1 ଇୟା ସମୟ୍‍ତୁ ସାଉଲ ପ୍ରବୁଦି ସିସୁରିଙ୍ଗ୍‌ କାତ୍‍ତେଙ୍ଗ୍‍ ଇଜି ଆଦ୍‌ରିସ୍‌ କିଜି ପେରି ଜାଜକଦି ଲାକ୍‌ତୁ ସର୍ହାନ୍‍ । 2 ମାରି ଦାମାସ୍‍କସ୍‍ତି ପାର୍‍ତନାକିନି ଇଲ୍‌କାଙ୍ଗ୍‌ ପ୍ରବୁଦି ୱାଲେ ବୁଲାନିୱାରିଙ୍ଗ୍‍ ପୟ୍‌ତିଙ୍ଗ୍‌ ତର୍‌ସି ଜିରୁସାଲାମ୍‍ତୁ ଆସ୍‌ସି ତାତେଙ୍ଗ୍‌ ଇଜି ପେରି ଜାଜକରି ମାଣାନ୍‌ ସାରି ସିନି ଆକୁ ଲୋସ୍‍ତାନ୍‍ ।

3 ସାଉଲ ଦାମାସ୍‍କସ୍‍ ଗାଡ଼୍‌ ଲାକ୍‌ତୁ ଇଗା ସନି ସମୟ୍‍ତୁ ଦାପ୍ରେ ବାଦଡ଼୍‍ତାନ୍‍ ଉନ୍‍ଣ୍ତ୍ରି ଜାୟ୍‌ ୱାନି ସାରିବେଡ଼୍‍ତି କାସ୍‍ସି ନିଙ୍ଗିଁତାତ୍‍ । 4 ୱାନ୍‌ ବୁମିଦୁ ଆର୍‍ତାନ୍‍ ମାରି ଉନ୍‍ଣ୍ତ୍ରି ବଲ୍ ୱେର୍‍ଆନ୍‍, "ସାଉଲ ! ସାଉଲ ! ନିନ୍‌ ଏନ୍ଦା ନାଙ୍ଗିଁ ତାଡ଼ନା କିଜିନି ?"

5 ୱାନ୍‌ ଇର୍ହାନ୍‌, "ପ୍ରବୁ, ନିନ୍‌ ଏନ୍‌ ?" ମାରିଡ଼େସି ଆୟା ବଲ୍ ୱାତାତ୍‍, "ନିନ୍‌ ଏଙ୍ଗ୍‍ଁ କାସ୍ଟୁ କିଜିନି, ନାନ୍ ଆୟା ଜିସୁ । 6 ନିଙ୍ଗ୍‍ଆ, ଗାଡ଼୍‌ତୁ ସାଙ୍ଗ୍ଆ, ଇନିକା କିଦେଙ୍ଗ୍‌ ଆନାତ୍‌, ଆବେ ନିଙ୍ଗିଁ ୱେର୍‌ନା ସିନା ।"

7 ସାଉଲତି ୱାଲେ ଅର୍‌ସେ ସନିକାର୍‍ କାବାଆଜି ତେବାତା ସର୍ହାର୍‍; ୱାର୍‌ ଆୟା ବଲ୍ ୱେର୍‌ଆର୍‌, ମାତର୍‌ ଏଙ୍ଗ୍‌ ସୁଡ଼ୁଦେଙ୍ଗ୍‍ ଆଟ୍‌ଏତାର୍‌ । 8 ସାଉଲ ବୁମିଦାନ୍‌ ନିଙ୍ଗ୍‍ଜି କାଣୁକୁ ରେତାନ୍‍, ମାତର୍‌ ୱାନିଙ୍ଗ୍‌ ଇନିକା ତର୍‍ଏତାତ୍‍ । ଆବେଟ୍‌ ୱାର୍‌ ୱାନି କିୟୁ ଆସ୍‌ସି ଦାମାସ୍‍କସ୍‍ ସାନ୍ଦି ସାରି ତର୍‌ସି ଅତାର୍‌ । 9 ମୁନେନ୍‌ ସାନ୍ଦି ୱାନ୍‌ ସୁଡ଼ୁଦେଙ୍ଗ୍‌ ଆଟ୍‍ଏତାନ୍‍ ମାରି ଆୟା ସମୟ୍‍ତୁ ଉଣୁଏତାନ୍‍ ।

10 ଦାମାସ୍‍କସ୍‍ତୁ ହନନିୟ ଦର୍‌ତି ଅରେନ୍‌ ସିସୁ ମାର୍ହାନ୍‍ । ୱାନ୍‌ ଉନ୍‍ଣ୍ତ୍ରି ଦର୍ସନ୍‍ ପୟ୍‌ତାନ୍‌, ପ୍ରବୁ ୱାନିଙ୍ଗ୍‌ ଇର୍ହାନ୍‌, "ହନନିୟ !"

