22 ✝Bafumakadzi, muzwitebamise kubalume benyu, sekwamunothama kuna He. 23 Ngobe nlume un’holo wemfumakadzi saKhirisitu ali n’holo wegubungano, mbili uwe, kakale iye tjekukwe ndiye Ntjidzi wawo. 24 Segubungano lizwitebamisa kuna Khirisitu, ndizo bafumakadzi bo ngabazwitebamise kubalume babo mutjimwe netjimwe.

25 Balume, idani bafumakadzi benyu, saKhirisitu akada gubungano akapila butjilo gugwe ngentha yalo, 26 kuti swiyo angaliyengemadza, hule kwelitjenesa elingudza nevula ngedama, 27 kudze azwihhisile gubungano kuwunli lakanaka, lisakahwehwana lisina hambgwa kene tjimwe tjinhu, koga lakayengemala lisina nlandu. 28 Ndizo ke balume bakafanila da bafumakadzi babo semibili yabo. Iwhoyo unoda mfumakadzi uwe unozwida iye tjekukwe. 29 Ngobe akuna nhu unohema mbili uwe, koga unowumpa zodliwa akawuntjengeta, saKhirisitu ethama kugubungano, 30 ngobe tinhango dzembili uwe. 31 ✝"Nentha yayikoku nlume unowhosiya tatayi namayi akanamatilana nemfumakadzi uwe, bubili gwabo banowhoba nyama in’ompela." 32 Ikoku masazibgwa makulu kwazo, koga ndoleba nekwaKhirisitu negubungano, 33 koga ke, umwe newumwe wenyu ngaade mfumakadzi uwe sekwaanozwida iye tjekukwe, nemfumakadzi abe nemazwibhato kunlume uwe.