏନ୍‌ ? ୱାନ୍‌ ନାଙ୍ଗିଁ ଇର୍ହାନ୍‌, ନିନୁ ଆମାୱାନିଙ୍ଗ୍‍ଁ କାସ୍ଟୁ ସିଜିନି, ନାନୁ ଆୟା ନାଜରିୟତିୟଦି ଜିସୁ । 9 ନା ୱାଲେ ମାର୍‍ଇ ଲୋକୁ ଆୟା ଜାୟ୍‌ ସୁଡ଼ୁତାର୍‌, ମାତର୍‌ ନା ୱାଲେ ୱାର୍‌ଗିଜି ମାନି ଲୋକ୍‌ତି ବଲ୍ ୱେନ୍‍ଡ୍ରେଙ୍ଗ୍‍ଁ ଆଟ୍‌ଏତାର୍‌ । 10 ନାନୁ ୱେନ୍‍ବାତା, ପ୍ରବୁ, ନାନୁ ଇନିକା କିନା ? ପ୍ରବୁ ନାଙ୍ଗିଁ ଇର୍ହାନ୍‌, ନିଙ୍ଗ୍‍ଆ, ଦାମାସ୍‍କସ୍‍ତୁ ସାଙ୍ଗ୍‍ଆ, ମାପୁରୁ ନି ଉଣ୍ତିଙ୍ଗ୍‍ଁ ଏମେ ପାଣି ଇଟ୍‌ତାମାନାନ୍‌, ଆବେନୁ ନିଙ୍ଗିଁ ଆକା ଜାଣେ କିନାନ୍‌ । 11 ଜାୟ୍‍ତି ନାଣ୍ତ କାସ୍‍ନି ମାଣାନ୍‌ ନାନୁ କାଣା ଆତା ସର୍‌ଆ । ଆୟାଉଣ୍ତିଙ୍ଗ୍‌ ନା ୱାଲେ ଅର୍‌ସେ ସନିକାର୍‍ ନା କିୟୁ ଆସ୍‌ସି ନାଙ୍ଗିଁ ଦାମାସ୍‍କସ୍‍ତୁ ଅତାର୍‌ ।"

12 "ଆୟା ଗାଡ଼୍‌ତୁ ହନନିୟ ଦର୍‌ତି ଅରେନ୍‌ ଦାର୍ମୁଦି ଲୋକୁ ମାର୍ହାନ୍‍ । ୱାନ୍‌ ମା ନିୟମ୍‌ ମାନାଜି ମାର୍ହାନ୍‍ ମାରି ଆବେ ବାସା କିଜିମାନି ଜିହୁଦି ଲୋକୁ ୱିଜେରେ ୱାନିଙ୍ଗ୍‍ଁ ନାଣ୍ତ ମାନାଜି ମାର୍ହାର୍‌ । 13 ୱାନ୍‌ ନା ଲାକ୍‌ତୁ ୱାଜି ନା ଲାକ୍‌ତୁ ନିଲ୍‍ସି ଇର୍ହାନ୍‌, ତଡ଼ାନ୍‌ ସାଉଲ ନି ସୁଣି ସାକ୍ତି ପୟ୍‍ଆ । ଟିକ୍‌ ଆୟା ୱେଡ଼ାଦୁ ନାନୁ ମାରିଡ଼େସି ସୁଣିସାକ୍ତି ପୟ୍‌ଜି ୱାନିଙ୍ଗ୍‍ଁ ସୁଡ଼ୁଦେଙ୍ଗ୍‌ ଆଟ୍‍ତା । 14 ୱାନ୍‌ ଇର୍ହାନ୍‌, ମା ଡକ୍ରାଦାଦାରି ମାପୁରୁ ନିଙ୍ଗିଁ ୱାନି ମାଟା ନେସ୍‍ତେଙ୍ଗ୍‍ଁ ଇଜି, ୱାନି ଦାର୍ମୁ ସେବକତିଙ୍ଗ୍‍ଁ ସୁଡ଼ୁଦେଙ୍ଗ୍‌ ଇଜି ମାରି ୱାନି ମାଟା ୱେନ୍‍ଡ୍ରେଙ୍ଗ୍‍ଁ ଇଜି ବାସେ କିତାମାନାନ୍‍ । 15 ଇରିଙ୍ଗ୍‍ଁ ନିନୁ ଆମାକା ସୁଡ଼ୁତିମାନି ମାରି ୱେର୍‍ଇମାନି, ଆକା ୱିଜେରରି ଲୋକା ଲାକ୍‌ତୁ ୱେର୍‍ତେଙ୍ଗ୍‍ଁ ଇଜି ନିନୁ ୱାନି ସାକି ଆନି । 16 ମାରି ଏନ୍ଦା ୱେଡ଼ା କିଜିନି ? ନିଙ୍ଗିଁଆ, ଡୁବନ୍‌ ଅଆ ମାରି ୱାନିମାନୁ ପାର୍‌ତନା କିନି ମାଣାନ୍‌ ନି ପାପ୍‌ ୱିଜୁ ନରାୟ୍‍ ଆପିତ୍‌ ।"

