1 Sangwenu bakati bapinda nemuAmfipholisi neApoloniya, bakaswika kuThesalonika, paka pena sinagogu yemaJuta. 2 Phawuli wakangina sekwaaka agala ethama, akakakabadzana nabo nekwedziwhalo kweMasabatha matatu, 3 ebatjenesela kuti kwaka kwakafanila kuti Khirisitu adziyile nekuti amuke kubafi, eti, "Yesu wandinosumikila kumuli, ndiye Khirisitu." 4 Bamwe babo bakagalamoyo, bakahanduka bakabhatana naPhawuli naSilasi; sekwakayetiwa nebamwe bemaGiriki bakazwipila namata nebafumakadzi banjinji banabugalo gupehhugwi.

5 Koga amwe maJuta akaba nefupa, akatola bamwe bebanhu banamimoyo yakayipa, bakakubunganya mbunga webanhu, bakatangisa bhonyongo munzi-nkulu, bakanonginilila n'umba yaJayisoni, behaka kuti babadusile kuhhe kubanhu. 6 Bakati babahaya, bakakakatila Jayisoni nebamwe bagalimoyo mbeli kwebatungamili benzi-nkulu, beyenda bemimila beti, "Balume ibaba baka poronganya hango yose batjibuya pano bo, 7 ngono Jayisoni waba wamutjila; kakale banothama zwinhu zwisingayendidzane nemilayo yaKhesari, beti kuna umwe mambo unoyi Yesu." 8 Banhu bose nebatungamili benzi-nkulu bakamon'wa pabakakuwha ikoku. 9 Bakati batjilipisa Jayisoni nebamwe, bakabaletja bakayenda.

10 Bagalimoyo bakatjimbidza bakayendesa Phawuli naSilasi busiku kuBheriya, bakati beswika bakangina musinagogu yemaJuta. 11 Koga maJuta iyawa abaka ana bunhu kupinda ekuThesalonika, ngobe aka amutjila dama nekuzwipila, eholesesa dziwhalo mahhuba ose kudze abone kuti tjoselele zwinhu izwezo zwakajalo. 12 Bunji gwabo bakagalamoyo, nebetjikadzi beTjiGiriki banjinji bana bugalo gupehhugwi nebetjilume bo. 13 Koga maJuta ekuThesalonika akati awha kuti Phawuli wasumikila dama leNdzimu kuBheriya bo, akabuya bo ewhobudzila banhu ntome emusa bhonyongo. 14 Nekulibilidza bagalimoyo bakayendisa Phawuli kugungwa, koga Silasi naThimothi bakasala ipapo. 15 Balume bakabepelekedza Phawuli bakayenda naye bakadza bakanoswika kuAthenisi; wakati atjibalayila kuna Silasi naThimothi kuti babuye kuwunli nekulibilidza, bakabva bahanduka.

16 Phawuli waka akabamilila kuAthenisi, wakadziyidzika mumeya paakabona kuti nzi-nkulu wose waka ulihhele midzimwana. 17 Ndizo wakakakabadzana nemaJuta nebanhu bakazwipila namata musinagogu, nemubugalo gunotengesegwa nebanhu bose baka bali ipapo mahhuba ose. 18 Wakahangana bo nebazibi banoyi maSitoyiki nebekuEpikuriya. Bamwe bakati, "Iwhoyu nteketi unolebani?"

Bamwe bakati, "Unonga nsumikili wemeyambi dzebanhu bakulekule." Ngobe waka esumikila nekwaYesu nemuka kubafi. 19 Bakawumbhata, bakawuhhisa kuna Ariyopagasi, beti, "Tohaka ziba kuti ini ikoku diya kutshwa kwawunoleba? 20 Ngobe unoleba zwinhu zwatisakatongowha nezebe dzedu; tohaka ziba ke kuti zwinhu izwezwi zolebani." 21 Sangwenu banhu bekuAthenisi nebahhi baka begala imhomo baka beda pedza lubaka gwabo gose kusina tjimwe tjinhu tjabanothama kuhhe kweleba kene wha tjinhu tjitshwa.

22 Phawuli wakamilika akama pakati kweAriyopagasi, akati, "Imwi balume beAthenisi, ndobona kuti ngezila dzose mubanamati kwazo. 23 Ngobe ndati ndipinda ndikalingisisa zwinhu zwamunonamata, ndikawana kuna tjibeso tjakakwagwa kuti, ‘Kundzimu usingazibgwe.’ Itjetjo tjamunonamata musingatjizibe, nditjo tjandinoleba nekwatjo mbeli kwenyu. 24 Ndzimu iye wakathama hango nezwinhu zose zwimukati, iye ali He wekudzimu nehango, haatogala mumathempeli akayetiwa nebanhu, 25 kakale haatohingigwa ngemaboko ebanhu, sekunoyi kuna tjaanotayila, sangwenu kuli iye unopa banhu bose butjilo, nemeya yabanofema, nezwinhu zose. 26 Kubva munhu un'ompela, wakayeta njudzi dzose dzebanhu, kuti bagale muhango yose, kuli kuti wabamisila zwibaka zwabo, nemiganhu yekwabanogala, 27 kuyetila kuti bahake Ndzimu, kuti swiyo banga aambamba bakawuwana. Iye haate kulekule naswi, 28 nekuti

" ‘Muwunli ndimo matinotjila neyenda kose newana mamo edu.’

Sekwakalebgwa nebamwe batetembeli benyu beti,

‘Nekuti iswi tibe tshinde lile.’

29 Saku tili tshinde leNdzimu, atizofanila kumbula kuti Ndzimu nebukulu gugwe unonga zeezi, kene siliva, kene bgwe, tjifananidzo tjemihingo yekumbula kwebanhu. 30 Ndzimu azotongoba nehanya nelubaka gwesazibgwa kukwe; koga ngwenu welaya banhu bose pose pose kuti bahanduke. 31 Nekuti wakabiga hhuba, laanowhotonga hango yose ngendulamo, ehingisa nlume waakahala; wakapa banhu bose busupi ngekwayikoku ngewumusa kubafi."

32 Bakati bewha nekwemuka kubafi, bamwe babo bakakejula; koga bamwe bakati, "Tohaka kuwha kakale uleba nekwendebo iyeyi." 33 Ndizo Phawuli wakabva pakati kwabo. 34 Koga bamwe balume bakabhatana naye bakagalamoyo, pakati kwabo kwaka kuna Diyonisiyasi ali umwe welubahhe gweAriyopagasi, nemfumakadzi unoyi Damarisi, nebamwe babaka banabo.