1 Yesu wakati aleba matama iyawa, akalinga kudzimu akati, "Tate, lubaka gwaswika; kudzani Nkololo wenyu kuyetila kuti Nkololo amukudze bo, 2 saku makawumpa masimba pehhugwi kwebanhu bose, kuti ape butjilo gusingapele kuna bose bamakawumpa. 3 Whogu ndigo butjilo gusingapele. Kuti bamuzibe imwi moga Ndzimu umalebeswa, naYesu Khirisitu wamakatuma. 4 Ndakamukudza muhango, n'hingo wamakandipa kuti ndiwuthame ndawumpedza; 5 sangwenu, Tate, tjindikudzani mubuyapo gwenyu negudzo landakandinalo ndinamwi hango isanhu ikabumbiwa."

6 "Ndakayeta zina lenyu likazibgwa kubanhu bamakandipa ibo kubva muhango; bakabalibenyu, mukandipa ibo, dama lenyu bakalitjengeta. 7 Sangwenu beziba kuti zwinhu zose zwamakandipa zobva kumuli; 8 ngobe ndakabapa matama amakandipa, bakawawamutjila kakale beeziba kuti ndakabva kumuli kwelebeswa; kakale beegalamoyo kuti makandituma."

9 "Ndobatembezelela; anditotembezelela hango, koga ndotembezelela ibabo bamakandipa, ngobe ndebenyu; 10 bangu bose ndebenyu, kakale benyu ndebangu, ndokudziwa mubali. 11 Sangwenu anditjipo muhango, koga ibo bamuhango, imi ndoyehha kumuli. Tate bakaYengemala, mubatjengete muzina lenyu, lamakandipa, kuti babe ban'ompela, saswi tili ban'ompela. 12 Pandakandinabo, ndakabatjengeta muzina lenyu, lamakandipa; ndakabalinda, akuna umwe wabo wakalahika kuhhe kwenkololo wepaladziwa, kudze lukwalo guhhadzisike. 13 Koga sangwenu ndoyehha kumuli; kakale zwinhu izwezwi ndozwileba ndili muhango, kudze babe nekuhanha kwangu mubali kuhhele. 14 Ndakabapa dama lenyu; hango ikababenga ngobe abate bemuhango, sayikoku ndisi wemuhango. 15 Anditotembezelela kuti mubaduse muhango, koga kuti mubadzibilile kuna kumbi. 16 Abate bemuhango, sayikoku imi ndisi wemuhango bo. 17 Mubayengemadze ngelebeswa; dama lenyu lilebeswa. 18 Sekwamakandituma muhango, nami ndabatuma muhango. 19 Kakale ngentha yabo ndozwiyengemadza, kuti nayibo babe bakayengemala kwelebeswa."

20 "Anditotembezelela ibaba boga, koga ndotembezelela nayibabo bo banogalamoyo mundili ngentha yedama labo, 21 kuti babe ban'ompela bose; saku imwi, Tate, muli mundili, nami ndili mumuli, kuti nayibo babe mutili, kuyetila kuti hango igalemoyo kuti makandituma. 22 Gudzo lamakandipa ndakabapa ilo, kuyetila kuti babe ban'ompela saswi tili ban'ompela, 23 imi ndilimubali namwi mulimundili, kuyetila kuti babe ban'ompela kwakapelela, kuyetila kuti hango izibe kuti makandituma nekuti makabada sekwamakandida bo."

24 "Tate, ndoyemula kuti nayibo bo, bamakandipa, babe nami kwandinobe ndiliyako, kuti babone gudzo langu lamakandipa ngobe makandida hango isanhu ikabambiwa. 25 Tate beNdulamo, nekutobe hango isingamuzibe, koga imi ndamuziba; nayibaba banoziba kuti makandituma. 26 Ndakabazibisa zina lenyu, kakale ndowholiyeta likazibgwa kakale, kuti ludo gwamakandida nago gube mubali, nami ndibe mubali."