1 ପାସ୍‌ ଦିନ୍‌ ୱେନ୍‌କା ପେରି ଜାଜକ ହନନିୟ ଏସ ଜିହୁଦି ନେତାର୍‍ ନି ତର୍ତୁଲସ୍‍ ଦର୍‌ତି ଅରେନ୍‌ ଅକିଲତି ୱାଲେ କାଇସରିଆଦୁ ସର୍ହାନ୍‍ । ୱାର୍‌ ପେଲିକ୍‍ସ୍‍ତି ଆଗ୍‌ଡ଼ି ୱାଜି ପାଉଲତି ବିରଦ୍‌ତାନ୍‌ ୱାରି ଦାବି ୱେର୍‌ତାନ୍‌ । 2 ୱେନ୍‌କା ପାଉଲତିଙ୍ଗ୍‍ଁ ଆବେ ତାତାର୍‌ ମାରି ତର୍ତୁଲସ୍‍ ଇୟାୱାଜା ଲୋକା ଦାବିୱିଜୁ ୱେର୍‌ତାନ୍‌ : "ମି ବୁଦିଦି ସାରି ତର୍‍ନି ମାଣାନ୍‌ ମାପ୍‌ ନାଣ୍ତ ଦିନ୍‌ ଆସ୍‌ସି ସାନ୍ତିଦାନ୍‌ ତେବାଜିନାପ୍‍ ମାରି ମା ଦେସ୍‌ତି ନେଗି ଉଣ୍ତିଙ୍ଗ୍‍ଁ ଗାଦି ନିୟମ୍‌ତି ପାଣି କିଆୟ୍‍ଆତାମାନାନ୍‍ । 3 ୱିଜୁ ପେଲିକସ୍‍ ବାଡିଦୁ ନି ୱିଜୁ ୱେଡ଼ାଦୁ ମାପ୍‌ ତେନିଙ୍ଗ୍‍ଁ କୁକ୍‌ସିନାପ୍‍, ମାପ୍‌ ନି ଲାକ୍‌ତୁ ନାଣ୍ତ ଇସାବ୍‌ତାନ୍‌ ଦନ୍ୟବାଦ୍‌ ସିଜିନାପ୍‌ । 4 ୱାନ୍‌ ଏଣ୍ତେସ୍‌ ଆପିନ୍‌, ନାନୁ ମି ନାଣ୍ତ ସମୟ୍ ଅତେଙ୍ଗ୍‍ଁ ବଦାକିଏ, ଆଦେଙ୍ଗ୍‍ଁ ନିନୁ ଦୟା କିଜି ମା ଏସ ମାଟା ୱେନ୍‍ଡ୍ରେଙ୍ଗ୍‍ଁ ଇଜି ନାନ୍ ମାଡ଼ିସ୍‌ କିଜିନା । 5 ଇୟା ଲୋକୁ ବୟଙ୍କର୍‍ ଜାଟିକିନିକାନ୍‍ ଇଜି ମାପ୍‌ ନେସ୍‌ନାପ୍‌; ୱାନ୍‌ ଦୁନିଆଦି ୱିଜୁତରିନ୍‍ ବୁଲାଜି ଜିହୁଦିଲୋକାଙ୍ଗ୍‍ଁ ସାନ୍ତି ରୁକ୍‍ତେଙ୍ଗ୍‍ଁ ଏଗ୍ରିସ୍‍ କିଜିନାନ୍‍ । ୱାନ୍‌ ନାଜରିୟତିୟ ଦଲତୀ ନେତା । 6 ୱାନ୍‌ ମା ମନ୍ଦିର୍‍ତିଙ୍ଗ୍‍ଁ ଅପବିତ୍ର କିଦେଙ୍ଗ୍‍ଁ ସେସ୍ଟା କିନିୱାଲେ ମାପ୍‌ ୱାନିଙ୍ଗ୍‍ଁ ଆସ୍‍ତାପ୍‍ । 7 ମାତର୍‌ ସହେ ଲୋକା ମୁସ୍‌କୁ ମାନି ନେତା ଲୁସିୟା ୱାଜି ଡାଟ୍‌ତାନ୍‌ ୱେନିଙ୍ଗ୍‍ଁ ମା କିୟୁଦାନ୍‌ ଡ଼ିବିସ୍‍ତାଅତାନ୍‍ । 8 ମାପ୍‌ ୱେନି ବିରଦ୍‌ତାନ୍‌ ଏମେ ୱିଜୁ ଦାବି କିଜିନାପ୍‍, ଆକା ନିନୁ ନିଜେ ଇୟା ଲୋକ୍‍ତିଙ୍ଗ୍‍ଁ ୱେନ୍‍ବାଜି ନେସ୍‍ତେଙ୍ଗ୍‍ଁ ଆଟ୍‌ନି ।" 9 ଇବେମାନି ଜିହୁଦି ଲୋକୁ ବା ଇୟା ଦାବି ସତ୍‌ ଇଜି ଆଟ୍‍ୱାଦାନ୍‍ ରାଜିଆନିକା ଜାଣେକିତାର୍‍ ।