ୱାନ୍‌ ଇର୍ହାନ୍‌, "ଏ ପ୍ରବୁ ଇନ୍‌ଆଁ ।"

11 ପ୍ରବୁ ଇର୍ହାନ୍‌, "ତିଆର୍‌ ଆଆ । ସିଦା ଦର୍‌ତି ପେରିଜାରି ଆସ୍‌ସି ଜିହୁଦାଦି ଇଲୁଦୁ ସାଙ୍ଗ୍ଆ । ଆବେ ତାର୍ସସ୍‍ତାନ୍‍ ୱାତିମାନି ସାଉଲ ଦର୍‌ତି ଅରେନ୍‌ ଲୋକ୍‌ତିଙ୍ଗ୍‌ ପୟ୍‍ଆ । ୱାନ୍‌ ପାର୍‌ତନା କିଜିନାନ୍‍ । 12 ହନନିୟ ଦର୍‌ତି ଅରେନ୍‌ ଲୋକୁ ୱାଜି ୱାନି ମୁସ୍‌କୁ କିୟୁ ଇଟ୍‌ତିଙ୍ଗ୍‌, ୱାନ୍‌ କାଣୁକୁ ସୁଣାନ୍‌ ଇଜି ଦର୍ସନ୍‍ ପୟ୍‌ତାମାନାନ୍‌ ।"

13 ହନନିୟ ଇର୍ହାନ୍‌, "ପ୍ରବୁ, ଇୟା ଲୋକୁ ଜିରୁସାଲାମ୍‍ତୁ ନି ବିସ୍‍ବାସି ଲୋକା ଉଣ୍ତିଙ୍ଗ୍‌ ଏମେ କାସ୍ଟୁଦି ପାଣି ୱିଜୁ କିତାମାନାନ୍‍, ଆୟା ବିସୟ୍‌ତାନ୍‌ ନାଣ୍ତ ଲୋକୁ ନାଙ୍ଗିଁ ୱେର୍‍ତାମାନାର୍‍ । 14 ମାରି ୱାନ୍‌ ପେରି ଜାଜକରି ମାଣ୍‌କୁ ଅଦିକାର୍‌ ଆକୁ ତାସି, ଦାମାସ୍‍କସ୍‍ତୁ ନି ପାର୍‌ତନା କିନିୱାରିଙ୍ଗ୍‍ ଆସ୍‌ସି ଅତେଙ୍ଗ୍‌ ଇଜି ୱାତାମାନାନ୍‍ ।"

15 ପ୍ରବୁ ୱାନିଙ୍ଗ୍‌ ଇର୍ହାନ୍‌, "ସାଙ୍ଗ୍ଆ, ଅଣଜିହୁଦି ମାରି ରାଜା ମାରି ଇସ୍ରାଏଲ୍‌ତି ଲୋକା ଆଗ୍‌ଡ଼ି, ନା ଦର୍‌ ୱେର୍‌ତେଙ୍ଗ୍‌ ଇଜି ମାରି ନା ସେବା କିଦେଙ୍ଗ୍‌ ନାନ୍ ୱାନିଙ୍ଗ୍‌ ଆସ୍‍କିତାମାନା । 16 ନା ଉଣ୍ତିଙ୍ଗ୍‌ ୱାନ୍‌ ଏମେ ଦୁଃକ୍‌ ପୟ୍‌ନାନ୍‌, ନାନ୍ ନିଜେ ୱାନିଙ୍ଗ୍‌ ୱେର୍‌ନା ।"

