1 Mumahhuba iyawo kwakati badiyiwa bowanda, maJuta anolebeleka tjiGiriki akan'un'una nekwemaJuta anolebeleka tjiHhebheru. MaJuta anolebeleka tjiGiriki aka eti akuna unahanya nekwetjilikadzi dzawo pan'hingo wekobegwa zodliwa pahhuba nehhuba. 2 Ndizo badiyiwa bali gumi nebabili bakadana bunga lose lebadiyiwa, bakati kubali, "Akuzolulama kuti tisiye sumikila dama leNdzimu tinokoba zodliwa. 3 Hama, halani balume bali kutondeka pakati kwenyu banozibgwa balihhele Meya nebutjenjebvu, batingapa n'hingo iwhoyu. 4 Iswi towhozwipila mukutembezela nesumikila dama."

5 Ndebo iyeyo yakahanhisa bunga lose. Bakahala Sitefani, nlume uhhele bugalimoyo neMeya Yakayengemala; naFiliphi, naPhurokhorasi, naNikhano, naThimoni, naPhamenasi, naNikholasi weku Antiyokhi, waka ahandukila kulunamato gwetjiJuta. 6 Bakahhisa balume ibaba kubapositoli, bakatembezela bakababiga maboko.

7 Ndizo ke dama leNdzimu lakaandama; badiyiwa baka bali muJerusalema bakawanda, nebamwe bo baphirisiti banjinji bakatangisa galamoyo.

8 Sangwenu ke Sitefani, alihhele ngoni nemasimba, wakayeta matjenamiso makulukulu nezwilakidzilo pakati kwebanhu. 9 Koga bamwe bemusinagogu yeBanhu Bakasunungugwa (sekwayake idan'wa), nemaJuta ekuKhureni, neekuAlekizandha, neekuSilisiya, neekuAsiya, akamilika akatangisa kakabadzana naSitefani. 10 Koga abazotubula kulila butjenjebvu neMeya yaaka elebeleka ndiyo. 11 Bakanobudzila ntome bamwe balume pakasumbikika kuti banyepe beti, "Takawha Sitefani eleba matama akayipa etuka Mozisi neNdzimu." 12 Bakadzonga banhu nebawhola, nebakwali, bakabhata Sitefani bakawunlesi mbeli kwelubahhe. 13 Bakahhisa banhu banopa busupi gwemanyepwa, bakahha benyepa beti, "Iwhoyu nlume atoletja leba zwinhu zwakayipa nekwebugalo gwakayengemala igogu nekwenlayo; 14 ngobe takawuwha eti Yesu wekuNazaretha unowhopwanya thempeli ileli akapitulanya milayo yatakapiwa naMozisi." 15 Bose baka baligele mulubahhe bakalingisisa Sitefani, bakabona kuti buso gugwe gwaka gunga buso gwentumwa weNdzimu.