10 ତାନିୱେନ୍‍କା ଆୟା ଦେସ୍‌ତି ମନ୍ତ୍ରୀ ପାଉଲତିଙ୍ଗ୍‍ ମାଟା ଇନ୍‍ଡ୍ରେଙ୍ଗ୍‍ଁ ଇଜି ସାରିସିତାନ୍‍ ଆକା ପାଉଲ ଇର୍ହାନ୍‌, "ନାନୁ ନେସ୍‌ନା ଜେ ନାଣ୍ତ ବାର୍‍ସେକ୍‍ ଆସ୍‌ସି ନିନୁ ଇୟା ଲୋକା ବିସାର୍‌ କିନିକିନ୍ଦା ଆତିମାନି, ଆଦେଙ୍ଗ୍‍ଁ ନି ଆଗ୍‌ଡ଼ି ନିଜେଦି ବିସୟ୍‌ ୱେର୍‍ତେଙ୍ଗ୍‍ଁ ନା ତରିଟାନ୍‍ ୱେଡ଼ିକାଦି ମାଟା । 11 ନିନୁ ନିଜେ ପୟ୍‌ଜି ନେସ୍‌ତେଙ୍ଗ୍‌ ଆଟ୍‌ନି ଜେ, ଆନାତ୍‌ ବାର୍‍ ଦିନ୍‌ ଆଗ୍‌ଡ଼ି ନାନୁ ଜିରୁସାଲାମ୍‍ତୁ ପାର୍‌ତନା କିଦେଙ୍ଗ୍‍ଁ ସର୍ହାମାର୍ହା । 12 ମନ୍ଦିର୍‌ତୁ ଏୱାଲେ ନା ଆସ୍‍ସିସାନିକା କିଜିମାନିକା ଜିହୁଦିଲୋକୁ ସୁଡ଼ୁଏର୍‍ ମାର୍ହାର୍‌ ବା ପାର୍‍ତନାକିନି ଇଲ୍‌କାଙ୍ଗ୍‌ ଆପିତ୍‌ ଗାଡ଼୍‌ତି ଆଇ ଇନି ବାଡିଦୁ ନାଙ୍ଗିଁ ଲୋକାଙ୍ଗ୍‌ ଏଗ୍ରିସ୍‌କିନିକା ସୁଡ଼ୁଏର୍‍ ମାର୍ହାର୍‌ । 13 ଆଦେଙ୍ଗ୍‍ଁ ନା ବିରଦ୍‌ତାନ୍‌ ଇଲେଇ ତାତିମାନି ଦାବିୱିଜୁକା ଉଣ୍ତିଙ୍ଗ୍‍ଁ ୱାର୍‌ ସତ୍‌ ମାଟା ସିଦେଙ୍ଗ୍‌ ଆଟ୍‍ଏର୍‍ । 14 ନାନୁ ନି ଲାକ୍‌ତୁ ମାନାଜିନା ଜେ, ଏମେ ସାରିଦିଙ୍ଗ୍‍ଁ ୱାର୍‌ ମିଚ୍‌ ଇଜି ଇଜିନାର୍‍, ଆୟା ସାରିଦିଙ୍ଗ୍‍ଁ ବୁଲାଜି ନାନୁ ମା ପୁର୍ବେଦିଡକ୍‌ରାଦାଦାରି ମାପୁରୁଙ୍ଗ୍‍ଁ ସେବା କିଜିନା । ମାତର୍‌ ନାନୁ ବା ମସାଦି ନିୟମ୍‌ ନି ବାବବାଦିରି ବଇଦୁ ରାସାତି ୱିଜୁ ମାଟା ବିସ୍‌ବାସ୍‌ କିନା । 