1 Hule kwayikoku Yesu wakazwilakidza kakale kubadiyiwa pamhili yegungwa leThibheriyasi; wakazwilakidza sawhoku. 2 Simoni Phethiro, naTomasi unoyi Phahla, naNathaniyeli wekuKana kuGalile, nebakololo baZebhedi, nebamwe badiyiwa babe babili baka bali panhu pan'ompela. 3 Simoni Phethiro wakati kubali, "Nditjanobhata whobe."

Bakati kuwunli, "Towhoyenda nawe." Ndizo ke bakabhuda bakangina mukepe, koga busiku igogo akuna tjabakabhata. 4 Kwakati koyedza, Yesu akama pansetje wegungwa, koga badiyiwa bakabasingazibe kuti ndiYesu. 5 Yesu wakati kubali, "Bakhwinya, muna whobe?"

Bakawun'handula beti, "Aa."

6 Wakati kubali, "Poselani njanga yenyu kuludli gwekepe, mowhowana dzimwe." Ndizo bakayiposela bakakosatubula yikakatila kuhhe, nentha yebunji gwewhobe.

7 Ndhiyiwa iwhoya waka ediwa naYesu wakati kunaPhethiro, "NdiHe!" Simoni Phethiro wakati ewha kuti ndiHe, akambala zwiyambalo zwizwe zwapehhugwi, ngobe waka azwimbulila hinga, akatjulukila mugungwa. 8 Koga bamwe badiyiwa bakatobela belimukepe bekakata njanga ilihhele whobe, ngobe bakabasikule nemhili, koga baka bali nhambo ingaba mamitha ali gulu kubva pamhili. 9 Bakati beswika pamhili, bakawana moto wemasimbe ipapo, kwakahahikiwa whobe pehhugwi kwawo, netjinkwa. 10 Yesu wakati kubali, "Lesini dzimwe whobe dzamutjambobhata."

11 Ndizo Simoni Phethiro wakatanha kepe akanokwebela njanga kuhhe kwegungwa, ilihhele whobe whuluwhulu, dziligulu nemakumi mahanu ana whobe nhatu, nekutobe dzaka dzili njinji zwingapo, njanga yaka isapaluka. 12 Yesu wakati kubali, "Ihhani muwhodla zodliwa zwemangwanana." Akuna umwe webadiyiwa wakaba netjilopa tjewumbhuzwa kuti, "Ndiwe yani?" Baka beziba kuti ndiHe. 13 Yesu wakahha akatola tjinkwa akabapa, akabapa newhobe.

14 Whoku kwaka kwatjiba kwebutatu Yesu elakidziwa kubadiyiwa hule kwemuka kubafi.

15 Bakati bapedza dla zodliwa zwemangwanana, Yesu wakati kuna Simoni Phethiro, "Simoni, nkololo waJohane, unondida kupinda bamwe bose ibaba?"

Wakati kuwunli, "Ee, He; moziba kuti ndomuda."

Akaba eti kuwunli, "Fudza mhwizana dzangu." 16 Gwebubili Yesu wakati kuwunli, "Simoni nkololo waJohane, unondida?"

Wakahandula eti, "Ee, He; moziba kuti ndomuda."

Akaba eti kuwunli, "Lisa mhwizi dzangu." 17 Wakati kuwunli gwebutatu, "Simoni nkololo waJohane, unondida?"

Phethiro wakamon'wa nentha yekuti wati kuwunli gwebutatu, "Unondida?" Akati kuwunli, "He moziba zwinhu zose, moziba kuti ndomuda."

Yesu wakati kuwunli, "Fudza mhwizi dzangu. 18 Ndolebesa, ndolebesa, ndoti kukuli, pawakabe utjintjetjana, waka uzwimbalila uyenda kwawunoda, koga hapa watjikwegula, unowhotambunudza maboko awo, umwe unowhokumbadza akakusengela kwawusingayemule yenda." 19 (Whoku wakakuleba kuti alakidze lufu gwaaka ewhokudza Ndzimu nago.) Hule kwayikoku wakati kuwunli, "Unditobele."

20 Phethiro wakatjebuka akabona ndhiyiwa unodiwa naYesu ebatobela, ndiye waka abhuzwa, eti "He ndiyani unowhomutengesa?" akanayila pafuba tjaYesu pabaka bedla zodliwa zwetjilayilo. 21 Paakawumbona Phethiro wakati kunaYesu, "He, whoyu nlume ke?"

22 Yesu wakati kuwunli, "Hapa kuli kuda kwangu kuti atjile ndidze ndihanduke, kuneni nawe ikoku? Unditobele!"

23 Iyeyi ndebo yekuti ndhiyiwa iwhoyu atowhofa yakako andama ikahhala mubanhu, koga iko Yesu asakati atowhofa, koga wakati, "Hapa kuli kuda kwangu kuti atjile ndidze ndihanduke, kuneni nawe ikoku?"

24 Ndiye iwhoyu ndhiyiwa unopa busupi gwezwinhu izwezwi, wakakwala zwinhu izwezwi, kakale toziba kuti busupi gugwe gulebeswa.

25 Koga kuna zwimwe zwinhu zwinjinji zwakayetiwa ndiYesu, katshene tjimwe netjimwe tjazo tjatjingakwagwa, ndokumbula kuti hango yose tjekwayo yayisingowhotubula senga whalo dzadziwhokwagwa.