1 ఇద్ ఐగుప్తుంఙ్ దెసెముంఙ్ బదొల్ దెయ్యంనె ఇడెకద్. ఓలుర్! యెహోవాక్ లఙ్ జల్ది తులెకా డమ్మన్ పొయ్ సొయ్ కల్సా ఐగుప్తుతుంఙ్ వర్సనంసంద్. ఐగుపతు ముర్తిక్ కన్కెర్సా. ఐగుప్తులమందినె గుండే జిరాయ్సా. 2 అన్ ఐగుప్తు మందింఙ్ వ్యతిరెకంగా ఐగుప్తు మందిన్ రెప్సత్. దదాకున్ వ్యతిరేకంగా దాదక్ మరోక్కోరడ్ వ్యతిరేకంగా మర్కోకొద్ పోరాటం కల్సంద్. పటనమడ్ పట్నం. దెసెంపొదె దెసం లాడయ్ కల్సంద్. 3 ఐగుప్తు ప్రజల ఆత్మబలం మప్ కల్సాద్. అనె ఔరు విచారున్ నాస్ కల్సార్. జంన్వలున్ విచారుఙ్ సటి మూర్తిక్ మెరా, ఆత్మలడ్ ముడెకా జంన్వలున్ అందవ్ దెలక్ అనేకారుఙ్ ఔరంతిఙ్ సోదే ఇడ్డేకారతిఙ్ సేద్దిన్. 4 "అన్ ఐగుప్తు మందిన్ గులెన విరొద్త మన్కకెరె కెయ్యుత్ సియ్సాత్. బర్బత్ కల్లెక రాజు ఔరున్ అడ్గిప్తెంద్." ఇద్ సేనలె ప్రబుంద్ ఇన్నెక యెహోవాక్ ఇదరెకా కబుర్. 5 సందుర్త ఈర్ ఇగుర్సద్. పెనిక్ ఇగుర్తె. 6 పెనిక్తన ముర్కి కంప్ వర్సద్. ఐగుప్తు తులెకా తులుత్ తిరుత్ అర్సా. సెరువులె కుంట అర్సా. రెల్లూ, తుంగా గడ్డి అర్సాద్. 7 నైలుపేని మెర, పేని మెరమెర అనేక రెల్లు చెట్లు పురా, నైలునదీ మెరత ప్రాతమూ మొలప్తా పోలా పూర అర్తేవ్ దుమరామ్ కోస్సంద్. 8 జాలరులు అర్సర్. బాదపడ్సర్. నైలునది ఈరడ్ గలమ్ తప్పేకా ఔరు సదర్ దుక్కమడ్ అనయ్ పెనిత్ జార్ తప్పుత్ ఔరు సుమ్మసార్. 9 నూల్కులున్ పుసెకర్ నూలువడ్ అల్తా పని కలెకర్ ఔరు, తేల్లోడి జుఙ్ఙె కలేకర్ ఔరు దుక్కపడ్సర్. 10 గుప్తులొ నూల్త పనిక్ కత్ ఔరు సదర్ సిమ్రిల్సర్. కూల్కడ్ పని కత్ ఇదరేకర్ సదర్ కుబ్ దుక్ పడ్సార్. 11 సోయనె దెసెంతర్ అదిపతులు బొత్తిగా మూర్కకెర్. రాజునతి అనేక ఉపయున్ ఇడెకార్ సదరుఙ్ ఎనా అమ్దు సితా సలహా మూతితోసేటంద్ లఙ్ కన్కేర్సంద్. రాజునడ్ "అనీ గ్యని కీకెనాన్. అన్ తొలెనీత కాలముత్ రాజుల పడితార్ లన్" ఇస నీవ్ ఎనఙ్ ఇడ్సాతీ? 12 ఇనే గ్యనుల్ ఎతి అండర్? సేనల ప్రబువెద్ద యెహోవా ఐగుప్తును వాలడ్ నిర్నయ్ కతదున్ ఔరున్ ఇడ్డేఙ్ ఇడ్. 13 సోయను అదిపతిక్ పిసకేర్. నోపు పటన అదిపతిక్ పిసకేర్ ఎద్దేర్. ఐగుప్తు మందిన్ మూల కంబాలఙ్ అనేక నీర్ ఐగుప్తుతరుఙ్ పావ్ బులిప్తేర్. 14 యెహోవా ఔరున్ విచరుఙ్ బద్లిప్తెకా ఆత్మన్ ఔరు మాన్నుత్ ఇడుత్. జిఙానడ్ ఉఙ్ఙెకార్ ఉనేకాద్ తనె మగుడ్సా నొలఙ్తెత్తి ఐగుప్తు తార్ ఇదరేక పని అతి ఔరు అదున్ పావ్ బులిప్తేర్. 15 తల్ ఎనా తోక ఎనా తాటి మట్ట ఎద్ద రెల్లయిన ఐగుప్తున్ సటి ఎరీ ఇదరేకద్ తనేదీ తోతేద్.

