1 Hule kwayikoku wakamilika paAthenisi, akayenda kuKhorinte. 2 Ikweno wakawana umwe Njhuta waka eyi Akhwila, ali nghali wekuPhontasi, etjambobva kuIthali nemfumakadzi uwe unoyi Phurisila, ngobe Kilawudiyasi waka alaya kuti MaJuta ose afuluke muRoma. Ndizo wakayenda akanobabona; 3 wakagala nabo, bakahinga bose, nekuti waka ehinga n'hingo iwo zwawo bo; ngobe bose n'hingo wabo waka uli wethama matente. 4 Waka ezuwisana nabo musinagogu masabatha ose, eyedza gadzamoyo maJuta nemaGiriki.

5 Pakabuya Silasi naThimothi bebva kuMakhedoniya, Phawuli wakazwipila sumikila, epa busupi kumaJuta kuti Yesu ndiye Khirisitu. 6 Bakati bonyanyayidzana naye, bewuntuka, akahahamula zwiyambalo zwizwe, akati kubali, "Lopa lenyu ngalibe pehhugwi kwenyu*! imi andina nlandu. Kubvisila ngwenu ndowhoyenda kuBataya." 7 Akamilika po, akayenda kun'umba yewumwe nlume unoyi Thayithasi Jasitasi, waka enamata Ndzimu, n'umba iye yaka ili ntome kwesinagogu. 8 Khirisipasi, ntungamili wesinagogu, waka galamoyo muna He, nen'ha uwe wose; neBaKhorinte banjinji bakati bewha ndebo mbuya bakagalamoyo bakabvubikiwa.

9 Mutjilakidzo gumwe busiku, He wakati kuna Phawuli, "Usihle, koga lebeleka, usinyalale; 10 ngobe ndinawe, akuna nhu unowhokugwisa akakukubadza; ngobe ndina banhu banjinji munzi-nkulu iwhoyu." 11 Akagalapo kwegole lina mimwedzi ili mitanhatu, ediya dama leNdzimu pakati kwabo.

12 Koga Galiyo paakaba mbhati wentunhu weAkhayiya, maJuta akabhatana akagwisa Phawuli, akawuhhisa palubahhe, 13 eti, "Nlume iwhoyu unokwebela banhu kuti banamate Ndzimu nezila inopesana nenlayo."

14 Koga kwakati Phawuli obva ehhula nlomo uwe, Galiyo akati kumaJuta, "Yeyi imwi maJuta, hapa kwakuli kuti indebo yetjisakatambunuka kene tjibi tjayetiwa, ndabe ndiwhomuwhilila; 15 koga saku kuli ndebo yenyanyayidzana nekwematama nemazina nenlayo wenyu, muzwibonele tjekwenyu; imi ndolamba bantongi wezwinhu zwakajali." 16 Akabatata palubahhe. 17 Ose maJuta akabhata Sositheni, ntungamili wesinagogu, akawunloba mbeli kwelubahhe. Koga Galiyo asongoba nehanya nako ikoku.

18 Hule kwayikoku Phawuli wakagala mahhuba manjinji, akakotjibva pabagalimoyo, akayenda ngekepe kuSiriya, wakayenda naPhurisila naAkhwila. Wakakukubula n'holo uwe atjipaSenkhiriya, ngobe waka atuna. 19 Bakaswika kuEfesu, iye akabasiya po. Wakangina musinagogu, akakakabadzana nemaJuta. 20 Bakati bewunkumbila kuti agale kwelubaka gulefu, akalamba. 21 Koga wakati ebasiya, akati, "Ndowhohanduka kakale kumuli hapa Ndzimu eda." Akabva paEfesu ngekepe.

22 Wakati aswika paKhesariya, akangina akalezwa gubungano letshipi, akakoyenda kuAntiyoku. 23 Wakati agala lubaka ipapo, akamilika, akatandula muntunhu weGalathiya newePhurayijiya, eyenda engina mumizi nemizi esimisa badiyiwa bose.

24 Kwaka kuna umwe Njhuta unoyi Apholosi, wakabuya kuEfesu. Waka ali nzwagwa wekuAlekizandha, ali nhu wakazwidiya; waka eziba whalo kwazo. 25 Nlume iwhoyu waka adiyiwa muzila dzaHe; ngekuzwipila mumeya, wakalebeleka kakale akadiya tjakatambunuka nekwaYesu, nekutobe waka eziba bvubika kwaJohane koga. 26 Wakatangisa lebeleka enatjilopa musinagogu; koga Phurisila naAkhwila bakati bawuwha, bakawuntola bakayenda naye, bakawuntjenesela zila yeNdzimu zwibuyanana. 27 Wakati akumbula kuti apindile kuAkhayiya, bagalimoyo bakawunkuludzila, bakakwalila badiyiwa kuti bawuwamutjile. Wakati aswika, akabhatsha kwazo banhu baka bagalamoyo kuli ngengoni, 28 ngobe ngekakabadzana kwakasima, wakakunda maJuta patjena pakati kwebanhu, elakidza ngewhalo kuti Yesu ndiye Khirisitu.