1 Kwakati hhuba lePhentekhositi laswika, baka bakakubungana panhu pan'ompela. 2 Tjinyolotjo kwakawhakala nsindo ubva kudzimu unonga wemhepo inohhuhhudza nemasimba, ukahhala n'umba yose pabaka baligele. 3 Bakabona kunofanana nendimi dzemoto, dzakakopalalana dzikawila pehhugwi kwabo bose. 4 Bose bakahhala Meya Yakayengemala bakatangisa lebeleka nedzimwe ndimi, sekwabakapiwa ngeMeya kuti balebe.

5 Kwaka kuna maJuta aka egala muJerusalema, balume bakazwipila bakabebva muhango dzepasi lose. 6 Bakati bewha hhoba, kukakubungana mbunga nkulunkulu, bose bakatjenama, ngobe umwe newumwe wakabawha belebeleka nelulimi gugwe gwekwaakazwagwa. 7 Bakatjenama bakati, "Banhu ibaba banolebeleka abate bekuGalile? 8 Ngono nentha yeni tibawha belebeleka nendimi dzedu dzekwatakazwaligwa? 9 Tobva kuPhathiya, nekuMedesi, nekuElamu, nekuMesophothamiya, nekuJudiya, nekuKhapadosiya, nekuPhontiyu, nekuAsiya, 10 nekuPhurayijiya, nekuPhamfiliya, nekuIgipita, nedzimwe ntha dzekuLibhiya pedlo neKhureni. Bamwe bezi banobva kuRoma, 11 maJuta neBataya bakahanduligwa kulunamato gwetjiJuta, bamwe bedu banobva kuKhiriti nekuArabhiya, koga tose tobawha belebeleka nendimi dzedu beleba mihingo mikulu yakayetiwa neNdzimu." 12 Kwakabahanganya miholo, bakabhuzwana beti, "Kolebani ikoku?"

13 Koga bamwe bakabakejula beti, "Balume ibaba bakalaladzisiwa newayini ndzwa."

14 Phethiro wakakotjimilika nebamwe bapositoli bali gumi newun'ompela, akatangisa lebeleka nembunga ngewhi lipehhugwi eti, "Banhu beJudiya namwi mose banogala muJerusalema, whililani kundili ndimubudze kuti ikoku kobva kutini. 15 Banhu ibaba abazolaladza sekwamunokumbulila; ngwenuwali lubaka gwe awa yebutatu kubvisila bhuda kwehhuba. 16 Koga whoku ndiko kwakalebgwa naJoweli nlebesambeli eti,

17 " ‘Whoku ndiko kwandinowhothama mumahhuba ebupelo, kojalo Ndzimu.

ndowhodululila Meya yangu pehhugwi kwebanhu bose.

Bakololo nebakololokadzi benyu banowholebesambeli;

bahhuhha benyu banowhobona zwilakidzilo,

banhutana benyu banowhowolota mawoloto.

18 Kene nekubalanda nebalandakadzi bangu,

ndowhodululila bo Meya yangu mumahhuba iyawo,

banowholebesambeli.

19 Ndowhoyeta makaabadzo muhhuhhugwi

nematjenamiso pasi pano muhango.

Kowhobe nemalopa, nemoto, nebusi gwakazwinikidza*;

20 hhuba lowhodzimwa kukabe hhalima,

mwedzi ukahandugwa ukabe malopa,

kose ikoku kowhoyetikala hhuba gulu laHe linotjenamisa lisanhu laswika.

21 Yani nayani unodana zina laHe unowhotjidziwa.’ "

22 "Whililani matama iyawa, imwi balume bekuIsirayeli! Yesu wekuNazaretha, nlume wakalakidza masimba ekudzimu akabon'wa patjena ngemakaabadzo nezwilakidzilo zwakayetiwa neNdzimu ehingisa iye. Mose mokuziba ikoko, ngobe kwakayetiwa pakati kwenyu, 23 Yesu iwhoyo wakatuligwa mumaboko enyu kuyendidzana nendongoloso yeNdzimu; imwi mukawumbulaya nekuti makalekedza banhu basina nlayo bakawunkowhomela patjileyanyo. 24 Koga Ndzimu wakawumusa kubafi, akawunsunungula kumasimba ago, nekuti kwaka kusingake kukayetikala kuti lufu guwumbhatilile. 25 Nekuti Davida wakati eleba nekukwe akati,

" ‘Ndakabona He ali mbeli kwangu lubaka gose,

upedlo nami, kakale anditowhozunguziwa;

26 Ndizo ke moyo wangu unakuhanha

nematama angu ahhele kuhanha;

nembili wangu unowhogala mukugalabgwe.

