1 Kwakati limwe hhuba Phethiro naJohane beyenda kuthempeli mulubaka gwe awa yebuhhanalume kubvisila hhuba libhuda, latewuka, guli lubaka gwentembezelo. 2 Umwe nlume waka ali tjilema kubvila pakuzwagwa kukwe, waka esengewa mahhuba ose esiwa pankoba wethempeli unoyi Nkoba Wakanaka kuti akumbile zwipo kuna baka bengina muthempeli. 3 Wakati ebona Phethiro naJohane betjowhongina muthempeli, akakumbila kuti bawumpe zwipo. 4 Phethiro wakawunlingisisa, anaJohane, akati kuwunli, "Utilinge!" 5 Akabalinga ekumbulila kuti unowhowana tjimwe tjinhu kubali. 6 Koga Phethiro wakati kuwunli, "Andina siliva nezeezi, koga ndokupa kwandinako; muzina laYesu Khirisitu wekuNazaretha, milika uyende!" 7 Akabe ewumbhata neluboko gweludli akawumilidza. Tjinyolotjo makumbo awe nezwingoringori kwakabva kwasima; 8 wakatjuluka akama nemakumbo awe, akatangisa yendayenda akangina nabo muthempeli, eyenda etjulukana elumbidza Ndzimu. 9 Banhu bose baka bali mukati bakawumbona eyenda elumbidza Ndzimu, 10 bakati bebona kuti ndiye waka egala paNkoba Wakanaka wethempeli ali tjikumbili, bakatjenama kuti ini tjayetikala kuwunli.

11 Wakati etjakakwakwatila Phethiro naJohane bali mugutukutu laSolomoni, sekwalaka lidan'wa, banhu bakalabuka behha kubali bakatjenama. 12 Phethiro wakati ebona banhu, akati kubali, "Banhu bakanyi kwedu bekuIsirayeli, motjenamisiwa neni muna ikoku, kakale motilingilani zwingapa kunga kunoyi tathama kuti iwhoyu nhu ayende ngemasimba edu nebuyengemali gwedu? 13 Ndzimu waAbhurahhamu, naIsaka, naJakobe, Ndzimu wabobatategulu bedu, wakapa gudzo kuna Yesu nlanda uwe. Iye wamakatula mbeli kwaPilatu mukawunlandula, nekutobe wakabe akumbula kuti awunletje ayende. 14 Waka akayengemala akalulama, koga imwi makawunlandula, mukahala kuti musununguligwe mbulayi. 15 Makabulaya iye unotungamilila kubupenyu, koga Ndzimu wakawumusa kubafi. Ngono iswi tibasupi bayikoku. 16 Ngezina lile, nange galamoyo muzina lile, kwathama kuti nlume iwhoyu wabe ali tjilema wamunobona kakale wamunoziba asime; whugalamoyo muzina laYesu kwathama kuti anaye mbeli kwenyu mose."

17 "Sangwenuke, hama dzangu, ndoziba kuti makakuthama nekusaziba, sekwakathama bo batungamili benyu. 18 Koga Ndzimu tjaakaleba ntolontolo ehingisa balebesambeli, kuti Khirisitu unowhodziyidzika; wakakuhhadzisa. 19 Handukani, mubgwilile kuNdzimu, kudze muyetigwe mazwibhatigwa matjinyo enyu, 20 kuyetila kuti zwibaka zwenyaluluka zwihhe zwibva mubuyapo gwaHe, nekuti amutumile Khirisitu Yesu waakamuhalulila iye, 21 iye wakafanila gala kudzimu kudzina kunoswika lubaka gwekuti zwinhu zose zwakalebgwa neNdzimu ngemilomo yebalebesambeli bakayengemala bantolo zwihhadzisike. 22 Ngobe Mozisi wakati, ‘He Ndzimu wenyu unowhomutumila nlebesambeli, unowhobe umwe webanhu bakanyi kwenyu sami. Muwhilile zwinhu zose zwaanowhomubudza kuti muzwithame. 23 Kowhoyetikala kuti umwe nemwe usingowhowuwhilila nlebesambeli iwhoyo unowhopalalanyiwa nebanhu akapaladziwa.’ 24 Balebesambeli bose bakalebeleka kubvisila kuna Samuyeli, nebamwe bakawuntobela, bakabeleba matama iwo zwawo ezwinhu zwinoyetikala mumahhuba ano. 25 Mubakololo bebalebesambeli nebetjibvumilano Ndzimu tjaakapa bobatategulu benyu, eti kuna Abhurahhamu, ‘Kubvila mutjizekugwana tjitjo ludzi gose gwamuno muhango gowhokombolegwa.’ 26 Ndzimu, atjihala nlanda uwe, wakawuntuma kumuli kutanga, kuti amukombolele ngeyeta kuti muhanduke muzila dzenyu mbi."