1 యెహోవానె కెయ్ వాగిపెన్ సాల్సెట నిరసం ఎరెతీన్. అమ్నే కెవ్వు వినెఙ్ సల్సేట ఎరెతేవ్. ఇమే పాపు ఇమ్మున్ ఇమే దేయ్యమున్ అడ్డం వత్తేవ్. 2 ఇమే పాపు అమ్నే మొకం ఇమ్ముఙ్ కన్కేర్సెట కత్తెద్. అదుఙి అమ్దు వినేతేంద్. 3 ఇమే కెయ్య నేత్తురడ్ ఇమే వేందే పాపులడ్ డాగుల్ ఎద్దే. ఇమే పెదవే పైలి మూడ్సవ్. ఇమే నాల్క రగ్గడ్ మూడ్సంద్. 4 ఎన్దీ న్యాయంగా తిర్పు కలేతెర్. ఎన్దీ నిజాయితీనడ్ తనే తిర్పు వినిపేతేంద్. ఔరెవొట గోట్టికున్ నమ్ముత్ పైలి ఇడ్సర్. కరబ్నడ్ ఇంది పనలక్ ఎత్న పాపామున్ పుట్టిప్సర్. 5 ఔరు విసం అనేక పామ్ సంకులున్ పోర్స. సాలెగూడు కల్సవ్. ఆ సంకు తినేకర్ తిక్సర్. ఒకో వేల సంకు ఓడ్తే విసం అనేక పామ్ వాక వర్సంద్. 6 ఔరె సాలే తుప్ప జుఙ్ఙె ఇడేకదుఙ్ పనిక్ సియేవ్. ఔరు ఇట్టవున్ ఎరీ పొర్కేర్. ఔరు పాపిష్టి పనిక్. పాపము ఔరె కెయ్యుత్ అండవ్. 7 ఔవ్రే గెట్ట పాపం కలెకాదుఙ్ తూల్సవ్. పాపు తొసెటర్ నేత్తురున్ సప్పేకదున్. ఔరె విచర్ పాపిష్టి విచరడ్. ఔరె పావు పాపు, నాస్. 8 సాంతి పావ్ ఔరున్ ఓర్కితోద్. ఔరె అడ్గేకద్ న్యాయ్ కన్కేరెద్. ఔరు వంకర పావ్ తర్ లఙ్ కన్కకెర్సర్. ఆపావుత్ అడ్గేకర్ ఔరుఙ్ సాంతి అనేద్.

9 అదుఙి న్యాయం అమ్ముఙ్ దౌ అండద్. నీతి అమ్మున్ రోబడ్సా తోతేద్. వేలుఙ్ సటి అమ్ కీరవ్సనండతుమ్ గనీ పూర చిర్మనయ్ అండద్. వెలుఙ్ సటి ఓల్సతూమ్, గనీ చికటితి ఆడ్గసాతుమ్. 10 గోడలుఙ్ సటి గుడ్డిక్ లఙ్, కన్లు తోసెటర్ ఔరు లఙ్ తూలడ్సతుమ్. మసక చీకటి ఎద్దె దుప్పరిత వేలఙ్ జారన్ తూలుత్ రాలతుమ్. బత్కతరున్ నడుమున్ అమ్ తిక్తా ర్లఙ్ అండతుమ్. 11 అమ్ గుడ్డి లఙ్ బొబ్బలిప్తమ్. పారెవా లాన మూల్గసాతుమ్ న్యాయముఙ్ సటి ఓల్సతుమ్, గనీ అద్ రోబడ్స తోతేద్. సుటిన్ సటి ఓల్సతుమ్ గనీ అద్ అమ్మున్ దౌ అండద్. 12 అమే అక్రమాలున్ ఇనే ముడట్ అండవ్. అమే పాపము అమ్మున్ పొదే సాక్సం ఇడ్సంద్. అమే అక్రమాలు అమ్ముఙ్ కన్కేర్సవ్. అమే పాపము అమ్ముఙ్ ఓర్కీ. 13 యెహోవానె గొట్టిన్ విసెట నేండె దెయ్యం తన కురితమ్ తిరుగుత్ పట్టం. పాపము కత్తమ్ గొట్టి విసెట మదత్ సియెమ్. పైలిక్ గుల్గెక మాన్నుత్ ఇట్టమ్. 14 న్యాయాన్ని వెన్కవై సయుత్. నీతిన్ దౌ కత్తేద్. సత్యం అడ కట్టుత్ అండద్. నిజాయితీన్ లోప వరేతిన్. 15 ఇనే ఇమన్దరి ఎదే సెద్దిన్. పాపలున్ ఓలేకంద్ డొంఙ ఎర్సద్. న్యాయం ఎర్సేటండే ఓలుత్న యెహోవా కుబ్ బాద పడ్సంద్.

16 మందిఙ్ సటి వినత్తి కలేకద్ ఎన్ది తోసేట ఓలుత్న అమ్దు కమల్ ఎద్దేంద్. అదుఙి అమ్దు సోంత మన్ అమ్నుఙ్ సియుత్. అమ్దు నీతిన్ అమ్నున్ ఇల్పతేంద్. 17 నీతిన్ తొడుపు లఙ్ అమ్దు తోట్టెంద్. వాగిపెకంద్ తల్ పొదే ముకుట్ అన్సంద్. పొలడ్ జుఙ్ఙె తోడుత్న. అసక్తిన్ పోల జుఙ్ఙెలఙ్ తోడ్సంద్ 18 ఔరున్ కత్త దున్ బారబర్ వపాస్ ఇదరేఙ్. అమ్దు తనె విరోదికున్ రగ్గడ్ సిక్స సిసంద్. దుస్మన్లున్ వలాడ్ రగ్గ సుమ్సంద్. దీవెలకెర్ గిన రీతినడ్ సిక్స సిసంద్. 19 పొద్పడ్నవై అనేకర్ యెహోవా నామామున్ ఆర్రిఙ అర్సర్. పొద్కురినవై అనేకర్ అమ్నే మహిమన్ అర్సార్. యెహోవా ఊప్రినడ్ తూలెక బూరం లఙ్ అమ్దు వర్సంద్. 20 "మాప్ కలేఙ్ సీయోను వర్సంద్. యాకోబు కాన్దానిత్ తిరుగుత్ పడెకద్ మద్తద్ ఔరతి మాప్ కలేఙ్ వర్సంద్." ఇద్ది యెహోవా గొట్టి. 21 "అన్ ఔరడ్ కలేక కారర్ ఇద్. ఇన్ పొదే అనేక అనే ఆత్మన్, అన్ ఇనే మూతినడ్ ఇట్ట గోట్టి, ఇనే మూతితనట్ ఇనే సినపరే మూతితనట్ ఇద్ మొదల్ ఎత్ ఎప్పుడి కురియెవ్" ఇస యెహోవా ఇడ్తేంద్.