1 Sawuli wakabvumilana nebulawa kukwe.

Muhhuba ilelo gubungano letshipi muJerusalema lakadziyidziwa kwazo, bose bakapalala bakatihhila kuntunhu wekuJudiya neSamariya, kuhhe kwebapositoli boga. 2 Balume bakazwipila bakabiganya Sitefani, bakawunlilila kwazo.

3 Koga Sawuli wakatangisa paladza gubungano letshipi, eyenda engina imwe neyimwe n'umba, ekakata bagalimoyo betjilume nebetjikadzi ebaposela mujele.

4 Bagalimoyo ibabo bakapalala bakayenda besumikila dama pose pabanoyenda. 5 Filiphi wakayenda kunzi-nkulu wekuSamariya akanosumikila nekwaKhirisitu. 6 Mabunga ebanhu paakawha Filiphi elebeleka kakale bebona matjenamiso aaka ethama, bakawhilila ngemoyo un'ompela nange njele tjaaka eleba. 7 Meyambi dzakadzibhuda mubanhu dzilila kwazo, nebanjinji baka bakalobgwa negulukadzi kene baka bali zwilema bakapodzewa. 8 Ndizo kwakaba nekuhanha kukulu muna iwhoyo nzi-nkulu.

9 Kwaka kuna umwe nlume waka eyi Simoni egala munzi-nkulu iwhoyo, waka atjenamisa tjaba tjeSamariya ngemasalamusi awe. Nekuti waka ezwita nhu nkulukulu. 10 Banhu bose munzi-nkulu, bakulu nebatukununu, baka bewuwhilila, beti, "Iwhoyu nlume umasimba eNdzimu anodan'wa eyi Makulu." 11 Baka bewuwhilila ngentha yekuti lubaka gwaka gwatjibe gulefu egala ebatjenamisa nemasalamusi awe. 12 Koga bakati bagalamoyo Filiphi esumikila ndebo mbuya yebumambo gweNdzimu nezina laYesu Khirisitu, bakabvubikiwa, bose betjilume nebetjikadzi. 13 NaSimoni bo wakagalamoyo, akati atjibvubikiwa akagala akazwisesekedza kuna Filiphi. Ebona zwilakidzilo nematjenamiso makulu aka eyetiwa wakatjenama kwazo.

14 Sangwenu kwakati bapositoli bakuJerusalema bawha kuti Samariya yawamutjila dama leNdzimu, bakatumila Phethiro naJohane, 15 ibo bakati baswika bakabatembezelela kuti bawamutjile Meya Yakayengemala; 16 nekuti yaka isanhu yajitila pehhugwi kwabo bose, baka babvubikiwa muzina laHe Yesu koga. 17 Bakababiga maboko bakawamutjila Meya Yakayengemala.

18 Simoni wakati ebona kuti bapositoli banobiga banhu maboko bakawamutjila Meya, akabaswiswa mari, 19 eti, "Mundipe bo masimba iyawa kuti nhu wandinobiga maboko, awamutjile Meya Yakayengemala."

20 Koga Phethiro wakati kuwunli, "Siliva iyo ngayife nawe, nekuti unokumbula kuti ungatenga tjipo tjeNdzimu nemari! 21 Awuna bugalo kene gobe mundebo iyeyi, nekuti moyo uwo awuzotambunuka mbeli kweNdzimu. 22 Handuka usiyane nebubi gugo igogu, utembezele kuna He kuti hapa kuyetikala akuyetile mazwibhatigwa ba nenkumbulo wakajali. 23 Nekuti ndobona kuti unafupa kakale umubusungwa gwezwiyeto zwibi."

24 Simoni wakabahandula eti, "Tembezelani kuna He kuti kusitongobe netjimwe tjezwinhu zwawaleba tjinowhoyetikala pehhugwi kwangu." 25 Sangwenu bakati bapa busupi kakale basumikila dama laHe, bakabgwilila kuJerusalema, beyenda besumikila ndebo mbuya mumizi minjinji yeMaSamariya.

26 Koga ntumwa waHe wakati kuna Filiphi, "Milika uyende kuburwa, kumwaha unobva kuJerusalema unoti kuGaza." Umwaha usingatjahingisiwe. 27 Akamilika akayenda. Linga, kwaka kuna nlume wekuIthiyopiya, ali nsunugwa, waka ehingila Khandesi, mambokadzi weIthiyopiya, ali iye mbhati wedzimari, waka abuya kuJerusalema ewhonamata, 28 wakati obgwilila aligele mukoloyi iye, waka ebala matama enlebesambeli Isaya. 29 Meya ikati kuna Filiphi, "Labuka ubhatisane zila nekoloyi iyeyi." 30 Filiphi akalabuka eyenda kuyili, akawuwha ebala lukwalo gwenlebesambeli Isaya, akawumbhuzwa eti, "Unowhisisa tjawunobala?"

31 Wakahandula eti, "Ndingawhisisa tjini kusina wanditjenesela?" Eba ekumbila Filiphi kuti atanhe mukoloyi. 32 Sangwenu ke tjikamu tjelukwalo tjaaka ebala kwaka kuli yetji.

"Semhwizi inonobulayiwa

kene semhwizana imbeli kwenteseli wayo yakanyalala,

nayiye haazotongohhula nlomo uwe.

33 Mukulengudziwa kukwe wakalambigwa kuti nlandu uwe ubhakhwe nezila yakatambunuka.

Ndiyani ungaziba nekwetjizekugwana tjitje?

Ngobe butjilo gugwe gwakawhapugwa kubva muhango."

34 Nsunugwa wakati kuna Filiphi, "Nlebesambeli waka eleba nekwaani ipapa, ndokumbila undibudze, waka ezwibva iye kene waka ebva umwe?" 35 Filiphi akabe ehhula nlomo, ewumbudza ndebo mbuya yaYesu etangisila pana iyeyo ndima yelukwalo. 36 Bakati betjayenda mumwaha bakaswika pana vula, nsunugwa akati, "Bona, yeyi vula! Ini tjingandikonesa kuti ndibvubikiwe?" 37 (Filiphi wakati, "Hapa ugalamoyo nemoyo uwo wose, unotubula." Iye akahandula eti, "Ndogalamoyo kuti Yesu Khirisitu ndiye nkololo weNdzimu.")

38 Wakabudza banhu babe kuti bamise koloyi. bakajetuka bubili gwabo bakangina muvula, Filiphi nensunugwa, akawubvubika. 39 Bakati bebhuda muvula, Meya yaHe ikawhapula Filiphi; nsunugwa akasala asingatjawumbone, akayendila mbeli zwe akahanha kwazo. 40 Koga Filiphi wakabon'wa abe kuAzotasi, waka eyenda engina mumizi yose imuzila esumikila kudzina kunoswika kuKhesariya.