15 ଇୟାୱାରି ୱାଜା ମାପୁରୁଦିମାନୁ ନା ଆୟା ଉନ୍‌ଡ୍ରି ଆସା ମାନାତ୍‌ ଜେ, ଦାର୍ମୁ ନି ଅଦାର୍ମୁ ଲୋକୁ ୱିଜେରେ ସାତି ମାଣାନ୍‌ ମାରିଡ଼େସି ନିଙ୍ଗ୍‍ଁନାର୍‍ । 16 ଆଦେଙ୍ଗ୍‍ଁ ମାପୁରୁ ନି ଲୋକା ଆଗ୍‌ଡ଼ି ନେଗି ବୁଦି ବ୍ୟବ୍‌ହାର୍‌ କିଦେଙ୍ଗ୍‌ ଇଜି ନାନୁ ୱିଜୁଦିନ୍‌ ବଦା କିଜିନା ।

17 ✝ ୨୪:୧୭ ପ୍ରେରିତ ୨୧:୧୭-୨୮. "ନାଣ୍ତ ବାର୍‍ସେକ୍‍ ଆସ୍‌ସି ଜିରୁସାଲାମ୍‍ତାନ୍‍ ଆକ ତେବାତି ୱେନ୍‌କା, ନା ନିଜେଦି ଲୋକା ଉଣ୍ତିଙ୍ଗ୍‍ଁ ଏସ ଡାବୁଙ୍ଗୁଁ ଅତେଙ୍ଗ୍‍ଁ ନି ପୁଜା ସିଦେଙ୍ଗ୍‌ ଇଜି ନାନୁ ଆବେ ସର୍ହାମାର୍ହା । 18 ନାନୁ ନେଗେନ୍‌କିନି ବିଦି ୱିସ୍‌ସି ମାର୍‌ଇ ବେଡ଼ାଦୁ ୱାର୍‌ ନାଙ୍ଗିଁ ମନ୍ଦିର୍‌ତୁ ସୁଡ଼ୁତାର୍‌ । ନାସ୍ତିୱାଲେ ନା ଲାକ୍‌ତୁ ଲୋକ୍‍ଉଣ୍ତାତିକା ସିଲେତାତ୍‍ କି ଅସାନ୍ତି ଆଏତ୍‍ମାର୍ହାତ୍‍ । 19 ମାତର୍‌ ଆସିଆ ଦେସ୍‌ତି ଏସ ଜିହୁଦି ଲୋକୁ ଆବେ ମାର୍ହାର୍‌; ଜଦି ୱାରି ନା ବିରୁଦ୍‌ତାନ୍‌ ମାଟା ଇନିକା ମାନାତ୍‌, ୱାର୍‌ ନିଜେ ନି ଆଗ୍‌ଡ଼ି ୱାଜି ଦାବି କିଦେଙ୍ଗ୍‍ଁ ଆଟ୍‍ତାର୍‍ମାନ୍ଦି । 20 ମାରି, ନାନୁ ଏସ୍ତିୱାଲେ ପେରିସଭା ଆଗ୍‌ଡ଼ି ନିର୍‍ଆ ମାର୍‌ର୍ହା, ନାନୁ ଏମେ ତାଗ୍‌ଇମାଟା ପାଣିଦୁ ଦସି ଇଜି ୱେଙ୍ଗିଁତା, ଆକା ଇବେମାନି ଇୟା ଲୋକୁ ଇନିର୍‍ । 21 ✝୨୪:୨୧ ପ୍ରେରିତ ୨୩:୬.ଜଦିବା ନାନୁ ଉନ୍‌ଡ୍ରି ମାଟା କିତାମାର୍‌ର୍ହା : ୱାରି ଆଗ୍‌ଡ଼ି ନିର୍‍ଇ ମାର୍‍ଇୱାଲେ ନାନୁ ଡାଟ୍‍ତାନ୍‍ ଇର୍‌ଆମାର୍ହା, ସାତିକାର୍‍ ମାରିଡ଼େସି ଜିନାର୍‍ ଇଜି ନାନୁ ବିସ୍‌ବାସ୍‌ କିଜିମାନିଙ୍ଗ୍‍ଁ ନେରୁ ମିବାଣ୍‍କୁ ବିସାର୍‌ ଆଜିନା ।"

