1 Mphirisiti nkulu akawumbhuzwa eti, "Ikoku kumalebeswa?"

2 Iye wakahandula eti. "Makamu angu namwi botate, mundiwhilile! Ndzimu wegudzo wakazwilakidza kunatate bedu Abhurahhamu batji kuMesophothamiya basanhu bakagala kuHharani. 3 Akati kubali, ‘Ibva pahango iyo nekubanhu babo, uyende kuhango yandinowhokulakidza iyo.’ 4 Ndizo bakafuluka muhango yemaKhaladiya bakanogala kuHharani. Hule kwefa kwatate babo, Ndzimu wakabadusa ikweno akabagadza muhango iyeyi yamabagele muyili; 5 koga Ndzimu azotongobapa nhaka muyili, ndibva kene ipo pangalizana nenhambo yegumbo. Koga wakabagadzabgwe kuti unowhobapa iyo, ibo netjizekugwana tjabo tjinowhohha hule kwabo, nekutobe lubaka igogo baka basina mwana. 6 Ndzimu wakalebeleka nabo nezila iyeyi. ‘Tjizekugwana tjitjo tjowhobe ntaya muhango isi yatjo, tjowhoyetiwa balanda banobhakhwa zwinogwadza kwemakole ali makulu mana. 7 Koga ndowhotonga tjaba itjetjo tjabanowhohingila sebalanda,’ kujalo Ndzimu, ‘hule kwayikoko banowhobhuda muhango iyeyo, bakandinamata mubugalo igogu.’ 8 Akakopa Abhurahhamu tjibvumilano tjethumbiwa. Abhurahhamu akaba tate baIsaka akawunthumbila muhhuba lebuhhanakadzi hule kwezwagwa kukwe. Hule kwayikoko Isaka wakaba tate baJakobe, Jakobe akaba tate babobatategulu bali gumi nebabili."

9 "Ngentha yekuti botategulu baka bana fupa nekwaJosefa, bakawuntengesa kuti anobe nlanda kuIgipita; koga Ndzimu wakaba anaye, 10 akawunsunungula mubulemo gugwe gose, akawumpa butjenjebvu akayeta kuti adiwe naFaro mambo wekuIgipita; iye wakawunthama mbhati wehango yose yeIgipita nen'umba iye yose. 11 Kwakahha bhamba muIgipita nemuKhenani kukadziyigwa kwazo, botate bedu bakahaya zodliwa. 12 Jakobe wakati awha kuti kuna zodliwa kuIgipita, akatuma botate bedu kwekutanga. 13 Bakati boyenda gwebubili, Josefa akababudza kuti ndiye yani, Faro akazibisiwa nekwehama dzaJosefa. 14 Josefa wakati kubuyiwe natate babe Jakobe nehama dzose, kwaka kuli banhu bali makumi ali kutondeka nebahanu, 15 Jakobe wakayenda kuIgipita, kwaakanofila iye nabotate bedu, 16 bakasengwa bakabgwiliziwa kuShekemu bakabiganyiwa mukumbu tjakatengwa naAbhurahhamu nemari kubakololo baHhamo muShekemu."

17 "Kwakati lubaka gwasedzela kuti Ndzimu ahhadzise tjaakagadzabgwe Abhurahhamu, banhu bakawanda muIgipita 18 kudza kuswika lubaka gwewumwe mambo wakatonga Igipita waka asingatjazibe Josefa. 19 Wakabhata banhu bakanyikwedu zwakayipa, akabatshambidzila botate bedu, ebamanikidza kuti balahe bana babo batjambozwagwa kuti basitjile. 20 Mulubaka igogo Mozisi wakazwagwa, waka akanaka mbeli kweNdzimu. Wakalegwa kwemimwedzi mitatu ali mun'umba yatatayi; 21 paakadusigwa kuhhe, nkololokadzi waFaro wakawuntola akanowunlela senkololo uwe. 22 Mozisi wakadiyiwa butjenjebvu gose gwemaGipita akabe nemasimba mukulebeleka nemuzwiyeto."

23 "Mozisi wakati atjibe nemakole makumi mana, kukaswika mumoyo uwe kuti anokumba banhu bakanyi kwabo MaIsirayeli. 24 Wakabona umwe wabo ebhakhwa zwakayipa, akawunghwila, akabgwilizila ngekhikitidza Nghipita. 25 Waka ekumbula kuti hama dzidze dzokuwhisisa kuti Ndzimu unowun'hingisa dzisunungula, koga dzaka dzisingakuwhisise. 26 Hhuba linotobela Mozisi wakawana MaIsirayeli egwa. Akayedza kuti abawangule, eti kubali, ‘Balume, muhama; mohakilani kubadzana?’ 27 Koga iwhoyo waka ethama zwakayipa kuwumwe, wakasundila Mozisi kutjena eti, ‘Ndiyani wakuthama kuti ube nlawuli nentongi pehhugwi kwedu? 28 Wehaka ndibulaya sekwawakabulaya Nghipita hhulo?’ 29 Mozisi wakati ekuwha ikoku akatihhila kuhango yeMidiyana kwaakanogala ali ntaya akazwala bakololo babili."