27 Nekuti amutowhosiya meya yangu ili muHhedesi*;

amutowhobvumila wakaYengemala wenyu kuti abole.

28 Makandizibisa zila dzebupenyu,

kakale buyapo gwenyu gowhondihhadza nekuhanha.’ "

29 "Hama, ndolebeleka namwi ndinatjilopa nekwabatategulu bedu Davida bamunoziba mose. Bakafa bakabiganyiwa, nekumbu tjabo tjipano patiyapo kudzina kube nasi. 30 Baka bali nlebesambeli, kakale beziba kuti Ndzimu wakabagadzabgwe kuti unowhogadza umwe wetjizekugwana tjabo patjigalo tjabo tjebumambo. 31 Davida waka abona kuti Ndzimu unowhothamani mulubaka gunotobela, ndizo ke wakalebeleka nekwemuka kwaKhirisitu eti,

" ‘Haazosiyiwa muHhedesi;

kakale mbili uwe awuzobola.’

32 Yesu iwhoyo, Ndzimu wakawumusa kubafi, kakale tose tibasupi bayikoku. 33 Wakamilidzigwa kuluboko gweludli gweNdzimu, atjiwamutjila Meya Yakayengemala inobva kuna Tate sekwabakagadzabgwe, watjidulula ikoku kwamunobona nekwamunowha. 34 Ngobe Davida azowulukila kudzimu; koga iye tjekukwe wakati,

‘He wakati kuna He wangu.

Gala kuluboko gwangu gweludli,

35 ndidze ndiyete zwita zwizo kuti zwibe tjigadziko tjemakumbo awo.’

36 "Banhu bose beIsirayeli ngabazibe zwakwako kuti Yesu iwhoyu, wamakakowhomela patjileyanyo, ndiyezwe watiwa neNdzimu kuti abe He kakale abe Khirisitu!"

37 Banhu bakati bewha ikoko bakadziyidzika mumimoyo, bakati kuna Phethiro nebamwe bapositoli, "Tithameni hama dzedu?"

38 Phethiro wakati kubali, "Handukani mumatjinyo enyu mubvubikiwe muzina laYesu Khirisitu kuti muyetigwe mazwibhatigwa matjinyo enyu, kuti mukowamutjila tjipo tjeMeya Yakayengemala. 39 Ngobe tjigadzabgwe ndetjenyu nebana benyu, nebamwe bose banowhodan'wa naHe Ndzimu wedu."

40 Wakapa busupi ne amwe matama manjinji kakale akabakuludzila, eti, "Muzwitjidze mutjizekugwana itjetji tjakayipa!" 41 Banjinji babo bakagalamoyo matama awe bakabvubikiwa, muhhuba ilelo kwakapamhidzigwa banhu bali zwiwulu zwitatu. 42 Bakayendila mbeli muzwidiyo zwebapositoli nekuzwipila, bedlidzana, nepemulilana tjinkwa netembezela.

43 Wose nhu wakahhigwa nehla kukulu bapositoli pabaka bethama matjenamiso manjinji nezwilakidzilo zwinjinji. 44 Banogalamoyo bose baka bali panhu pan'ompela bedlidzana, kakale bekobelana zwinhu zose zwabaka banazo. 45 Bakatengesa zwinhu zwabaka banazo bakakobelana mari nebamwe bose kuyendidzana nekuti baka bana zwinotayila zwingapani. 46 Hhuba nehhuba baka bekubungana muthempeli, kakale baka bekobelana tjinkwa kudzin'umba dzabo bedla zodliwa bali panhu pan'ompela, nemimoyo yabo yakahalabvuka inakuhanha, 47 belumbidza Ndzimu, bediwa nebanhu bose. He wakapamhidzila banhu baka betjidziwa kugubungano labo mahhuba ose.