1 ఆ గోట్టిక్ విత్ హిజ్కియారాజుద్ తనె జుఙ్ఙెలున్ ఇర్కుత్, గోనె జుఙ్ఙెలున్ తోడుత్న యెహోవాక్నె ఎల్లఙ్ సేద్దేంద్. 2 రాజునె ఎల్ల మాల్కక్ ఎల్యాకీమును, సాస్ర్తి సెబ్నాను, దెయ్యలకెర్ దొడ ఆమోజునె కీకె, కబులక్ ఎద్ద యెసయకున్ మెరా పవిట్టేద్. 3 ఔరు సదర్ గోనెజుఙ్ఙె చుట్టుత్ అమ్నున్ మెరా వత్ అమ్నడ్ "హిజ్కియా ఇనఙ్ ఇడ్ ఇన్తేంద్, ఈ దినం నరజ్, సిక్స, అవమాన దినం. సినపర్ జన్మ సియెక వెల వత్తిన్ గనీ జన్మ సియేఙ్ అమ్మజరద్లఙ్ అన్సార్. 4 పనమ్ ఎద్ద దేయ్యముఙ్ సిరనిడెంఙ్ తనె మాల్కక్ అస్సురు రాజు పవిట్ట రబ్సాకే ముట్ట గోట్టిక్ అమ్దు అస్సురు రాజున్ ఆర్సిప్సాద్ ఎరా. అదుఙి ఇండ్డితుఙ్ బత్కుత్ అనేక నేండెర్ కొస్సెం మందిన్ సటి నీవ్ జస్తీ ప్రార్తన కల్." 5 హిజ్కియా రాజునే అదికరిక్ యెసయాక్నతిఙ్ వత్తేర్. 6 యెసయా ఔరడ్ ఇనఙ్ ఇంతేంద్. "నీర్ మాల్కకున్ ఈ గోట్టి ఇడ్డుర్, యెహోవా తనేద్ ఇడ్సంద్ ఇంతే, అస్సురు రాజునే సేవకెర్ అన్ సిరయ్త ముట్ట గోట్టికున్ ఆర్సేనెం. 7 అమ్నతి అన్ ఒకొ ఆత్మన్ పుటిప్సత్. అమ్దు ఒకొ గొట్టి వింత్ తనె దేసముఙ్ వపాస్ సేసంద్. అమ్నే దేసముతి రుసినాడ్ అల్గదన్దా."

8 అస్సురు రాజు లాకీషు పట్నంమున్ సయుత్ లిబ్నా పొదే లాడయ్ కల్సంద్ ఇస ఓర్కి పడుత్ రబ్సాకే వపాస్ సేత్న అమ్నున్ కలైతేద్. 9 కూసు రాజు తిర్హకా తన్ పొదె లాడయ్ కలేఙ్ వత్తేంద్ అస్సురు రాజు సన్హెరీబు వింతేద్. అప్పుడ్ అమ్దు తనె దూతలడ్ హిజ్కియాకున్ ఒక్కొ కబుర్ పవిట్టెద్. 10 "యూదా రాజు హిజ్కియానడ్ ఇనఙ్ ఇడ్తేంద్, ఇనె దెయ్యంనె కెయ్యుత్ పసిల్తా అస్సురు రాజు యెరూసలేమునకు వేత్తేంద్ ఇస ఇనేఙ్ తోద్. 11 అస్సురు రాజకెర్ పూర దేసలుఙ్ పూర నాస్ కత్త సంగతి నీవ్ విన్తీవ్ తా, నీవ్ మాత్రం గెల్లేఙ్ సలతీవా? 12 అనే తోలెనితర్ మురైత గోజాను, హారాను, రెజెపు, తెలస్సారుపట్నలెంఙ్ అనేక ఏదెనీయులు, ఇవ్రత్తి ఎరేనా తమె దెయ్యలే మదతడ్ గేల్పతిరా? 13 హమాతు, అర్పదు, సెపర్వయీము, హేన, ఇవ్వా ఇనేక పట్నముఙ్ రాజుల్ తనేద్ ఎద్దేర్?"

