1 "Makamu nabotate, whililani kuzwimila kwandinoyeta mbeli kwenyu." 2 Bakati bewha kuti unolebeleka nabo nelulimi gweTjiHhebheru, bakanyalala kwazo.

Eba eti. 3 "NdiNjhuta, wakazwaligwa muThasasi kuSilisiya, koga ndakakulila munzi-nkulu uno, ndikadiyiwa pamakumbo aGamaliyeli nekwezila yenlayo wabotate bedu, ndaka ndakazwipila hingila Ndzimu sekwamunoyeta bo imwi nasi. 4 Ndakadziyidza Zila iyeyi kuswika palufu, ndisunga betjilume nebetjikadzi ndibaposela mujele, 5 semphirisiti nkulu nelubahhe gwebawhola bose bengapa busupi kuti ndoleba lebeswa. Ndakawamutjila whalo dzinobva kubali dziyenda kubamwe babo bakuDamasikasi, ndizo ndakayenda ikweno ndinosunga banhu ibaba kudze ndibalesi kuJerusalema bakasungwa ngemiketane kuyetila kuti bawholangiwa."

6 "Nditjimugwendo gwangu ndiyenda kuDamasikasi, kungaba pakati kwemasikati kwakapenya tjedza tjinobva kudzimu pandiyako. 7 Ndiba ndiwila pasi awha whi liti kundili, ‘Sawuli, Sawuli, unondidziyidzilani kene?’ 8 Ndikahandula nditi, ‘Ndimwi yani, He?’ Akati kundili, ‘Ndimi Yesu wekuNazaretha wawunodziyidza.’ 9 Bandaka ndinabo bakabona tjedza koga whi lewaka elebeleka nami abazoliwha. 10 Ndiba nditi, ‘Ndithameni ngono, He?’ He bakati kundili, ‘Milika uyende kuDamasikasi, ikweno nowhobudziwa kose kwawakamisigwa kuti ukuyete.’ 11 Ndakati ndisingatjabone ngentha yepenya kwetjedza, ndikakotungamigwa ndakabhakhwa luboko nayibabo bandaka ndiyenda nabo, ndikayenda kuDamasikasi."

12 "Umwe nlume unoyi Ananiyasi, waka akalulama etobela nlayo, kulebgwa zwakanaka nekukwe ngemaJuta ose anogala imhomo, 13 wakahha kundili, akati abemile ntome kwangu akati, ‘Gamu langu Sawuli, wamutjila bona kuko.’ Ngetjibaka itjetjo zwatjo ndakapofunuka, ndikawumbona. 14 Eba eti, ‘Ndzimu wabobatategulu bedu wakuhalula kuti uzibe kuda kukwe, kuti ubone Iye Wakalulama kakale uwhe whi linobva munlomo uwe; 15 ngobe nowhoba nsupi uwe kubanhu bose muna zwawabona nezwawawha. 16 Sangwenu utjimilileni? Milika ubvubikiwe, ungudziwe matjinyo awo, udana zina lile.’ "

17 "Ndakati ndabgwilila kuJerusalema nditjatembezela ndili muthempeli, aswikigwa nembono, 18 ndikabona He beti kundili, ‘Libilidza ubhude tjinyolotjo muJerusalema, ngobe abatowhowamutjila busupi gugo nekwangu.’ 19 Ndiba nditi, ‘He, ibo tjekwabo banoziba kuti ndaka ndiyenda muyimwe neyimwe sinagogu ndihhalilila mujele kakale ndiloba banogalamoyo mumuli. 20 Kakale kwakati kutebugwa lopa laSitefani, nsupi wenyu, ndaka ndilimile ipapo bo, ndibvumila bulawa kukwe ndakabhata zwiyambalo zwayibabo baka bewumbulaya.’ 21 He beba beti kundili, ‘Yenda, ngobe ndowhokutuma kule kule kuBataya.’ "

22 Banhu bakawuwhilila akadza akaswika pakuleba dama ileli; bakakotjimimila beti, "Dusani muhango nhu wakajali! Ngobe haazofanila kuti atjile!" 23 Baka bemimila belahanya zwiyambalo zwabo, bepukula whuluba, 24 nlawuli webagwi bengwa akalaya kuti bawunginise munzi webagwi bengwa, akabalaya kuti aholesesewe ngesukutigwa, kudze kuzibgwe kuti ini tjayeta kuti banhu bathame hhoba zwingapa nekukwe. 25 Bakati batjiwunsunga nemitjili kuti asukutigwe, Phawuli akati kunlawuli webagwi bengwa waka alimile ntome kukwe, "Kobvumigwa kuti musukutile nhu wekuRoma, asawanikwa nlandu?"

26 Ntungamili webagwi bengwa wakati ekuwha ikoku akayenda kunlawuli webagwi bengwa akati kuwunli, "Ini ikoku kwawehaka thama? Ngobe iwhoyu nlume unhu wekuRoma."

27 Ndizo nlawuli webagwi bengwa wakati kuna Phawuli, "Tongondibudza, unhu wekuRoma kene?"

Iye wakahandula eti, "Ee."

28 Nlawuli webagwi bengwa eba eti, "Ba nghali wekuRoma ikoku ndakakutenga nentengo usin'homa."

Phawuli eba ehandula eti, "Koga imi ndi iye ngezwagwa."

29 Koga ibabo baka behaka kuti bawun'holesese bakatsheduka pawunli tjinyolotjo; nlawuli webagwi bengwa akatangisa hla bo, kana wakabona kuti Phawuli unghali wekuRoma koga iye waawunsunga.

30 Koga tjimuka, nlawuli webagwi bengwa ehaka ziba itjo ntja tjakayeta kuti maJuta awunlonge nlandu, wakawunsunungula, akalaya kuti baphirisiti bakulu nelubahhe guhangane, akahhisa Phawuli akawunghadza mbeli kwabo.