30 "Kwapinda makole makumi mana, ntumwa weNdzimu wakaboneka kuwunli, mudenje lemhiwa linopfuta moto, mutjilambanyika tjeDombo leSinayi. 31 Mozisi wakati ebona ikoku, akatjenamisiwa netjaaka akalinga. Paakasedzela eti anobona ali pedlo, wakawha whi laHe. 32 ‘Imi ndiNdzimu wabobatategulu babo, Ndzimu waAbhurahhamu, naIsaka, naJakobe.’ Mozisi wakatetema, akasiyedze linga. 33 He wakati kuwunli, ‘Mbula hangu dzidzo; ngobe bugalo gwawumile po mavu akayengemala. 34 Ndabona zwakwako tshambidzigwa kwebanhu bangu muIgipita, ndawha lila kwabo, kakale ndajetuka kuti ndibasunungule. Iwe tjibuya, ndokutuma kuIgipita.’ "

35 "Ndiyezwe Mozisi iwhoyu wabakalamba nematama anoti, ‘Ndiyani wakuthama kuti ube nlawuli nentongi?’ Ndzimu wakawuntuma senlawuli nensununguli, ehingisa ntumwa weNdzimu wakaboneka mudenje lemhiwa. 36 Wakabatungamila kuti babhude muhango yeIgipita athama matjenamiso nezwilakidzilo muIgipita, nepaGungwa Haba, nemutjilambanyika kwemakole ali makumi mana. 37 Ndiyezwe Mozisi iwhoyo wakabudza banhu bekuIsirayeli eti, ‘Ndzimu unowhomumusila nlebesambeli unonga imi pakati kwenyu.’ 38 Ndiye waka ali mugubungano mutjilambanyika panhu pan'ompela nentumwa weNdzimu wakalebeleka naye paDombo leSinayi, nabotate bedu; akawamutjila matama ebutjilo akawawamutjidza nekutili bo."

39 "Botate bedu bakalamba wuwhilila. Koga bakawunsundila ntome, mumimoyo yabo bakabgwilila kuIgipita, 40 beti kuna Aroni, ‘Utithamile midzimwana inowhotitungamila; ngobe iwhoyu Mozisi wakatitungamila tibva kuhango yeIgipita, atitjaziba kuti kwayetikani kuwunli!’ 41 Ndigo lubaka gwabakabumba ndzimwana wemhulu, bakahhisa tjibhayilo kundzimwana, bakahanhila mihingo yemaboko abo. 42 Koga Ndzimu wakabafupatila, akabasiya kuti banamate zwivoneko zwekumakole. Sekwakwaka kwagwa mulukwalo gwebalebesambeli.

" ‘Imwi banhu beIsirayeli,

makatongondipa zwibhayilo zwemhuka nemipilo,

kwemakole ali makumi mana mutjilambanyika?

43 Makasenga thebhanekili laMoloki,

nenyenyedzi yendzimwana wenyu Refani, zwifananidzo zwamakazwitila kuti muzwinamate.

Ndizo ndemutatila mbeli kweBhabhiloni.’ "

44 "Bobatategulu baka bana thebhanekili lebusupi mutjilambanyika. Laka layetiwa sekwaka kwalebgwa ngewakabudza Mozisi kuti lithamiwe tjini, kufanana nezila yaaka abona. 45 Hule kwekube bawamutjila thebhanekili, botate bedu bakabuya nalo betungamigwa naJoshuwa pabakatolela hango dzimwe njudzi dzaka dzatakhwa neNdzimu. Lakaba ipapo kudzina kunoswika lubaka gwaDavida, 46 iye wakadiwa zwe neNdzimu, akakumbila kuti abakile Ndzimu waJakobe bugalo. 47 Koga ndiSolomoni wakawhobakila Ndzimu n'umba.

48 "Koga, uPehhugwihhugwi atogala mudzin'umba dzakabakiwa nebanhu. Sekwakalebgwa nenlebesambeli eti.

49 " ‘Kudzimu tjigalo tjangu tjebumambo,

hango tjigadziko tjemakumbo angu.

In'umba yakatini yamungandibakila?

Kene guyayi bugalo pandinganyaluluka? Unojalo He.

50 Haata maboko angu akabumba zose zwinhu izwezwi?’

51 "Imwi banhu bemitshibha yakawoma, basakathumbigwa mumimoyo nemuzebe! Makafanana nabotate benyu. Mogala mulamba Meya Yakayengemala! 52 Ndiwupi webalebesambeli wabasakadziyidza botate benyu ibabo? Bakabulaya banhu bakalebesambeli hha kweWakalulama, iyezwe imwi wamatjitengesa mukabulaya, 53 imwi makawamutjila nlayo wakahhisiwa nebatumwa beNdzimu koga amuzowuntobela."

54 Bakati bewha ikoku bakamon'wa bakalobanya meno. 55 Koga iye alihhele Meya Yakayengemala, wakalinga kudzimu akabona gudzo leNdzimu, naYesu alimile kuludli gweNdzimu, 56 akaba eti, "Lingani, ndobona kudzimu kwakahhuka, neNkololo wenhu alimile kuludli gweNdzimu."

57 Bakamimila nemawhi apehhugwi, bakazwina zebe dzabo, bakalabuka panhu pan'ompela beyenda kuwunli, 58 bakawunhhuhhuta bewundhusila kuhhe kwenzi-nkulu, bakawunkhikitidza ngemabgwe, basupi bakabiga zwiyambalo zwabo pamakumbo ewumwe nhhuhha unoyi Sawuli. 59 Pabaka bewunkhikitidza ngemabgwe, Sitefani wakatembezela eti, "He Yesu, wamutjilani meya yangu." 60 Akabe epfigama akadanilila newhi lipehhugwi, eti, "He musibabone nlandu nekwejinyo ileli." Hule kwekuti aleba ikoku akayezela.