14 హిజ్కియా ఆ ఉత్తరమున్ దుత సుముత్ కొత్, వసిపుత్, యెహోక్నె మద్దిరుత్ సెత్న అమ్నె జాగత్ అదున్ ఇట్టెంద్. 15 మల్ల ఇనంఙ్ ప్రార్తన కత్తేంద్, 16 యెహోవా,కెరూబులత్తి బత్కెకా ఇస్రాయేలీయులె దెయ్యం, బూమి ఆబార్లున్ గడిప్తా ఒక్కొది ఒక్కొ దెయ్యం, నీవ్ ఈ పరలోక రాజ్యాలున్ పూర దెయ్యంనివీ. 17 సేనల ప్రబువు యెహోవా, ఇనే కెవ్వులొగుత్ అనే గోట్టిక్ విన్. పానం అనేక దెయ్యం ఇన్ ఇడ్సంద్ సన్హెరీబు వాయ్త గొట్టిక్ విన్. 18 యెహోవా, అస్సురు రాజులున్ ఇదవిదా రాజెమ్త మందిన్ ఔరె దేసలున్ నాస్ కత్తెర్. 19 ఔరె దెయ్యలున్ కిస్సుత్ తప్తద్ కారెయ్.ఆ రాజ్యంత దెయ్య కారెయ్తావ్ ఎరెవ్. సివతవ్ ఎదెన గుడ్తావ్ ఎదెన మాన్కకెర్ తయర్ కత్తెర్. 20 యెహోవా, ఈ లోకముత్ నీవీ, కారెయ్ నీవీ "కరే దెయ్యం యెహోవా అని మాన్కకెర్ పూర నిగ్రనినడ్ అమ్నె కెయ్య్ తన అమ్మున్ వాగిప్."

21 అప్పుడ్ ఆమోజునె కీకె యెసయ హిజ్కియా మెర ఈ కబుర్ పవిట్టెర్. "ఇస్రాయేలీయుల దెయ్యం యెహోవా ఇడ్తాద్ తనేద్ ఇంతే" ఔరె దెయ్యలున్ కిస్సుత్ తప్తద్ కారెయ్. అస్సురు రాజు సన్హెరీబు గోట్టిత్ నీవ్ అన్ మూడట్ ప్రార్తన కత్తీవ్ తా, 22 అమ్నున్ వలాడ్ యెహోవా ఇడ్తా గోట్టి ఇద్ది, "కన్య ఎద్ద సీయోను మరదాల్ ఇన్ తోద్ ఇత్నా, అపహసిస్తున్నది, యెరూషలేము కుమారి ఇన్ ఓలుత్న తల్లున్ రూపస్నండద్. 23 నీవ్ ఎరుఙ్ తోద్ ఇంతివ్? ఎరుఙ్ రొయ్తెర్? గర్వనడ్ ఎరుఙ్ అర్సిపత్ ఇస ఓల్తీవ్? 24 ఇనే దూతల వలాడ్ యెహోవాన్ తోద్ నీవ్ ఇనఙ్ ముట్టివ్, ‘అనే దండ్డి రతలున్ గుంపునడ్ అన్ గుబ్బెత జుట్టి పొదే అనేకాదీ లెబానోను జాగంఙ్ పొదే సోక్తాన్. పొడమ్ అనేకద్ దేవదారు చేట్లూ సొబాత సరల చేట్లూ కత్కతాన్. 25 అన్ నువ్వీక్ తవ్వుత్ అత్త ఈర్ ఉన్డాన్. అనే గెట్టబడున్ ఐగప్తు పెనిక పూర ఆర్నానఙ్ కత్తన్.’ 26 మరి ఇదున్ అన్ ఎప్పుడోయ్ నిర్నయ్ కత్తన్ ఇస, పేలెనిత కాలముత్ ఇదున్ గడిప్తేర్ ఇనుఙ్ విన్కువరేతిన? నీవ్ తిర్గొర తా పట్నంత కరబెద గొడలున్ కట్టెకద్ అన్నడి ఎద్దిన్. 