1 Bakati baswika kuIkhoniyamu bakangina musinagogu yemaJuta, bakalebeleka nezila yekuti bunji gwemaJuta nemaGiriki bakagalamoyo. 2 Koga maJuta asingagalemoyo akadzonga Bataya bakabalonga meya dzakayipa kuti baheme bagalimoyo. 3 Ndizo bakagala kwelubaka gulefulefu, belebeleka ngetjilopa nekwaHe, iyebo akapa busupi gwedama lile lengoni, nezwilakidzilo nange makaabadzo kwaka kuyetiwa ngemaboko abo. 4 Koga banhu bemunzi-nkulu iwhoyo bakathubukana pakati; bamwe bakama nemaJuta, bamwe bakama nebapositoli.

5 Kwakati Bataya nemaJuta, kan'ompela nebatongi babo, bohaka kuti babadziyidze kakale babakhikitidze ngemabgwe, 6 bakakuwha bakatihhila kumizi-mikulu yekuLikhoniya inoyi Lisitira neDebhi, nekumitunhu ipedlo; 7 bakati beswikako bakasumikila Ndebo Mbuya.

8 MuLisitira kwaka kuna umwe nlume waka aligele, asingatubule hingisa makumbo awe; waka ali tjilema kubvisila mukuzwagwa kukwe, esanhu akatongoyenda. 9 Wakawhilila Phawuli elebeleka; naPhawuli, akawunlingisisa akati ebona kuti unogalamoyo kuti angapodzewa, 10 akaleba newhi lipehhugwi eti, "Milika ume nemakumbo awo." Akabe emilika eyenda. 11 Banhu bakati bebona tjayetiwa naPhawuli, bakamilidza mawhi abo neTjiLikhoniya beti, "Midzimwana yabuya kutili inga banhu!" 12 Bakati Bhanabhasi ndiZewusi, nentha yekuti Phawuli waka ali iye nlebeleki nkulu bakawunti ndiHhemesi. 13 Mphirisiti waZewusi, waka ana thempeli limbeli kwenzi-nkulu, wakabuya nemikono nendalama kunkoba wenzi ehaka kuti awhopila tjibhayilo kan'ompela nebamwe.

14 Koga bapositoli, Bhanabhasi naPhawuli bakati bekuwha, bakapalula zwiyambalo zwabo bakalabuka bengina pakati kwembunga webanhu, bemimila beti, 15 "Balume mokuyetilani ikoku? Iswi tibanhu bo, totjila samwi, tamuhhisila ndebo mbuya, kuti musiyane nezwinhu zwisina n'hingo izwezwi muhhe kuNdzimu wakabumba kudzimu nehango negungwa nayiko kose kumukati. 16 Mulubaka gwakapinda wakabvumila njudzi dzose kuti dziyende nezila dzadzo; 17 koga wakasiya kuna busupi, nekuti wakayeta zwakanaka akamupa vula inobva kudzimu nemitjelo muzwibaka zwakatambunuka, akagutsha mimoyo yenyu nezodliwa nehanha." 18 Kene nematama iyawa, kwakabalemela kuti badze batubule misa banhu kuti basibabhayile tjibhayilo.

19 Koga maJuta akabuya ebva kuAntiyoku nekuIkhoniyamu; akati atjithama banhu bakabvumilana nawo, akakhikitidza Phawuli ngemabgwe akawunkakatila kuhhe kwenzi-nkulu, ekumbula kuti watjifa. 20 Koga badiyiwa bakati bawunkombeledza, akamuka akangina munzi-nkulu; kukati tjimuka akayenda naBhanabhasi kuDebhi.

21 Bakati basumikila ndebo mbuya munzi-nkulu iwhoyo banhu banjinji bakahanduka bakaba badiyiwa, bakakobgwilila kuLisitira nekuIkhoniyamu, nekuAntiyoku, 22 besimisa meya dzebadiyiwa, bebakuludzila kuti bayendilembeli bali mukugalamoyo, beti, "Takafanila dziyidzika kwazo kudze tingine mubumambo gweNdzimu." 23 Bakati bahala bawhola bakabapa zwigalo mulimwe nelimwe gubungano letshipi, netembezela neyila zodliwa, bakabasa kuna He wabaka begalamoyo.

24 Bakakopinda nepaPhisidiya bakaswika kuPhamfiliya. 25 Bakati basumikila dama muPhega, bakajetukila kuAthaliya; 26 bebva ipapo bakatanha kepe bakayenda kuAntiyoku, kwabaka basiwa mungoni dzeNdzimu ngentha yen'hingo wabaka bahhadzisa.

27 Bakati baswika bakakubunganya gubungano letshipi panhu pan'ompela bakaleba kose kwakayetiwa neNdzimu ebahingisa, nekuti waka ahhulila Bataya nkoba wegalamoyo. 28 Bakagala kwelubaka gulefulefu nebadiyiwa.