1 Koga kwakaswika bamwe balume bebva kuJudiya bediya bagalimoyo kuti, "Hapa musakathumbigwa kuyendidzana nenlayo waMozisi, amungatjidziwe." 2 Phawuli naBhanabhasi baka kakabadzana nabo kwazo, kukamuka hhoba. Phawuli naBhanabhasi nebamwe bakahagwa kuti bayende kuJerusalema benobona bapositoli nebawhola nekwembhuzo iwhoyu.

3 Ndizo, bakati belimuzila batumwa negubungano letshipi, bakapinda nemuFonishiya nemuSamariya, beyenda bebabudza nekwehandugwa kweBataya, bakalonga kuhanha kukulukulu mubagalimoyo bose. 4 Bakati beswika kuJerusalema, bakawamutjigwa nengubungano letshipi nebapositoli nebawhola, bakababudza kose kwaka kwayetiwa neNdzimu ebahingisa. 5 Koga kwakamilika bamwe baka bali belubabi gweBafarisi, baka batjiba bagalimoyo, bakati, "Kwakafanila kuti bathumbigwe, kakale balayiwe kuti batjengete nlayo waMozisi."

6 Bapositoli nebawhola bakakubungana kuti balingisise ndebo iyeyi. 7 Hule kwekuti kwakakabadzaniwa kwazo, Phethiro wakamilika akati kubali, "Hama, moziba kuti mumahhuba ekutanga Ndzimu wakahala pakati kwenyu, kuti ahingise nlomo wangu kuti Bataya bawhe dama lendebo mbuya bagalemoyo. 8 Ndzimu unobe ali iye unoziba mimoyo yebanhu wakabapa busupi, ngekubapa Meya Yakayengemala sekwaakayeta kutili; 9 haazotongosiyanisa pakati kwedu nabo, koga wakatjenesa mimoyo yabo ngekugalamoyo. 10 Sangwenu imwi molikilani Ndzimu ngetilika jogwe pamitshibha yebadiyiwa, latisakatongotubula senga iswi kene botate bedu? 11 Koga togalamoyo kuti towhotjidziwa ngengoni dzaYesu He, sayibo bo."

12 Gubungano lose lakanyalala; bakawhilila Bhanabhasi naPhawuli belondesedza zwilakidzilo nemakaabadzo akayetiwa neNdzimu pakati kweBataya ehingisa ibo. 13 Bakati bapedza lebeleka, Jakobe akahandula eti, "Makamu, whililani kundili. 14 Simiyoni wamulondesedzela kuti Ndzimu wakakumba tjini Bataya kwekutanga, kuti kubva mubali azwiyetile banhu banodan'wa ngezina lile. 15 Matama ebalebesambeli anobvumilana nayikoko, sekwakwaka kwagwa kuti,

16 " ‘Hule kwayikoku ndowhohanduka,

ndikamusidzila bugalo gwaDavida, gunoba gwatjiwa,

ndowhomusidzila matongo ago kakale,

ndikagumusa,

17 kuti bamwe banhu bose bahake He,

neBataya bose banodan'wa nezina langu,

18 kujalo He, wakanoyeta zwinhu zose izwezwi zwinozibgwa kubvisila ntolo.’

19 "Ndizo imi sebona kwangu ndoti tisidziyidze Bataya banobe bahandukila kuNdzimu, 20 koga tibakwalile kuti basiyane nezwinhu zwisakalulama zwakapigwa kumidzimwana, nebupombgwe, nedla nyama yetjafa ngosiniwa*, nedla malopa. 21 Nekuti kubvisila kuzwizekugwana zwantolo kwakasumikigwa nekwaMozisi mumizi-mikulu yose, nekuti whalo dzidze dzobagwa masabatha ose mumasinagogu."

22 Kukabonakala kuli tjinhu tjakanaka kubapositoli nebawhola, nekugubungano letshipi lose, kuti bahale banhu pakati kwabo bayende kuAntiyoku naPhawuli naBhanabhasi. Bakatuma Judasi unoyi Bhasabhasi, naSilasi, baka bali batungamili kubagalimoyo. 23 Bakasenga lukwalo gunoti.

"Makamu, bapositoli nebawhola, kubagalimoyo beBataya bakuAntiyoku nekuSiriya, nekuSilisiya, tomubuyisa. 24 Saku tawha kuti bamwe banhu banobva pakati kwedu bakamudziyidza nematama, bedzonga mikumbulo yenyu, nekutobe taka tisabatuma, 25 kwaboneka kwakatambunuka kutili, hule kwekuti tabvumilana, kuti tihale balume tibatume kumuli bena badikani bedu Bhanabhasi naPhawuli, 26 balume bakapila butjilo gwabo ngentha yezina laHe wedu Yesu Khirisitu. 27 Ndizo tatuma Judasi naSilasi, banowhoswika bemubudza zwinhu izwezwi ngemilomo yabo. 28 Nekuti kwaboneka kuli tjinhu tjakanaka kuMeya Yakayengemala nekutili kuti tisimusile gumwe bulemo gunopinda zwinhu izwezwi zwakafanila. 29 kuti muzwidzibe muna zwabhayigwa midzimwana, nemalopa, netjafa ngosiniwa*, nebupombgwe. Mukazwidziba muzwinhu izwezwi mowhobe mata zwakanaka. Musale."

30 Ndizo bakatumwa bakayenda kuAntiyoku; bakati bakubunganya gubungano letshipi panhu pan'ompela, bakabapa lukwalo. 31 Bakati batjigubala, bakahanha kakale bakasimisiwa. 32 Judasi naSilasi baka bali balebesambeli tjekwabo, bakalebeleka nehama bakadzisimisa ngematama manjinji. 33 Hule kwekuti bagala lubaka, bakapelekedzewa nebagalimoyo bakabgwilila kuna baka babatuma nekunyalala. 34 (Koga kwakahanhisa Silasi kuti abve asalazwe ipapo.)

35 Koga Phawuli naBhanabhasi bakasala kuAntiyoku, bediya kakale besumikila dama laHe, nebamwe bo banjinji.

36 Hule kwemahhubanyana Phawuli wakati kuna Bhanabhasi, "Ayibgwilile tinokumba bagalimoyo bakumizi-mikulu yose yatakasumikila dama laHe, tibone kuti batjini." 37 Koga Bhanabhasi waka ehaka kuti bayende naJohane unoyi Mako. 38 Koga Phawuli wakawana kusakatambunuka kuti bayende nenhu wakabgwilila hule bali kuPhamfiliya, akasiyende nabo kun'hingo. 39 Bakatangisa kakabadzana zwinogwadza, bakabva bapalalana; Bhanabhasi akatola Mako bakatanha kepe beyenda kuSayiphurasi, 40 koga Phawuli wakahala Silasi bakayenda, hule kwekuti basiwa mungoni dzaHe ngebagalimoyo. 41 Akapinda nemuSiriya neSilisiya, esimisa makubungano.