1 Sangwenu mugubungano letshipi lekuAntiyoku kwaka kuna balebesambeli nebadiyi. Bhanabhasi, naSimiyoni waka eyi Ntema*, naLusiyasi wekuKhureni, naManayeni waka akula naHherodi mbhati wentunhu, naSawuli. 2 Bakati batjanamata He kakale beyila zodliwa, Meya Yakayengemala ikati, "Mundihalulileni Bhanabhasi naSawuli kuti bate n'hingo wandakabadanila iwo."

3 Kukati hule kwetembezela neyila zodliwa bakababiga maboko bakati bayende zwakanaka.

4 Ndizo bakati batumwa ngeMeya Yakayengemala, bakayenda kuSelusiya; bebva ipapo bakayenda kuSayiphurasi. 5 Bakati beswika kuSalamisi, bakasumikila dama leNdzimu mumasinagogu emaJuta. Baka bena Johane ali mbhatshi wabo.

6 Bakati batandula tjigwizi tjose bedzina benoswika kuPhafosi, bakawana umwe Njhuta unoyi Bha-Yesu waka ali n'anga, eli nlebesambeli wemanyepwa, 7 waka ana mbhati wentunhu wetjigwizi itjetjo waka eyi Sajiyasi Phawulasi, waka ana bulubi gwakapiza. Sajiyasi Phawulasi wakadana Bhanabhasi naSawuli kuti awhe bo dama leNdzimu. 8 Koga Elimasi (Ngobe nditjo tjaka tjibva zina lile neTjiGiriki) wakabalambisa, ehaka dzibila mbhati wentunhu wetjigwizi mukugalamoyo. 9 Koga Sawuli, waka ana limwe zina linoyi Phawuli, alihhele Meya Yakayengemala, wakawunlingisisa, 10 akati, "Iwe nkololo waSatane, iwe tjita tjekululama kose, uhhele bupitipiti nebubi, tongoletja tjinya Zila yaHe yakatambunuka. 11 Sangwenu tjilinga, luboko gwaHe gupehhugwi kuko, unowhobe bhofu ukasitubule bona hhuba kwelubaka."

Tjinyolotjo kwakaswika busi nehhalima pehhugwi kukwe akatangisa haka banhu kuti bawunkakate neluboko. 12 Mbhati wentunhu wakagalamoyo paakabona tjaka tjayetikala, ngobe waka atjenamisiwa nediya kwaHe.

13 Phawuli nebamwe babe bakamilika bakayenda ngekepe bebva paPhafosi, bakaswika kuPhega muPhamfiliya. Johane akabasiya akabgwilila kuJerusalema; 14 koga bakayendilambeli bebva kuPhega bakaswika kuAntiyoku yekuPhisidiya. Munsi weSabatha bakayenda kusinagogu bakagala pasi. 15 Hule kwebagwa kwenlayo newhalo dzebalebesambeli, batungamili besinagogu bakabatumila banhu, beti, "Hama, hapa muna dama lingasimisa banhu, mulilebe." 16 Ndizo Phawuli wakamilika, akamilidza luboko gugwe akati. "Balume beIsirayeli, namwi imwi munohla Ndzimu, whililani. 17 Ndzimu webanhu ibaba bekuIsirayeli wakahalula botate bedu akabata bakaba banhu bakulukulu pabakagala muhango yeIgipita, koga akakobadusa muyili neluboko gunasimba. 18 Kwemakole angaba makumi mana wakabayetila moyonlefu mutjilambanyika. 19 Wakati apaladza zwitjaba zwili kutondeka muhango yeKhenani, akabapa hango yazo senhaka, kwemakole angaba makhulu mana anamakumi mahanu."

20 "Hule kwayikoku wakabapa batongi kukadza kukanoswika pana Samuyeli nlebesambeli. 21 Bakakokumbila mambo; Ndzimu akabapa Sawuli nkololo waKhishi, nlume weludzi gwaBhenjamini, kwemakole makumi mana. 22 Akati atjiwundhusa, akabamilidzila Davida kuti abe mambo wabo; waakapa busupi eti, ‘Ndawuwana Davida nkololo waJese nlume unodikala mumoyo wangu, iye unowhothama kuda kwangu kose.’ 23 Muludzi gwenlume iwhoyu, Ndzimu walesi Ntjidzi kuna Isirayeli, iye Yesu, sekwaaka gadzabgwe. 24 Asanhu abuya, Johane wakabe asumikila nekwebvubikiwa kwekuhanduka kubanhu bose beIsirayeli. 25 Johane wakati opedza n'hingo uwe, akati, ‘Mokumbula kuti ndimi yani? Andita iye. Koga lingani, hule kwangu kuna unowhobuya, wandisakalizanila sunungula mitjili yehangu dzidze.’ "