17 ହନନିୟ ସର୍ହାନ୍‍, ସାଉଲ ମାନି ଇଲୁଦୁ ଡ଼ୁଗୁଜି ୱାନି ମୁସ୍‌କୁ କିୟୁ ଇଟ୍‌ତାନ୍‌ । ୱାନ୍‌ ଇର୍ହାନ୍‌, "ତଡ଼ାନ୍‌କୁ ସାଉଲ, ଇବେ ୱାନି ସାରିଦୁ ଏମେ ପ୍ରବୁ ଜିସୁ ନିଙ୍ଗିଁ ଦର୍ସନ୍‍ ସିତାନ୍‌, ୱାନ୍‌ ନାଙ୍ଗିଁ ପକ୍‍ତାମାନାନ୍‍, ଏଣ୍ତେସ୍‌ମାରି ଡ଼େସି ନିନ୍‌ କାଣୁକୁ ସୁଡ଼୍‍ଦେଙ୍ଗ୍‍ ଆଟ୍‌ନି ମାରି ପବିତ୍ର ଆତ୍ମାଦୁ ପୁରା ଆନି ।" 18 ଆୟାଦାପ୍ରେ ସାଉଲତି କାଣ୍‍କାଣ୍‍କୁ ମିନିଦି ସପା ୱାଜା ଏସ ଆର୍‍ତେ ମାରି ୱାନ୍‌ ମାରିଅରର୍ସୁ ସୁଡ଼୍‍ଦେଙ୍ଗ୍‍ ଆଟ୍‍ତାନ୍‍ । ୱାନ୍‌ ନିଙ୍ଗ୍‍ଜି ଡୁବନ୍‌ ଅତାନ୍‌ । 19 ମାରି ଉଣୁଜି ସାକ୍ତି ପୟ୍‌ତାନ୍‌ । ସାଉଲ ସିସୁରି ୱାଲେ ଦାମାସ୍‍କସ୍‍ତୁ ଏସ ଦିନ୍‌ ତେବାତାନ୍‌ ।

20 ୱାନ୍‌ ସିଦା ପାର୍‍ତନାକିନି ଇଲ୍‌କାଙ୍ଗ୍‌ ସଲ୍‍ସି, ଜିସୁ ଜେ ମାପୁରୁଦି ମାରିସି, ଇୟା ମାଟା ପ୍ରଚାର୍‌ କିଦେଙ୍ଗ୍‌ ଆସ୍‌ତାନ୍‌ ।

21 ଏମେକାର୍‌ ୱାନି ମାଟା ୱେର୍‌ଆର୍‌, ୱାର୍‌ କାବାଆଜି ୱେନ୍‌ବାତାର୍‌, "ଜିରୁସାଲାମ୍‍ତୁ ଜିସୁ ଦର୍‌ତି ଲୋକ୍‌ତି ପାର୍‌ତନା କିନିୱାରିଙ୍ଗ୍‍ ଏମେ ଲୋକୁ କାତ୍‍ସି ମାର୍ହାନ୍‍, ଇକାନ୍‌ ଇନିକା ଆକାନ୍‍ ଆଏନ୍‌ ନୋ ? ୱାରିଙ୍ଗ୍‌ ପେରି ଜାଜକରି ଲାକ୍‌ତୁ ଆସ୍‌ସି ଅନି ଉଦେସ୍‍ତାନ୍‍ ୱାନ୍‌ ଇନିକା ଇବେ ରେଏନ୍‌ ମାର୍ହାନ୍‍ ନୋ ?"

22 ମାତର୍‌ ସାଉଲ ପ୍ରଚାର୍‌ ନାଣ୍ତ ସାକ୍ତି ମାର୍ହାତ୍‌, ଜିସୁ ଜେ ମସିହ, ଇୟା ବିସୟ୍‌ତାନ୍‌ ୱାନି ପାର୍‌ମାଣ୍‌ ନିସା ଜିଦ୍‌ ମାର୍ହାତ୍‍ ଜେ ଦାମାସ୍‍କସ୍‍ତୁ ବାସାଜି ମାନି ଜିହୁଦିର୍‌ ୱାନି ଇନି ମାଟାଦି ଉତର ସିଦେଙ୍ଗ୍‍ ଆଟ୍‍ଏର୍‍ ମାର୍ହାର୍‌ ।

