1 Kwakati bhonyongo latjipela, Phawuli akadana badiyiwa, akabasimisa ngematama, atjibawoneka wakamilika eyenda kuMakhedoniya. 2 Wakati apinda mumitunhu yose iyeyo, eyenda ebakulumbidza kwazo, akaswika kuGirisi. 3 Wakapedza mimwedzi mitatu aliko, maJuta paakalangana nekukwe waka atjiba pedlo nemilika eyenda nekepe kuSiriya, ehaka kuti apinde kuMakhedoniya ohanduka. 4 Wakapelekedzewa naSopata wekuBheriya, ali nkololo waPhayirusi; naArisitakhasi naSekundhusi, baThesalonika; naGayiyasi wekuDebhi, naThimothi; kose naThikhikhasi naThirofimasi bekuAsiya. 5 Ibaba bakayendilambeli bakanotilinda kuThirowasi, 6 koga takayenda ngekepe tibva kuFiliphi hule kwemahhuba eTjinkwa Tjisina Mbidzo, mumahhuba mahanu takaswika kubali muThirowasi, patakagala kwemahhuba ali kutondeka.

7 Muhhuba lekutanga letshipi takakubungana kuti tipemule tjinkwa, Phawuli wakalebeleka nabo, kuli kuti unohaka yenda tjimuka; ndizo wakalebeleka kukadza kukaba pakati kwebusiku. 8 Kwaka kuna zwivoneko zwinjinji mun'umba yapehhugwi kwataka takakubungana muyili. 9 Umwe nhhuhha unoyi Yuthikasi waka aligele pawhindhi, wakabhakhwa newhope Phawuli etjayendilambeli nelebeleka; akati akuligwa neyizela, akawa ebva kun'umba yebutatu uyenda pehhugwi akanonungwa atjifa. 10 Koga Phawuli wakajita akaswika ehunama ewunghumbatila, eti, "Musidziyidzike, umpenyu." 11 Kukati Phawuli atanha akayenda kun'umba ipehhugwi atjipemula tjinkwa akadla, akalebeleka nabo lubaka gulefulefu, kukadza kukayedza, akamilika oyenda. 12 Bakayenda nenhhuhha kanyi etjila, bakagadzikana mimoyo kwazo.

13 Koga iswi, tatjitungamila tiyenda kukepe, takamilika ngekepe tiyenda kuAsosi, Phawuli paaka ewhotanhila po; nekuti iye tjekukwe waka azwipila kuti unowhoyenda ikweno ngemakumbo. 14 Akati ahangana naswi paAsosi, tikawuntanhisa tikayenda kuMithayilini. 15 Timilika ipapo takayenda ngekepe, tjimuka tikanoswika pakalingisana neKhiyosi; muhhuba lebubili takanoswika kuSamosi; muhhuba lebutatu takanoswika kuMilethasi. 16 Phawuli waka atjikumbula kuti asipinde nekuEfesu, kuyetila kuti asitole lubaka ali muAsiya; ngobe waka elibilidzila kuti hapa kutubuka, anobe muJerusalema muhhuba lePhentekhositi.

17 Phawuli ali muMilethasi, wakakumbila bawhola begubungano letshipi leEfesu kuti bahhe kuwunli. 18 Bakati bahha kuwunli, akati kubali, "Imwi tjekwenyu moziba sekwandakatjila pakati kwenyu lubaka gose kubvila muhhuba lekutanga nditshamba muAsiya, 19 ndihingila He nekutebama ndilihhele mihodzi kakale ndiwigwa nezwiliko ngentha yelangana kwemaJuta; 20 moziba kuti andizotongobgwilila hule mukusumikila kumuli tjimwe netjimwe tjaka tjina bhatsho, ndidiya patjena nekubva payimwe n'umba ndiyenda kuyimwe n'umba, 21 ndibudza maJuta nemaGiriki nekwehandukila kuNdzimu negalabgwe muna He wedu Yesu. 22 Sangwenu, ndoyenda kuJerusalema, ndilawugwa ngeMeya, ndisingazibe kuti ini tjinowhoyetikala kundili ikweno; 23 kuhhe kwekuti Meya Yakayengemala inoleba kundili mumizi-mikulu yose kuti sungwa nebulemo kwakandilindila. 24 Koga anditokutola kuti butjilo gwangu guna tjilemela kundili, tjandinohaka koga whufidza ndima yangu nen'hingo wandakawamutjila kubva kuna He Yesu, wekuti ndilebe ndebo mbuya yengoni dzeNdzimu."

25 "Sangwenu, whililani! Ndoziba kuti imwi mose, bandakayenda pakati kwenyu ndisumikila bumambo amutjowhopamha mukandibona kakale. 26 Ndizo ndomubudza muhhuba lanasi kuti andina nlandu nekwelopa lenyu mose, 27 ngobe andizozeeza muzibisa ndongoloso yeNdzimu yose. 28 Muzwilise kakale mulise nemhwizi dzose, Meya Yakayengemala yakamubiga kuti mube balisi badzo, kuti mutjengete gubungano letshipi leNdzimu laakatenga ngelopa lile. 29 Ndoziba kuti hule kwekube ndayenda kowhohha mhele dzinohlisa pakati kwenyu, dzisingowhosiya kene iyo mhwizi, 30 napakati kwenyu kowhoba nebanhu banoleba zwinhu zwakapeyama, beyetila kwebela badiyiwa kubali. 31 Ndizo tjenjelani, mukumbule kuti kwemakole matatu, siku nesikati, andizotongoma laya umwe newumwe wenyu ndilila n'hodzi."

32 "Sangwenu ndomusa kuNdzimu nekudama lengoni dzidze, ilo linotubula mubaka nemupa nhaka pakati kwabo bose bakayengemadziwa. 33 Andizotongotjiba siliva yewumwe nhu kene zeezi kene tjiyambalo. 34 Imwi tjekwenyu moziba kuti maboko angu iyawa akahingila zwandinotayila, nezwinotayila bandinabo. 35 Muna iko kose ndakamulakidza kuti ngehinga zwakasima wakafanila bhatsha ibabo banohaka bhatsho, ukumbula matama aHe Yesu, kuti wakati, ‘Pa kwakakombolegwa kupinda wamutjila.’ "

36 Wakati apedza lebeleka, akapfigama akatembezela kan'ompela nabo bose. 37 Bakalila bose bakagumbatila Phawuli bakawumputa, 38 bena buyendasi kwazo ngentha yetjaaleba, kuti abatjowhopamha bakawumbona kakale. Bakawumpelekedza bakanoswika kukepe.