26 "Hama, imwi bana baAbhurahhamu, nayibabo bapakati kwenyu banohla Ndzimu, takatumigwa matama etjidziwa ikoku. 27 Ngentha yekuti bagali bemuJerusalema nebatongi abazowunziba kakale abazowhisisa zwakazwilebgwa nebalebesambeli zwaka zwigala zwibagwa mumasabatha ose, bakahhadzisa tjakalebgwa ngewuwana nlandu. 28 Bakakumbila Pilatu kuti awumbulaye nekutobe baka basawana nlandu wakalizanila kuti abulawe. 29 Bakati bahhadzisa kose kwaka kwalebgwa nekukwe, bakawuntulula patjileyanyo, bakanowumbiganya mukumbu. 30 Koga Ndzimu wakawumusa kubafi; 31 kakale akabonakala kwemahhuba manjinji kuna bakabuya naye bebva kuGalile kuswika kuJerusalema, ndibo batjibe basupi babe kubanhu. 32 Ndizo tomubudza ndebo mbuya Ndzimu yaakagadzabgwe botate bedu, 33 ikoku Ndzimu watjikuhhadzisa kutili iswi bana babo ngemusa Yesu; sekwakwaka kwagwa mulukwalo gweNjimbo gwebubili,

" ‘Iwe uNkololo wangu,

nasi ndakuzwala.’

34 Ndzimu wakawumusa kubafi, kuti asitjabgwilile mukubola, sekwaakaleba nezila inoti,

‘Ndowhokupa makombolelo akayengemala

andakagadzabgwe Davida.’

35 Ndizo eti kakale mugumwe lumbo,

‘Amutowhobvumila wakayengemala wenyu kuti abole.’

36 Nekuti Davida wakati ahingila tjizekugwana tjitje sekuda kweNdzimu, akayezela, akanoladzikiwa nabotate babe, akabola; 37 koga iye wakamusiwa neNdzimu haazotongobola. 38 Tjikuzibani ke, makamu, kuti ngentha yawhoyu nlume, kosumikigwa kumuli yetigwa mazwibhatigwa matjinyo nesunungugwa muna kose kwaka kusingasunungugwe ngenlayo waMozisi, 39 kakale ngentha iye umwe newumwe unogalamoyo unosunungugwa. 40 Tjenjelani, kudze musitongowigwa netjakalebgwa nebalebesambeli.

41 ‘Lingani, imwi bakejuli! tjenamani mupalale;

nekuti ndowhothama tjiyeto mumahhuba enyu,

tjiyeto tjamusingowhogalamoyo,

nekutobe tjikalebgwa kumuli.’ "

42 Bakati bobhuda, banhu bakakumbila kuti zwinhu izwezwi zwilebgwe kakale musabatha linotobela. 43 Kwakati n'hangano wemusinagogu wapela, maJuta nebamwe banhu baka bakahandukila kulunamato gweTjiJuta bakatobela Phawuli naBhanabhasi. Phawuli naBhanabhasi bakabakuludzila kuti bayendilembeli bali mungoni dzeNdzimu.

44 Nsi wesabatha wakatobela kwakagulo kubungana banhu bose benzi-nkulu kuti bawhowha dama laHe. 45 Koga maJuta akati ebona lukawu gwebanhu, akaba nefupa, akaleyana nezwaka zwalebgwa naPhawuli, akawuntuka. 46 Phawuli naBhanabhasi bakalebeleka netjilopa beti, "Kwakwakafanila kuti dama leNdzimu lilebgwe kumuli kutanga. Koga saku mulilamba, muzwiwana musakafanila butjilo gusingapele, lingani, iswi toyehandukila kuBataya. 47 Nekuti, He watilaya ejalo,

" ‘Ndokusa kuti ube tjedza kuBataya,

kuti uhhise tjidziwa kubupelo gwehango.’ "

48 Bataya bakati bekuwha ikoku, bakahanha kakale bakakudza dama laHe; nayibabo bose bakahaligwa butjilo gusingapele bakagalamoyo.

49 Dama laHe lakaandama muntunhu wose. 50 Koga maJuta akadzonga bafumakadzi bakazwipila banonamata baka bezibgwa kose nebalume baka bali batungamili munzi-nkulu, bakata kuti Phawuli naBhanabhasi badziyidziwe, bakabatata muntunhu wabo. 51 Koga bakapula whuluba ipamakumbo abo, bakayenda kuIkhoniyamu. 52 Badiyiwa bakahhala nekuhanha neMeya Yakayengemala.