23 ✝ନାଣ୍ତ ଦିନ୍‌ ଆତି ୱେନ୍‌କା ଜିହୁଦିର୍‌ ଉଣ୍ତାଜି ସାଉଲତିଙ୍ଗ୍‍ ଡାକ୍‍ତେଙ୍ଗ୍‍ଁ ଇଜି ଉପାୟା କିତାର୍‍, 24 ମାତର୍‌ ସାଉଲ ୱାରି ଉପାୟ୍ ନେସ୍‌ତେଙ୍ଗ୍‌ ଆଟ୍‍ତାନ୍‍ । ୱାନିଙ୍ଗ୍‌ କାତ୍‍ତେଙ୍ଗ୍‍ ଇଜି ୱେଡ଼େ ନାଡ଼ା ୱାର୍‌ ଗାଡ଼୍‌ତି ଦୁଆର୍‍ ୱିଜୁ କାପ୍‌କିଜି ତେବାତାର୍‌ । 25 ମାତର୍‌ ଅର୍‍ଲେନ୍‍ ନାଡ଼ା ସାଉଲତି ସିସୁର୍‍ ୱାନିଙ୍ଗ୍‌ ଉନ୍‍ଣ୍ତ୍ରି ଦାଉଣିକାଦୁ ଇଡ୍‌ଜି ଗଡାଦି ଉନ୍‍ଣ୍ତ୍ରି ରେଆତି ସାରି ସିଜି ଆଡ୍‍ଗି ରେପ୍‍ତା ସିତାର୍‍ ।

26 ସାଉଲ ଜିରୁସାଲାମ୍‍ତୁ ସଲ୍‍ସି ସିସୁରି ୱାଲେ ମିସାଦେଙ୍ଗ୍‍ ସେସ୍ଟା କିତାନ୍‌ । ମାତର୍‌ ୱାନ୍‌ ସିସୁ ଇଜି ୱାର୍‌ ମୁଟେ ବିସ୍‌ବାସ୍‌ କିଏତାର୍‌ । ୱିଜେରେ ୱାନିଙ୍ଗ୍‌ ତିଲାଜି ମାର୍ହାର୍‌ । 27 ମାତର୍‌ ବର୍ଣ୍ଣବା ୱାନିଙ୍ଗ୍‌ ପ୍ରେରିତ ସିସୁରି ଲାକ୍‌ତୁ ଅସି ଦାମାସ୍‍କସ୍‍ ସାରିଦୁ ସାଉଲ ଏଣ୍ତେସ୍‌ ପ୍ରବୁଦି ଦର୍ସନ୍‍ ପୟ୍‍ତାମାର୍ହାନ୍‍ ମାରି ପ୍ରବୁ ଏଣ୍ତେସ୍‌ ୱାନିଙ୍ଗ୍‌ ମାଟା ଇର୍ହାମାର୍ହାନ୍‌, ଇୟାୱିଜୁ ବିସୟ୍‌ ୱାରିଙ୍ଗ୍‌ ବୁଜାକିଜି ଇର୍ହାନ୍‌ । ଦାମାସ୍‍କସ୍‍ତୁ ଜିସୁଦି ଦର୍‌ତାନ୍‌ ସାଉଲ ଏଣ୍ତେସ୍‌ ତିଲାଏଣ୍ତା ପ୍ରଚାର୍‌ କିତାମାର୍ହାନ୍‌, ୱାରିଙ୍ଗ୍‌ ନେଗେନ୍‌ କିଜି ବୁଜାକିଜି ଇର୍ହାନ୍‌ । 28 ଇୟା ୱେନ୍‌କା ସାଉଲ ପ୍ରେରିତ ସିସୁରି ୱାଲେ ତେବାତାନ୍‌ ମାରି ଜିରୁସାଲାମ୍‌ତି ସାରିବେଡ଼୍‍ତି ସଲ୍‍ସି ସାହାସ୍‍ତାନ୍‍ ପ୍ରବୁଦି ଦର୍‌ତାନ୍‌ ପ୍ରଚାର୍‌ କିତାନ୍‌ । 29 ଇୟାୱିଜୁ ବିସୟ୍‌ତାନ୍‌ ୱାନ୍‌ ଗ୍ରିକ୍‍ ବାସାଦି ଜିହୁଦିର୍‌ ୱାଲେ ବା ଆସ୍‌ସିସାତାର୍‌, ମାତର୍‌ ୱାର୍‌ ୱାନିଙ୍ଗ୍‌ ଡାକ୍‍ତେଙ୍ଗ୍‍ଁ ସେସ୍ଟା କିତାର୍‍ । 30 ବିସ୍‍ବାସି ତଡ଼ାନ୍‌କୁ ଇୟା ମାଟା ନେସ୍‌ସି; ସାଉଲତିଙ୍ଗ୍‍ କାଇସରିଆଦୁ ଅତାର୍‌ ମାରି ଆବେଣାନ୍‍ ୱାନିଙ୍ଗ୍‌ ତାର୍ସସ୍‍ତୁ ପକ୍‌ତାର୍‌ ।