27 అదుఙి అదవున్ మంది సక్తి తొసేట నెరయ్తేర్. అర్రినడ్ కేనుత్ గడ్డి లఙ్, తకత్ తోసెట కాల లఙ్ మలంఙ్తెర్. 28 నీవ్ ఉద్దెకద్, వాక సెరెకద్, లొప వరెకద్, అన్ పొదే సాడిక్ ముడేకద్ అనుఙ్ ఓర్కి. 29 అన్ పొదే నీవ్ తప్పెక విరొదడ్, నీవ్ ఓలిప్తా గర్వ అన్నత్తిన్ వత్తేవ్. అదుఙి ఇనే ముక్కకి అనే గాలం తకిప్సతీవ్. అనే ముక్కుత్ ఇనే మొర్కెన్ ముతిత్ ఇడుత్ ఇన్ మల్పసతున్. నీవ్ వత్త పావీ ఇన్ మలపుత్ పవిడ్సతున్." 30 యెసయా ఇంకా ఇనఙ్ ఇడ్తెంద్. "హిజ్కియా, ఇనుఙ్ తనేది సూచన. ఈ సాల్ అద్నేత్ అద్ది దానేలున్, ఇంది సాల్కు వలాడ్ అద్ వరెక దానే నీర్ తిసతిర్. మూది సాల్కులున్ నీర్ విత్తనం చల్తిర్ పంట పుస్సతిర్. అంగుర్నే వాడిత్ మొలపుత్ అద్నే ఫలం నీర్ తిసతిర్. 31 యూదా కంన్దనిత్ గెలప్పుత్ మిక్త కుబెన వేర్ సెత్న మొలయుత్ బర్కతెర్సా. 32 మిక్తార్ యెరూసలెం తన, గెల్తార్ ఔరు సీయోనుత్ మెట్ తన కురియుత్న. సైన్యాల అదిపతి యెహోవా ఆ సక్తిన్ ఇద్ కారె ఎద్దిన్. 33 అదుఙి అస్సురూ రాజు వలాడ్ యెహోవా ఇడ్డెకద్ తనేద్ ఇంతే, ‘అమ్దు ఈ పట్నంముత్ వరేంద్. అదున్ పొదే ఒకొ గుంతి గిన సయేంద్. ఒకొ డాలున్ మెలపేంద్. అదున్ ముదర్వై పుడ్కేంద్ కరబ్ కలెంద్. 34 ఈ పట్నం లోప వరేఙ్ పేలె తాన్ వత్త పావ్ అమ్దు తిర్గుత్ సేసంద్.’ ఇద్ది యెహోవా మాట. 35 అనే నిమిత్తమూ అనే సేవకుడ్ ఎద్ద దావీదు బదొల్ అన్ ఈ పట్నంమున్ కాపడుత్ వాగిప్సత్." 36 అప్పుడ్ యెహోవా దూత సెత్న అస్సురు తర్ సైనిక్ సైన్యం 1, 85,000 మందిన్ కత్తం కత్తెంద్. తోల్లిని మంది ఓలేఙ ఔరు సదర్ పినుగులఙ్ రాలుత్ అండర్. 37 అస్సురు రాజు సన్సెరిబు వపాస్ నీనెవె పట్నంమున్ సేద్దెర్. 38 అదున్ వెన్కత్ అమ్దు నిస్రోకు ఇనేక తనె దేవత మందిరుఙ్ పూజ కల్స అనేఙ అద్రమ్మెలెకు, సెరెజెరు ఇనేక అమ్నే కీకె అమ్ననే కత్తినడ్ అల్ఙుత్ అరారాతు దేసముఙ్ తూటేర్. అప్పుడ్ అమ్నే కీకే ఎసర్హదోను అమ్నుఙ్ బద్లి రాజ్ ఎద్దెద్.