1 Wakaswika kose nekuDebhi nekuLisitira. Kwaka kuna umwe ndhiyiwa waka ali ipapo, waka eyi Thimothi, meyabe baka bali Njhuta, beli nghalimoyo; koga tatayi baka bali Nghiriki. 2 Bagalimoyo bekuLisitira nekuIkhoniyamu baka beleba zwakanaka nekukwe. 3 Phawuli waka ehaka kuti Thimothi awumpelekedze; akawuntola akawuthumbila eyetila maJuta aka ali mumitunhu iyeyo, ngobe ose aka eziba kuti tate babe uNghiriki. 4 Baka beti hapa bepinda mumizi-mikulu, bebazibisa tjaka tjabvumigwaniwa nebapositoli nebawhola baka bali kuJerusalema. 5 Ndizo makubungano etshipi akasimisiwa mukugalamoyo, kakale akawanda mahhuba ose.

6 Bakapalama muntunhu wePhurayijiya neGalathiya, kuli kuti balambisiwa neMeya Yakayengemala kuti basumikile dama muAsiya. 7 Bakati baswika pakalingisana neMayisiya, bakayedza kuti bayende kuBhithiniya, koga Meya yaYesu ayizobabvumila; 8 ndizo bakati bapinda Mayisiya, bakajitila kuThirowasi. 9 Phawuli akabona tjilakidzo busiku. ebona nlume wekuMakhedoniya alimile ewunkumbila eti, "Yambukilani ngeno kuMakhedoniya mutibhatshe." 10 Hule kwebona tjilakidzilo, tjinyolotjo takazwilulamisila yenda kuMakhedoniya, tikutola sekuti Ndzimu watidana kuti tinosumikila ndebo mbuya kubali.

11 Takati timilika paThirowasi tikayenda nekepe takalinga kuSamothiresi, hhuba linotobela tikayenda kuNeyapholisi, 12 timilikapo tikayenda kuFiliphi, unobe uli nzi-nkulu wekutanga muntunhu weMakhedoniya, uli pasi kwebutungamili gweRoma. Takagala munzi-nkulu iwhoyo kwemahhuba; 13 nsi weSabatha takayenda kuhhe kwenzi pawhunde yegwizi, kwataka tikumbulila kuti kungabe nebugalo gwetembezela; tikagala pasi kuti tilebeleke nebafumakadzi baka bakubungana panhu pan'ompela. 14 Umwe webaka bakatiwhilila umfumakadzi waka eyi Lidiya, waka ebva kunzi-nkulu weThiyathira, waka etengesa matjila ana mbala n'haba, waka enamata Ndzimu. He wakahhula moyo uwe kuti awhilile tjaka tjilebgwa naPhawuli. 15 Wakati abvubikiwa iye nen'ha uwe wose, akatikumbila eti, "Hapa mandibona ndili nhu unogalamoyo kunaHe, ihhani muwhogala kun'umba yangu." Akatikulila ngematama.

16 Tikati toyenda kubugalo kunotembezelegwa, tikahanganidziwa nensikana unlandakadzi unameya yekandila waka ehhisila bobatezi babe mari njinji ngekandila kukwe. 17 Wakatobela Phawuli naswi tose edanilila eti, "Balume ibaba balanda beNdzimu Upehhugwihhugwi, banomubudza zila yetjidziwa." 18 Wakakuthama kwemahhuba manjinji. Kudzina Phawuli emon'wa, wakahanduka akati kumeya iyeyo, "Ndokulaya muzina laYesu Khirisitu kuti ubhude muwunli." Ikabhuda tjinyolotjo. 19 Koga bobatezi babe bakati bebona kuti tjababegalabgwe kuti tjowhobapa mari tjayenda, bakabhata Phawuli naSilasi bakabahhuhhutila panotengesegwa bakabasa mbeli kwebutungamili; 20 bakati babahhisa kubatongi bemilandu bakati, "Balume ibaba maJuta, kakale banoporonganya nzi-nkulu wedu. 21 Banodiya milenje isimunlayo kuti iswi tili maRoma tiyibvume kene tiyitobele." 22 Mbunga wakanginilila bo ukagwisa Phawuli naSilasi.

Batongi bemilandu bakapalula zwiyambalo zwabo bakati basukutigwe. 23 Bakati babaloba kwazo, bakabaposela mujele, belaya nlindi wejele kuti abatjengete. 24 Wakati alayiwa, akabasa mujele lamukatikati akabasungilila makumbo pamhanda.

25 Koga pakati kwebusiku Phawuli naSilasi baka betembezela bemba njimbo dzeNdzimu, basungwa baka bakabawhilila, 26 tjinyolotjo kwakabe nekutengenyeka kwehango, mbviwa dzejele dzikazunguzika; tjinyolotjo mikoba yejele ikahhuka, nketane dzaka dzakasunga banhu dzikasununguka dzose. 27 Nlindi wejele paakamuka, wakabona mikoba yejele yakahhuka, akahomola bhangatjeke kuti azwibulaye nalo, ekumbula kuti basungwa batihha. 28 Koga Phawuli wakamimila newhi gulugulu eti, "Usizwikubadze, tiyapo tose."

29 Wakakumbila zwivoneko akalabuka engina mukati, etetema neluhlo akawila mbeli kwaPhawuli naSilasi, 30 akabadusila kuhhe akati, "Balume, ndithameni kudze nditjidziwe?"

31 Ibo bakati, "Galamoyo muna He Yesu, nowhotjidziwa, iwe nen'ha uwo wose." 32 Bakasumikila dama laHe kuwunli nekubanhu bose baka bali mun'umba iye. 33 Wakabatola lubaka gwebusiku igogo, akabangudza mabanga abo, akabva abvubikiwa tjinyolotjo, kose nen'ha uwe wose. 34 Akakotjiyenda nabo kun'umba iye, akabapa zodliwa; wakahanha kwazo ngobe waka atjigalamoyo kuNdzimu, iye nen'ha uwe wose.

35 Kwakati kwayedza, batongi bemilandu bakatuma mapholisa, beti, "Mubaletje bayende."

36 Nlindi wejele wakaleba matama iyawo kuna Phawuli, eti, "Batongi bemilandu bati muletjewe muyende; ndizo sangwenu tjibhudani muyende nekunyalala."

37 Koga Phawuli wakati kubali, "Batiloba mbeli kwebanhu, tisina landu, iswi tili bazwagwa bemuRoma, bakatiposela mujele, ngono ngwenu boyehaka kuti batiduse nezila yakasumbikika? Ayi! Ngababuye ibo bawhotidusa."

38 Mapholisa akabudza batongi bemilandu matama iyawa, bakahla bose pabakawha kuti baka bali bazwagwa bemuRoma. 39 Ndizo bakabuya bewhokumbila mazwibhatigwa kubali. Bakabadusa bakabakumbila kuti babhude munzi-nkulu. 40 Bakabhuda mujele, bakakumba Lidiya; bakati babona bagalimoyo, bakabasimisa bakamilika boyenda.