22 ପେଲିକସ୍‍ ନେଗି ସାରିଦି ବିସୟ୍‌ତାନ୍‌ ନେଗେନ୍‌ କିଜି ନେସ୍‍ତିମାନିଙ୍ଗ୍‍ଁ ୱେନିସ୍‍କିନିକା ତେବା କିଜି ଇର୍ହାନ୍‌, "ସନ୍ୟରି ନେତା ଲୁସିୟା ୱାତି ୱେନ୍‌କା ନାନୁ ନି କେସ୍‍ ପୁରା କିନା ।" 23 ପାଉଲତିଙ୍ଗ୍‍ଁ ୱାନ୍‌ ତର୍‌ସୋ ଇଡ୍‍ଦେଙ୍ଗ୍‍ଁ ୱାନ୍‌ ସନ୍ୟରିଙ୍ଗ୍‍ଁ ଆଦେସ୍‌ ସିତାନ୍‌, ମାତର୍‌ ୱାନି ଉଣ୍ତିଙ୍ଗ୍‍ଁ କାପ୍‍କିନା ଡ଼ିସ୍‌ସି ୱାନି ଜାତୁନ୍‍ କିଦେଙ୍ଗ୍‍ଁ ଇଜି ୱାନି ତଡ଼୍‍କାଙ୍ଗ୍‍ଁ ସାରି ସିଦେଙ୍ଗ୍‌ ୱାନ୍‌ ଆଦେସ୍‌ ସିତାନ୍‌ ।

24 ଏସ ଦିନ୍‌ ୱେନ୍‌କା ପେଲିକସ୍‍ ୱାନି ଜିହୁଦି ଆଇମା ଦ୍ରୁସିଲାଦି ୱାଲେ ୱାତାନ୍‍, ୱାନ୍‌ ପାଉଲତିଙ୍ଗ୍‍ଁ କୁକିସ୍‍ କିଜି ଜିସୁ କ୍ରିସ୍ତମାନୁ ବିସ୍‌ବାସ୍‌ କିନି ବିସୟ୍‌ତାନ୍‌ ୱାନି ମାଟା ୱେର୍‍ଆନ୍‍ । 25 ମାତର୍‌ ଏସ୍ତିୱାଲେ ପାଉଲ ଦାର୍ମୁଦିକା, ନିଜେଦିଙ୍ଗ୍‍ଁ ନେଗେନ୍‌କିଜି ଇଡ୍‌ନିକା ମାରି ୱାନି ବିସାର୍‌ ଦିନ୍‌ ମାଟା ୱାର୍‍ଗିତାର୍‍, ପେଲିକସ୍‍ ତିଲାଜି ଇର୍ହାନ୍‌, ନିନୁ ଇଲେଇ ସନ୍‍ଡ୍ରେଙ୍ଗ୍‍ଁ ଆଟ୍‌ନି । ସୁଜୋଗ ପୟ୍‍ତିଙ୍ଗ୍‍ଁ, "ମାରି ଅର୍‍ସୁ ନିଙ୍ଗିଁ କୁକିସ୍‍କିନା ।" 26 ଆୟା ସମୟ୍‍ତୁ ପାଉଲ ୱାନିଙ୍ଗ୍‍ଁ ଏସ ଡାବୁଙ୍ଗୁଁ ସିନି ଇଜି ୱାନ୍‌ ଆସା କିତାମାର୍ହାନ୍‌, ଆଦେଙ୍ଗ୍‍ଁ ୱାନ୍‌ ଅର୍‍ସୁଦିଙ୍ଗ୍‍ ଅର୍‍ସୁ ୱାନିଙ୍ଗ୍‍ଁ କୁକିସ୍‍କିଜି ୱାନି ୱାଲେ ୱାର୍‍ଗିଦେଙ୍ଗ୍‍ଁ ଆସ୍‌ତାନ୍‌ ।

27 ଇୟାୱାଜା ରୁଣ୍ତି ବାର୍‍ସେକ୍‍ ତେବାତି ୱେନ୍‌କା ପୋର୍କିୟସ ଫେଷ୍ଟସ୍‌ ପେଲିକସ୍‍ତି ବାଡିଦୁ ସାସନକିନିକାନ୍‌ ୱାଜା ବାସେ ଆତାନ୍‍ । ପେଲିକସ୍‍ ଜିହୁଦିଲୋକା ୱେଡ଼ିକା ପୟ୍‌ନି ଉଣ୍ତିଙ୍ଗ୍‍ଁ ଲାଲାୟ୍‍ ମାନିଙ୍ଗ୍‍ଁ ପାଉଲତିଙ୍ଗ୍‍ଁ ଡ଼ିସ୍‍ଏଣ୍ତା ଜଇଲ୍‌ତୁ ଡ଼ିସ୍‍ତା ସର୍ହାନ୍‍ ।