1 KuKhesariya kwaka kuna umwe nlume unoyi Khoneliyasi, waka ali nlawuli webagwi bengwa bali gulu, belubabi gwaka gudan'wa guyi ngwa yeIthali, 2 nlume wakazwipila kakale ehla Ndzimu, iye nen'ha uwe wose, waka epa banhu zwipo akahalabvuka, kakale etembezela kuNdzimu lubaka gose. 3 Mu awa yebuhhanalume kubvisila hhuba libhuda, wakabona ntumwa weNdzimu mutjilakidzo eti kuwunli, "Khoneliyasi."

4 Wakawunlingisisa ehla, akati, "Ini He?"

Ntumwa weNdzimu wakahandula eti kuwunli, "Mitembezelo iyo nezwipo zwizo kwanoswika setjikumbuludzo kuNdzimu. 5 Ngono ke tjitumila balume bayende kuJopha, banobuya nenlume unoyi Simoni, una limwe zina linoyi Phethiro; 6 unogala newumwe unoyi Simoni, nsuki wemakukuta, unan'umba intome kwegungwa." 7 Ntumwa weNdzimu waka elebeleka naye wakati ayenda, akadana balanda babe babili, newumwe webagwi bengwa wakazwipila waka ewun'hingila, 8 apedza balondesedzela kose, wakabatuma kuJopha.

9 Hhuba linotobela, bakati batjimugwendo bosedzela pedlo nenzi-nkulu, Phethiro akayenda pehhugwi kwen'umba enotembezela, masikati mu awa yebutanhatu kubvisila hhuba libhuda. 10 Akabe nehhala akayemula tjinodliwa; koga bakati batjabhika, akabe onga nhu wayizela 11 akabona kudzimu kuhhuka, kukajetuka tjimwe tjinhu, tjinonga jila, lakabhakhwa ngentha dzilina likaswika pano pasi. 12 Mukati kwalo kwaka kuna njudzi dzose dzemhuka dzina makumbo mana nezwibandana zwemuhango, nenyunyi dzose dzemumhepo. 13 Kukaswika whi kuwunli liti, "Milika Phethiro, bulaya udle."

14 Koga Phethiro wakati, "Hayi aa, He; ngobe andanhu ndikatongodla tjinhu tjinahambgwa kene tjisakatjena."

15 Whi lakaswika kuwunli gwebubili liti, "Usiti tjatjenesewa neNdzimu tjinahambgwa." 16 Ikoku kwakayetikala katatu, tjinhu itjetjo tjikakotogwa tjinyolotjo tjikayenda kudzimu.

17 Phethiro wakati etjakakaabala kuti tjilakidzo itjetjo tjolebani, linga, balume baka batumwa naKhoneliyasi batjibhuzwisisa kuti n'umba yaSimoni ndiyipi bakama pankoba 18 bakabhuzwa kuti Simoni unoyi Phethiro umwezi ipapo.

19 Phethiro wakati etjakumbulisisa nekwetjilakidzo, Meya ikati kuwunli, "Linga kuna balume batatu banokuhaka. 20 Muka ujetuke, uyende nabo usinyetanyete; ngobe ndimi ndabatuma." 21 Phethiro akajita akayenda kubalume ibabo akati, "Ndimi nhu wamunohaka; ini tjamahhila?"

22 Bakati, "Khoneliyasi unobe ali nlawuli webagwi bengwa, ali nlume wakatambunuka unohla Ndzimu, unolebgwa zwakanaka nekukwe mutjaba tjose tjemaJuta, wakabudziwa nentumwa wakayengemala weNdzimu kuti akudane uhhe kun'umba iye, kudze awhe tjawunowholeba." 23 Ndizo wakabanginisa kuti babe bezi babe.

