1 "Ndolebesa, ndolebesa, ndoti kumuli, iye usingangine mudanga lemhwizi nepankoba koga epfukila, nhu iwhoyo imbava kakale umbobola, 2 koga unongina nepankoba unlisi wemhwizi. 3 Nlindi wenkoba unowun'hhulila, mhwizi dzowha whi lile, kakale unodana mhwizi dzidze nemazina ekodzitungamila dzibhuda. 4 Hapa atjidusa dzidze dzose, unoyenda mbeli kwadzo, mhwizi dzikowuntobela, ngobe dzoziba whi lile. 5 Adzitotobela ntaya, koga dzowuntihha, ngobe adzitoziba whi lebataya."

6 Itjetji tjifananidzo Yesu wakatjihingisa kubali, koga abazotongowhisisa tjaaka eleba kubali.

7 Ndizo Yesu wakati kubali kakale, "Ndolebesa, ndolebesa, ndoti kumuli, ndimi nkoba wemhwizi. 8 Bose bakahha ndisanhu ndaswika imbava nembobola, koga mhwizi adzizobawhilila. 9 Ndimi nkoba, hapa nhu engina nemundili, unowhotjidziwa, unowhongina akabhuda akawana mafulo. 10 Mbava inohha koga kuti iwhokhwiba, nebulaya, nepaladza; imi ndakahha kuti banhu babe nebutjilo, butjilo guhhele."

11 "Imi ndinlisi mbuya, unozwipila butjilo gugwe kuti afile mhwizi. 12 Unoba ali n'hingi koga asi nlisi wemhwizi, idzo mhwizi dzisidzidze, unoti ebona mhele ihha akatihha esiya mhwizi, mhele inobhata mhwizi ikadzipaladza. 13 Unotihha ngobe ali n'hingi koga asina hanya nemhwizi. 14 Imi ndinlisi mbuya, ndoziba dzangu mhwizi kakale dzangu mhwizi dzondiziba bo, 15 sayikoku Tate bendiziba nami ndiziba Tate. Ndakazwimisila pila butjilo gwangu ndiyetila mhwizi. 16 Kakale ndina dzimwe mhwizi, dzisi dzayileli danga, ndakafanila dzihhisa bo, kakale dzowhowhilila whi langu. Ndizo kowhobe netjuma tjin'ompela nenlisi un'ompela."

17 "Nentha yayikoku Tate banondida, ngobe ndopila butjilo gwangu, ndikogutola kakale. 18 Akuna nhu unonditolela igo, koga ndozwipila kuti ndife. Ndina masimba ezwipila kuti ndife, kakale ndinamasimba ekuti nditole butjilo gwangu kakale, whoku whulayiwa kwandakayetiwa naTate bangu."

19 Kwakabe nekupalalana pakati kwemaJuta ngentha yematama iyawa. 20 Bunji gwabo bakati, "Una meyambi, kakale unopenga, mowuwhilililani?"

21 Bamwe bakati, "Akuta lebeleka kwenhu unameyambi ikoku. Kuna meyambi ingapofunula bhofu?"

22 Kwaka kuli nzano weYengemadziwa kwethempeli muJerusalema, mulubaka gwembaba, 23 Yesu waka esumha nepagutukutu laSolomoni muthempeli. 24 Ndizo maJuta akakubungana akawumbhuzwa eti, "Unowhotigadza mukusaziba kwelubaka gungapani? Hapa uli iwe Khirisitu utibhudile patjena."

25 Yesu wakabahandula eti, "Ndakamubudza kale koga amuzogalamoyo. Mihingo yandinothama muzina laTate, ibusupi gwangu, 26 koga amutogalamoyo ngobe amute bamwe bemhwizi dzangu. 27 Mhwizi dzangu dzowha whi langu, ndodziziba, kakale dzonditobela, 28 ndodzipa butjilo gusingapele, kakale adzitowhopalala, kakale akuna ungadzidzamula mumaboko angu. 29 Tate bangu ibo bakandipa idzo, bakulu pabamwe bose, kakale akuna unotubula kuti adzidzamule mumaboko aTate. 30 Imi naTate ti un'ompela."

31 MaJuta akanunga mabgwe kakale kuti awunkhikitidze, 32 koga Yesu wakabahandula eti, "Ndakamulakidza mihingo yakanaka minjinji inobva kunaTate, ngono mohaka ndikhikitidzila upi wayo nemabgwe?"

33 MaJuta akawun'handula eti, "Atitohaka kukhikitidzila n'hingo wakanaka koga tjatinokukhikitidzila ngemabgwe whutuka Ndzimu, ngobe wati uli nhu, ukazwita Ndzimu."

34 Yesu wakabahandula eti, "Kwakakwagwa munlayo wenyu kuyi Ndzimu wakati, ‘Mumidzimu.’ 35 Hapa akababva eti ‘mumidzimu’ ibabo bakawamutjila dama leNdzimu, kakale lukwalo agungayi goleba manyepwa, 36 moti kuna wakahagwa naTate akatumwa muhango, ‘Notuka Ndzimu,’ ngobe ndati, ‘NdiNkololo weNdzimu’? 37 Hapa ndisingayete mihingo yaTate bangu, musindigalemoyo, 38 koga hapa ndiyithama, nekutobe musingandigalemoyo, galanimoyo mihingo, kudze muzibe kakale muwhisise kuti Tate bamundili nami ndimuna Tate."

39 Bakayedza kakale kuti bawunsunge koga wakasodzoroka mumaboko abo.

40 Yesu wakabgwilila seli yaJorodani, kubugalo gwaka gubvubikila Johane kutanga, akanogala ko. 41 Banhu banjinji bakahha kuwunli, bakati, "Johane haazoyeta zwilakidzilo, koga zwinhu zose zwakalebgwa naJohane nekwenlume iwhoyu ilebeswa." 42 Banjinji bakagalamoyo muwunli ipapo.