31 ଜିହୁଦା, ଗାଲିଲି ମାରି ସମିରୋଣଦୁ ମାନି କ୍ରିସ୍ଟିୟାନ୍‍ ମଣ୍ତଲିଙ୍ଗାଁ ଉଣ୍ତିଙ୍ଗ୍‌ ଆୟା ସମୟ୍‍ତି ଦିନ୍‌ ସାନ୍ତି ମାର୍ହାତ୍‌, ମାରି ପବିତ୍ର ଆତ୍ମାଦି ସାକ୍ତିଦାନ୍ ୱାରି ଲୋକୁ ନାଣ୍ତ ଆତାର୍‌ ମାରି ୱାର୍‌ ଡାଟ୍‍ ଆତାର୍‌ । ବିସ୍‍ବାସିର୍‍ ପ୍ରବୁଦି ଉଣ୍ତିଙ୍ଗ୍‌ ମାନାଜି ଜିବନ୍‌ କାଟେ କିତାର୍‍ ।

32 ପିତର ନାଣ୍ତ ଜାଗେଆଙ୍ଗ୍‍ଁ ବୁଲାଜି ବୁଲାଜି ଅର୍‍ଲେନ୍‍ ଲୁଦାଦୁ ବାସାଜିମାନି ବିସ୍‍ବାସିରି ଲୋକାଙ୍ଗ୍‌ ମିସାଦେଙ୍ଗ୍‍ ୱାତାନ୍‌ । 33 ଆବେନୁ ଏନିୟ ଦର୍‌ତି ଅରେନ୍‌ ଲୋକ୍‌ତିଙ୍ଗ୍‌ ବେଟ୍‍ବୁଡ଼ାତାନ୍ । ୱାନ୍‌ କୁସ୍ଟ ରୋଗ୍‍ତୁ ଆସାଇ ଆଜି ଆଟ୍‍ଗୋଟା ବାର୍ସେକ୍‍ ଆସ୍‌ସି କାଟେଲ୍‍ତାନ୍‍ ନିଙ୍ଗ୍‍ଁଦେଙ୍ଗ୍‍ ଆଟ୍‌ଏଜି ମାର୍ହାନ୍‍ । 34 ପିତର ୱାନିଙ୍ଗ୍‌ ଇର୍ହାନ୍‌, "ଏନିୟ, ଜିସୁ କ୍ରିସ୍ତ ନିଙ୍ଗିଁ ନେଗେନ୍‌ କିତାମାନାନ୍‍ । ନିଙ୍ଗ୍‍ଁଆ, ନି ଟାଟି ରସ୍‍ଆ ।" ଆୟାଦାପ୍ରେ ଏନିୟ ନିଙ୍ଗିଁତାନ୍‍ । 35 ଇକା ସୁଡ଼୍‌ଜି ଲୁଦା ନି ସାରୋଣଦୁ ବାସାକିଜିମାନି ଲୋକୁ ୱିଜେରେ ପ୍ରବୁଦି ଲାକ୍‌ତୁ ଡ଼େସି ୱାତାର୍‌ ।