Hhuba linotobela wakamuka eyenda nabo, nedzimwe hama dzaka dzili muJopha dzakayenda naye. 24 Hhuba linotobela bakanongina muKhesariya. Khoneliyasi waka akabamilila akoka hama dzidze nebakwinya babe bapedlo. 25 Phethiro wakati engina, Khoneliyasi ekawuhanganidza, akabe ewila pasi pamakumbo awe akawunamata. 26 Koga Phethiro wakawumilidza eti, "Milika, nami bo ndinhu sawe." 27 Elebeleka naye, wakangina mun'umba akawana banhu banjinji bakakubungana; 28 akati kubali, "Moziba imwi tjekwenyu kuti akutemunlayo kuti Njhuta ahangane kene iko kuti akumbe nhu wegumwe ludzi; koga Ndzimu wandilakidza kuti ndisitongoti umwe nhu unahambgwa kene haazotjena. 29 Ndizo pandakawhodan'wa, ndabuya ndisatongolamba. Ngono ndobhuzwa kuti mandidanilani?"

30 Khoneliyasi wakati, "Mahhuba mana akapinda, mu awa iyeyi, ndaka ndili muntembezelo we awa yebuhhanalume kubvisila bhuda kwehhuba, ndili mun'umba yangu; linga, ndakabona nlume alimile mbeli kwangu akambala zwiyambalo zwinopenya, 31 eti, ‘Khoneliyasi, ntembezelo uwo wawhakala nezwipo zwizo zwaswika mbeli kweNdzimu setjikumbuludzo. 32 Tuma banhu bayende kuJopha banokumbila Simoni unoyi Phethiro; unogala mun'umba yaSimoni, nsuki wemakukuta, unogala pawhunde yegungwa.’ 33 Ndizo ndakakutumila banhu nekulibilidza, wathama zwakanaka ukabuya. Ndizo ke tipano tili mubuyapo gweNdzimu, kuti tiwhe kose kwawalayiwa naHe."

34 Phethiro wakahhula nlomo uwe akati. "Lebeswa lose ndabona kuti Ndzimu haana luhalawulo, 35 koga mutjimwe netjimwe tjaba kene yani unowunhla kakale eyeta tjakalulama unowuwamutjila. 36 Moliziba dama laakatumila kubanhu beIsirayeli, esumikila ndebo mbuya yekunyalala muna Yesu Khirisitu (Kuti ndiHe webanhu bose), 37 dama lakasumikigwa muJudiya yose, kutangisila muGalile hule kwembvubiko yakasumikigwa naJohane. 38 kuti Ndzimu wakahhodza Yesu wekuNazaretha tjini neMeya Yakayengemala nangemasimba; nekuti wakayenda eyeta zwinhu zwakanaka kakale epodza bose baka bakatshambidzigwa nasatane, nentha yekuti Ndzimu waka anaye. 39 Iswi tibasupi bezwinhu zose zwaakayeta muhango yemaJuta nemuJerusalema. Bakawumbulaya ngekuwunlembeledza patjileyanyo; 40 koga Ndzimu wakawumusa muhhuba lebutatu akawulakidza patjena; 41 kusi kubanhu bose, koga kutili taka tahagwa neNdzimu kuti tibe basupi, tikadla tikan'wa naye hule kwemuka kukwe kubafi. 42 Kakale wakatilaya kuti tisumikile kubanhu, nekuti tipe busupi kuti iye ndiye wakahhodzewa neNdzimu kuti abe ntongi wemilandu yebapenyu nebakafa. 43 Balebesambeli bose banopa busupi nekukwe kuti nhu wose unogalamoyo muwunli unowana kuyetigwa mazwibhatigwa matjinyo ngezina lile."

44 Phethiro wakati etjaleba ikoku, Meya Yakayengemala ikajetukila pehhugwi kwabo bose baka bewha dama. 45 Bagalimoyo baka bali bamwe bebakathumbigwa, baka bahha naPhethiro, bakatjenama ngobe tjipo tjeMeya Yakayengemala tjakatjadululigwa pehhugwi kweBataya bo. 46 Nekuti bakabawha belebeleka nedzimwe ndimi bekudza Ndzimu. Phethiro akabe eti, 47 "Kuna ungalambisa banhu ibaba kuti balongwe muvula babvubikiwe, ibo bawamutjila Meya Yakayengemala saswi?" 48 Akalaya kuti babvubikiwe muzina laYesu Khirisitu. Bakawunkumbila kuti atongogala kwemahhubanyana.