17 "ନାନୁ ଜିରୁସାଲାମ୍‍ତାନ୍‍ ଡ଼େସି ସଲ୍‍ସି ଆବେ ମନ୍ଦିର୍‌ତୁ ପାର୍‌ତନା କିଜିମାନିୱାଲେ, ପ୍ରବୁଦି ଦର୍ସନ୍‌ ପୟ୍‍ତା । 18 ଆମାମାନୁ ନାନ୍‌ ପ୍ରବୁଙ୍ଗୁଁ ସୁଡ଼ୁତା, ୱାନ୍‌ ନାଙ୍ଗିଁ ଇର୍ହାନ୍‌, ବେଗି ଜିରୁସାଲାମ୍‌ ଡ଼ିସ୍‍ଆ, ଇରିଙ୍ଗ୍‍ଁ ଇବେଣି ଲୋକୁ ନା ବିସୟ୍‌ତାନ୍‌ ନି ସାକି ମାନାଏର୍‍ । 19 ନାନୁ ଇର୍‌ଆ, ପ୍ରବୁ, ନାନୁ ପାର୍‍ତନାକିନି ଇଲ୍‌କାଙ୍ଗ୍‌ ସଲ୍‍ସି ନିବାନୁ ବିସ୍‌ବାସ୍‌ କିଜିମାନି ଲୋକାଙ୍ଗ୍‌ ଏଣ୍ତେସ୍‌ ତର୍‍ତାମାର୍ହା ମାରି ଡାକ୍‍ତା ମାର୍ହା, ଇକା ୱାର୍‌ ନେଗେନ୍‌ କିଜି ନେସ୍‌ନାର୍‌ । 20 ✝୨୨:୨୦ ପ୍ରେରିତ ୭:୫୮.ମାରି ଏସ୍ତିୱାଲେ ନି ସାକି ସ୍ତିପାନ୍‍ତିଙ୍ଗ୍‍ଁ ନେତେର୍‌ ସାୟାମାର୍‌ଗା ଡାକ୍‍ତାର୍‍, ନାନୁ ନିଜେ ଆବେ ମାର୍ହା; ୱାନିଙ୍ଗ୍‍ଁ ଜିବନ୍‌ତୁ ଡାକ୍‍ତେଙ୍ଗ୍‍ଁ ଇଜିନା ରାଜିଆନିକା ୱେର୍‍ତା ମାର୍ହା ମାରି ୱାନିଙ୍ଗ୍‌ ଡାକ୍‍ନିୱାରି ଆଙ୍ଗିଁଙ୍ଗ୍‌ ୱିଜୁ କାପ୍‍କିତା ମାର୍ହା । 21 ପ୍ରବୁ ନାଙ୍ଗିଁ ଇର୍ହାନ୍‌, ସାଙ୍ଗ୍‍ଆ, ନାନୁ ନିଙ୍ଗିଁ ନାଣ୍ତ ଆକ ଅଣଜିହୁଦି ଲୋକା ଲାକ୍‌ତୁ ପକ୍‍ନା ।"

22 ପାଉଲ ଇୟା ମାଟା ଇନି ସାନ୍ଦି ଲୋକୁ ମନ୍‍ ସିଜି ୱେନ୍‍ଜିମାର୍ହାର୍‍, ମାତର୍‌ ତାନିୱେନ୍‍କା ୱାର୍‌ ନାଣ୍ତ ଆଉଲି ଆଜି ଇର୍ହାର୍‌, "ୱାନିଙ୍ଗ୍‍ଁ ଦୁନିଆଦାନ୍‌ ସପ୍‍ତୁ ! ୱାନିଙ୍ଗ୍‌ ସାୟାମାର୍‌ଗା ଡାକ୍‍ତୁ ! ୱାନ୍‌ ଜିନିକା ଜଗ୍‌ ସିଲେ !" 23 ୱାର୍‌ ଆଉଲି ଆଜିମାର୍ହାର୍‍, ୱାତିଙ୍ଗ୍‍ ଇପ୍‍ସିମାର୍ହାର୍‍ ମାରି ମୁସ୍‌କୁ ଦୁଡ଼ି ପୋକ୍‌ସିମାର୍ହାର୍‍ । 24 ପାଉଲ୍‍ତିଙ୍ଗ୍‍ଁ ଦୁର୍ଗ ଲୋଇ ଅନି ଉଣ୍ତିଙ୍ଗ୍‍ଁ ରୋମିୟ ସନ୍ୟରି ନେତା ସନ୍ୟରିଙ୍ଗ୍‌ ଆଦେସ୍‍ ସିତାନ୍‌ ମାରି ଜିହୁଦି ଲୋକୁ ଏନ୍ଦା ୱାନି ବିରଦ୍‌ତାନ୍‌ ଇୟାୱାଜା ଆଉଲି ଆଜିନାର୍‌, ଆକା ନେସ୍‍ତେଙ୍ଗ୍‍ଁ ଇଜି ୱାନିଙ୍ଗ୍‍ଁ କରଡା ଡାକିସ୍‍ତେଙ୍ଗ୍‍ଁ ଆଦେସ୍‌ ସିତାନ୍‌ । 25 ମାତର୍‌ ୱାର୍‌ ୱାନିଙ୍ଗ୍‍ଁ ତର୍‍ନି ୱାଲେ ପାଉଲ ଆବେ ମାନି ପାଣିକିନିକାନ୍‌ ଇର୍ହାନ୍‌, "ଇନି ନିନ୍ଦାଦୁ ଇୟାସାନ୍ଦି ବିଚାରିତ ଆଇ ମାନି ଅରେନ୍‌ ରମିୟ ଲୋକ୍‍ତିଙ୍ଗ୍‍ଁ କରଡା ଡାକ୍‍ନିକା ଇନିକା ରିତିନିତି ମାନାତ୍‌ ?"