16 ఆ దినం ఐగుప్తు మందిసదర్ పిల్లక్ లఙ్ అన్సార్. సేనల ప్రబువు ఎద్ద యెహోవా ఔరున్ పోదె తనె కెయ్ ఎత్సంద్. అదున్ కారణంమడ్ ఔరు అర్రీఙ్ అర్సుత్ వడక్సర్. 17 ఐగుప్తు అదైర్య పడెకాదుఙ్ యూదాదేసం కారనం ఎర్సంద్. తమ్మున్ విరోదిక్ యెహోవా విచారడ్ ఔరు యూదా దేసం ఇంతే అర్రిఙ్ అరింఙ్ అర్సుత్ సెసర్. 18 ఆ దినం కనాను బాషతర్ మూడేకా పట్నంతర్ ఐద్ ఐగుప్తు దేసలత్తి అన్సావ్. అ పట్నంతా మంది "అమ్ సేనల ప్రబువు యెహోవ మంది" ఇస కీరపుడుక్సర్. ఈ పట్నముత్ ఒక్కోదున్ "నాసనపురం" ఇస కుగ్సర్. 19 ఆ దినం ఐగుప్తు దేసం నడుమున్ యెహోవాకు ఒక బవ్ సియెక బొల అన్సంద్. అదున్ బాందీ యెహోవాకుంఙ్ సియెక గుండ్నె కంబు ఒక్కొద్ అన్సాద్. 20 అద్ ఐగుప్తు దేసెముత్ సేనల ప్రబువు ఇనెక యెహోవాకుంఙ్ ఒక్కొ గుర్తు, సాక్సిలంఙ్ అన్సద్. ఔరు తమున్ కుడ్కెకరున్ బదొల్ యెహోవాకుంఙ్ స్తుతి కలేఙ్ అమ్దు ఔరుంఙ్ సాటి బలంతద్ ఇనెక ఒక్కొ పన్కసాంద్.అమ్దు ఔరున్ సాయ్గల్సాంద్. 21 ఐగుప్తు మందిన్ యెహోవా తన్నేత్ ఓర్కిపర్సంద్. ఆ దినం ఐగుప్తు మంది యెహోవాన్ ఓర్కిల్సర్. ఔరు అమ్నున్ బవులాడ్, కానుకలడ్ ఆరాదిసార్. యెహోవా మొక్కుత్నా ఆ మొక్ కడిప్సర్. 22 యెహోవా ఔరున్ కొడప్సర్. ఔరున్ కొడపుత్న మల్ల సోయ్ కల్సంద్. ఔరు యెహోవా వై తిరుగ్సర్. అమ్దు ఔరె ప్రార్ధన విన్తు ఔరున్ సుదిరిప్సంద్. 23 ఆ దినం ఐగుప్తు దేసం తనా అస్సూరు దేసామున్ ఒకొ రాజున్ పావ్ అన్సంద్. అస్సూరు మందిన్ ఐగుప్తుకీ, ఐగుప్తు మంది అస్సూరు వర్సా సేస అన్సంద్. ఐగుప్తు మంది అస్సూరు మందినడ్ కలయుత్న యెహోవాన్ ఆరాదిస్తారు. 24 ఆ దినం ఐగుప్తు, అస్సూరు లడ్ ఇస్రాయేలు ముడవా తరం బూమి పొదే ఆసీర్వాద కారకంగా అన్సంద్. 25 సేనల ప్రబువు ఎద్ద యెహోవా ఔరున్ అసిర్వద సియుత్ ఇనఙ్ ఇసంద్. "అనే మంది, అనే సంపదన ఎద్ద ఇస్రాయేలు మంది అసిర్వద ఎక్దర్ తా."