1 Ndakatongokukwalila, Thiyofilasi, mulukwalo gwekutanga. Ndikubudza kose kwakayetiwa naYesu nekwaakadiya, 2 kuswika pahhuba laakatogwa eyenda kudzimu, hule kwekusinobe alaya bapositoli baaka ahalula ngeMeya Yakayengemala. 3 Kwemahhuba makumi mana wakazwilakidza kubali nebusupi gusingalambike kuti iye umpenyu. Bakawumbona akalebeleka nabo nekwebumambo gweNdzimu. 4 Pabakakubungana wakabalaya eti, "Musitongobhuda muJerusalema, koga mulindile tjigadzabgwe tjaTate, eti, tjamakawha ndileba nekwatjo. 5 Johane wakabe ebvubika muvula, koga imwi mowhobvubikiwa neMeya Yakayengemala mahhuba asi mangana anotobela."

6 Bakati bahangana naYesu bali panhu pan'ompela bakawumbhuzwa beti, "He, mulubaka guno motjowhobgwiliza Bumambo gwaIsirayeli?"

7 Wakati kubali, "Akutekwenyu kuti muzibe lubaka nezwibaka zwakabigwa naTate ngemasimba abo, akuzolingisana namwi kuti mukuzibe ikoko. 8 Koga mowhowamutjila masimba, Meya Yakayengemala payinowhojitila pehhugwi kwenyu, mukakobe basupi bangu muJerusalema, nemuJudiya yose, nemuSamariya kudzina kunoswika kubupelo gwehango." 9 Hule kwekusinobe apedza leba ikoku, wakasengegwa kudzimu bakawunlinga bose, akasumbikiwa negole kuti basitjawumbone.

10 Bakati betjakazutulila meho hhuhhugwi paakatogwa oyenda, tjinyolotjo, balume babili bakambala zwiyambalo zwitjena bakama ntome kwabo, 11 bakati kubali, "Ye imwi balume bekuGalile, mumilileni ipapo makazutulila meho kumakole? Yesu iwhoyu watogwa mbeli kwenyu akayenda kudzimu, unowhohanduka nezila iyo zwayo yamawumbona eyenda nayo."

12 Bapositoli bakabe bebgwilila kuJerusalema, bejetuka mudombo leMitoba, kwaka kuli gwendo gwesabatha* kubva munzi-nkulu weJerusalema. 13 Bangina munzi-nkulu, bakayenda kun'umba yapehhugwi, kwabake begala. Kwaka kuli Phethiro, naJohane, naJakobe, naAndhireya, naFiliphi, naTomasi, naBhatholomewu, naMatewu, naJakobe nkololo waAlifiyasi, naSimoni (Njhuta unogwila lusununguko) naJudasi nkololo waJakobe. 14 Baka bogala bekubungana betembezela beli moyo un'ompela, kose nebetjikadzi, naMariya mayi baYesu nebanun'una baYesu.

15 Mumahhuba iyawo Phethiro wakamilika kuti alebeleke pakati kwebagalimoyo (banhu ibabo baka bangaba gulu nemakumi mabili). 16 Akati, "Hama dzangu, kwaka kwakafanila kuti lukwalo guhhadzisike sekwakalebgwa neMeya Yakayengemala ngenlomo Davida elebesambeli nekwaJudasi wakatungamila banhu bakasunga Yesu. 17 Judasi waka ali umwe wegubungano ileli, kakale waka akabhata tjimwe tjikamu tjen'hingo iwhoyu."

18 (Nlume iwhoyu wakatenga minda nemari yaakawana nemihingo iye yakayipa, ndiyo yaakafila muyili; awila pasi nen'holo akapatuka mabula awe akabhudila kuhhe akahhala pasi. 19 Banhu bose banogala muJerusalema bakakuwha, ndizo bakadana minda iyeyo beti Akelidama nelulimi gwabo, kuleba kuti, "Minda yeMalopa.")

20 "Nekuti kwakakwagwa mulukwalo gweNjimbo kuti,

" ‘N'umba iye ngayibe dongo;

ngakusibe nenhu unowhogala mo.’

Kwakakwagwa kakale kuti,

‘Tjigalo tjaabe ehingila mutjili ngatjitogwe newumwe.’

21 "Ndizo ke pakati kwebalume bose ibaba bakatitobela kubva mulubaka He Yesu eyenda muhango etjila naswi, 22 kubvisila kulubaka gwebvubika kwaJohane, kudzina kunoswika lubaka gwaakamilidziwa Yesu edusiwa mutili, ngakube newumwe unowhogadziwa kuti abe nsupi wekumuka kukwe panhu pan'ompela naswi."

23 Ndizo bakahalula balume babili. Josefa wake eyi Bhasabhasi (wake ezibgwa kuti ndiJasitasi), naMathiyasi. 24 Bakakotjitembezela beti, "He, moziba mikumbulo yebanhu bose, tjitilakidzani kuti pakati kwebanhu babili ibaba ndiwupi wamahalula 25 kuti ahinge bupositoli mubugalo gwakasiyiwa naJudasi, eyenda kubugalo gugwe." 26 Batjikandila malipa kuti bahale umwe pabubili gwabo, lipa likawila pana Mathiyasi, akabva atogwa kuti abe wumwe webapositoli bali gumi newun'ompela.