26 ଇକା ୱେନ୍‌ଜି ପାଣିକିନିକାନ୍‌ ସଲ୍‍ସି ସନ୍ୟରି ନେତେଙ୍ଗ୍‍ଁ ଇର୍ହାନ୍‌, "ନିନୁ ଇନିକା କିଜିନି ? ଇୟା ଲୋକୁ ଜେ ଅରେନ୍‌ ରୋମିୟ ଲୋକୁ !"

27 ସନ୍ୟରି ନେତା ପାଉଲ୍‍ତି ଲାକ୍‌ତୁ ସଲ୍‍ସି ୱେନ୍‌ବାତାନ୍‌, "ନିନୁ ଇନିକା ଅରେନ୍‌ ରୋମିୟ ଲୋକୁ ?"

ପାଉଲ ଇର୍ହାନ୍‌, "ହୁଁ ।"

28 ସନ୍ୟରି ନେତା ଇର୍ହାନ୍‌, "ଗାଦି ଡାବୁଙ୍ଗୁଁ ସିଜି ନାନୁ ଅରେନ୍‌ ରୋମିୟ ଲୋକୁ ଆତାମାନା ।"

ପାଉଲ ଇର୍ହାନ୍‌, "ମାତର୍‌ ନାନୁ ଜନମ୍‍ତାନ୍‍ ରୋମିୟ ଲୋକୁ ।"

29 ଦାପ୍ରେ ଦାପ୍ରେ ଏମେ ଲୋକୁ ପାଉଲତିଙ୍ଗ୍‍ଁ ୱେନ୍‍ବାଦେଙ୍ଗ୍‍ଁ ସଲ୍‍ସି ମାର୍ହାର୍‌, ୱେନ୍‌କା ଗୁସାଜିସର୍ହାର୍‍ ମାରି ପାଉଲ ଅରେନ୍‌ ରୋମିୟ ଲୋକୁ ଆତିମାନିକା ନେସ୍‌ସି ମାରି ୱାନ୍‌ ଜେ ୱାନିଙ୍ଗ୍‍ଁ ସିକିଣିଦୁ ତର୍‌ତେଙ୍ଗ୍‍ଁ ଇଜି ଆଦେସ୍‌ ସିତାମାନାନ୍‌, ଇକା ନେସ୍‌ସି ସନ୍ୟରି ନେତା ନାଣ୍ତ ତିଲାତାନ୍‍ ।

30 ଜିହୁଦି ଲୋକୁ ପାଉଲତି ବିରଦ୍‌ତାନ୍‌ ଇନି ଦାବି କିତାମାନାର୍‍, ଆକା ସତେନେ ନେସ୍‌ତେଙ୍ଗ୍‌ ସନ୍ୟରି ନେତା ମାରିନାଣ୍ତିଙ୍ଗ୍‍ଁ ପାଉଲତିଙ୍ଗ୍‍ଁ ଗାଟି ୱିଜୁ କୁତ୍‍ତାନ୍‍ ପେରିସଭାଦି ପୁରା ମିଟିଙ୍ଗ୍‍ଁ କୁକିସ୍‍ କିଦେଙ୍ଗ୍‌ ଇଜି ପେରି ଜାଜକରିଙ୍ଗ୍‍ଁ ଆଦେସ୍‌ ସିତାନ୍‌ । ତାନିୱେନ୍‍କା ପାଉଲ୍‍ତିଙ୍ଗ୍‍ଁ ଅସି ୱାରି ଆଗ୍‌ଡ଼ି ନିଲ୍‌ପ୍‍ତାର୍‌ ।