1 ఇద్ తూరును వలాడ్ దైవా ప్రకటన. తర్సిసు రుకులుఙ్, కుబ్ లోల్లి కలుర్. తనుఙ్ ఇంతే ఓడరేవు గనీ ఆస్రయం గాని తోతేవ్. కిత్తీము దేసం తన ఔర్ ఈ గొట్టి ఇడ్డెకాద్ ఎద్దిన్. 2 సముద్రం ఒడుత్ అన్నెకార్! సీదోను పట్నంముత్ బెపరిక్! కమల్ కలుర్. సముద్రం పొదె వర్స సేసా అనేకర్ తమె సమన్లుఙ్ ఇమ్మున్ పైత్తేర్. 3 దడ్డి సముద్రం పొదే సేరేఙా సీహోరు ప్రాతం దన్యాం, నైలు నదిన్ కలైత పంట తూరుకు వర్స అన్నేవ్. తూరు దేసాలుఙ్ వర్తక కేంద్రంగా అండిన్. 4 సీదోనూ, లాజ్జన్ వా, తనుఙ్ ఇంతే సముద్రం మూడ్సంద్. సముద్రం తా తక్తా మూడ్సనండద్. అమ్దు ఇనఙ్ ఇంతేద్. "అన్ మూలఙ్ సెరెక నొప్పిక్ వరెతె. సినపరుఙ్ జన్మసియేతాన్ అన్ సినపరుఙ్ పొరయేతాన్, కడమలున్ పొరయేతాన్." 5 ఆ గొట్టి విత్ ఐగుప్తు మంది తూరును వలాడ్ గుల్ నరజ్ ఎర్సర్. 6 సముద్రముత్ తీర్గెకార్! దుక్కపడుర్. తర్సిసుంఙ్ జలది సెర్. 7 ఎప్పుడి కుసినడ్ అనేక పట్నం, తొలెనిత కాలముత్ బునజి అనెక పట్నం, మారొకొ దేసులెంఙ్ బత్కసా అనేకదుఙ్ సుదూర సెరేకనుఙ్ పట్నం, ఇనుఙి ఇనఙ్ ఎద్దిన? 8 తూరు బెపరిక్ రాజునే కొమ్మసికొట. అత్తి బెపరి కన్నే బూమి పొదె మాన్ అనెకర్ ఔరు. తూరు ముకుట్ పయేకా పట్నం. అదుఙ్ విరోద్ కత్తద్ ఎద్? 9 అద్నే గర్వాముఙ్, గనత సక్తిక్ అ మానమ్ కలేకాదున్, బూమి పొదె ఘనత సుమ్మతద్ అద్ పౌరులున్ మానమ్ కలేకాదున్ సేనల ప్రభువైన యెహోవానె నిర్నయ్ కత్తెంద్. 10 తర్సిసునె కొమ్మలివా, నీ బూమిన్ ఉర్రెకద్ మొదలిడ్. నైలు నదిలా ఇనే బూమిన్ పెర్రెత్ కల్. తూరులో ఇనుఙ్ అదర్ ఎరెకర్ ఏరి తోతెర్. 11 యెహోవా తనె కెయ్యున్ సముద్రం పొదె చాప్తెంద్. అమ్నే రాజ్యాలున్ ముస్సతేంద్. కనానులో కోటలున్ నాస్ కలేఙ్ ఇస ఆగ్య కత్తేద్. 12 అమ్దు ఇనఙ్ ఇంతేద్ "బాదనడ్ అనేక సీదోను కన్యా, ఇనుఙ్ ఇంక కుసి అనేద్. నీవ్ సులుత్ కిత్తీముకి జలది సే. గనీ అత్తి గిన ఇనుఙ్ అల పుసెంఙ్ రోంబడెద్." 13 కల్దీయుల దేసామున్ ఓలుర్. ఔరు ఇండి ఒకొ మంది లఙ్ తోతెర్ అస్సురు ఔరు అదున్ అడవి జన్వలున్ బత్కెకా అడవీ లఙ్ ఇదర్తేంద్. అదున్ ముట్టడికై ఔరు గుడ్సె కట్తేర్. అద్నే మిద్దె ద్వంసం కత్తేర్. దేసాముఙ్ కరబ్ కత్తెర్. 14 తర్సిసు రూకులరా, కుబ్ లోల్లి కలుర్. ఇమే కోట నాస్ ఎద్దిన్. 15 ఒకొ రాజునే బత్కెక కాలముత్ 70 సాల్కు తూరును మద్దెకద్ ఎర్సంద్. 70 సాల్కు ఎద్ద వెన్కత్ తూరుత్ ఒకొ లంఙె పాట పడ్స అండెతి కరిల్తీన్. 16 పూర మద్తేంద్ లంఙె! కందురి వాద్యం కోత్న పట్నంముత్ తిర్గులాడ్. సదర్ ఇన్ అదికన్నాన్ అదున్ సొబనడ్ మొరప్. పెల్లెగ్ పాట పాడ్. 17 70 సాల్కు ఎద్ద వెన్కత్ జలది యెహోవా తూరుకు సహాయం కల్సాద్. అద్ తిర్గుత్ తనె జీతం కమపేంఙ్ సటి బూమి పొదే అనేక పూర రాజ్యాలడ్ సినలిక్ కల్సార్. 18 అద్ సుమ్మత లాబం, కమయ్ యెహోవాకున్ వర్సంద్. అదున్ ఎకుత్న, జమ ఇడేన్ వరెద్. యెహోవా సన్నిదిత్ బత్కేర్ ఔరె బోజనామున్, సోబతా జుఙ్ఙెలున్ అద్ వర్తక లాబమున్ వాడ్సర్.