36 ଜପାଦୁ ଟବିତା ଦର୍‌ତି ଅରେତ୍‌ ବିସ୍‍ବାସିନି ଆଇମା ବାସାଜି ମାର୍ହାତ୍‌ । ତାନି ଗ୍ରିକ୍‌ ଦର୍‌ ଦର୍କାସ୍‍ ଅର୍ତାତ୍‍ "ବନ୍‍ ଗରିଆ" ମାର୍ହାତ୍‌ । ୱାଦ୍‌ ତାନି ୱିଜୁ ସମୟ୍ ନେଗି ପାଣିଦୁ ମାରି କାକୁର୍ତି ଲୋକାଙ୍ଗ୍‌ ସେବା କିନିମାନି ସମୟ ସିଜି ମାର୍ହାତ୍‌ । 37 ଆୟା ସମୟତୁ ନବ୍‌ ଆଜି ୱାଦ୍‌ ସାତା ସର୍ହାତ୍‍ । ତଡ଼୍‍କୁ ତାନି ମେନ୍ଦଲ୍‍ତିଙ୍ଗ୍ ଇବିସ୍‍ କିଜି ମୁସ୍‌କୁରି ମହଲାଦୁ ତେରେପ୍‍ତେ । 38 ଜପା ଲୁଦାଦାନ୍‍ ଆକ ସିଲେତାତ୍‍ । ପିତର ଲୁଦାଦୁ ମାନାନ୍‌ ଇଜି ୱେନ୍‌ଜି, ଜପାଦୁ ମାନି ବିସ୍‍ବାସିର୍‍ ରିଏର୍‌ ଲୋକାଙ୍ଗ୍‌ ୱାନି ଲାକ୍‌ତୁ ଇନ୍‌ଞ୍ଜି ପୋକ୍‌ତାର୍‌, "ଦୟା କିଜି ବେଗି ମା ଲାକ୍‌ତୁ ରାଆ ।" 39 ପିତର ତିଆର୍‌ ଆଜି ୱାରି ୱାଲେ ସର୍ହାନ୍‍ । ଆବେ ଇତି ଦାପ୍ରେ ଲୋକୁ ୱାନିଙ୍ଗ୍‌ ମୁସ୍‌କୁରି ମହଲାଦୁ ଅତାର୍‌ । ଆବେ ରାଣ୍ତିଆଇମେକ୍‍ ତାନିଙ୍ଗ୍‌ କେର୍‍ବିତେନ ଆଡ଼୍‌ବାଜି ଆଡ଼୍‌ବାଜି ଦର୍କାସ୍‍ ଜିଜିମାନି ୱାଲେ ଗୁତ୍‍ତି ମାର୍‍ଇ ଆଙ୍ଗିଁଙ୍ଗ୍‌ ମାରି ୱାତିଙ୍ଗ୍‍ୱିଜୁ ୱାନିଙ୍ଗ୍‌ ତର୍‍ତେ । 40 ପିତର ୱିଜେରିଙ୍ଗ୍‍ ବାକ୍‍ରାଦାନ୍‍ ଆତ୍ରେ ସପ୍‍ତାନ୍‍ ମାରି ମେଣ୍ତେଙ୍ଗ୍‍ଁ ଗଟ୍‌କିଜି ପାର୍‌ତନା କିତାନ୍‌ । ତାନିୱେନ୍‍କା ୱାନ୍‌ ଦାର୍କାସ୍‍ତି ସାତି ମେନ୍ଧଲ୍‍ ତରିନ୍‌ ସୁଡ଼୍‌ଜି ଇର୍ହାନ୍‌, "ଟବିତା, ନିଙ୍ଗ୍‍ଁଆ !" ଦର୍କାସ୍‍ କାଣୁକୁ ରେତାତ୍‍ ମାରି ପିତରତିଙ୍ଗ୍ ସୁଡ଼୍‌ଜି ନିଙ୍ଗ୍‍ଜି ବାସ୍‌ତାତ୍‌ । 41 ପିତର କିୟୁ ପେର୍‌ଜି ତାନିଙ୍ଗ୍‌ ଜିବନ୍‌ କିଜି ନିକ୍‍ତାନ୍‍ । ୱେନ୍‌କା ଉଣ୍ତାତି ମାର୍‍ଇ ୱିଜୁ ବିସ୍‍ବାସି ନି ରାଣ୍ତିଆଙ୍ଗ୍‍ଁ କୁକ୍‌ସି ଦର୍କାସ୍‍ତିଙ୍ଗ୍‍ ୱାରି କିୟୁଦୁ ସର୍ପେ କିତାନ୍‌ । 42 ଇୟା କାବୁର୍‌ ଜପାଦି ୱିଜୁ ତରିନ୍‌ ୱେଙ୍ଗିଁତାତ୍‌ ମାରି ନାଣ୍ତ ଲୋକୁ ପ୍ରବୁଙ୍ଗ୍ଁ ବିସ୍‌ବାସ୍‌ କିତାର୍‍ । 43 ପିତର ନାଣ୍ତ ଦିନ୍‌ ସାନ୍ଦି ଜପାଦୁ ସିମୋନ ଦର୍‌ତି ଅରେନ୍‌ ତଲ୍‍କୁପାଣିକିନି ଇଲ୍‌ତୁ ତେବାତାନ୍‌ ।