1 Hule kwayikoku kwakabe nenzano wemaJuta, naYesu bo wakayenda kuJerusalema. 2 Sangwenu muJerusalema paNkoba weMhwizi kwaka kuna gan'wa, linodan'wa netjiHhebheru kuyiBhethesida, lina makutukutu mahanu. 3 Ipapo kwakakuna bagwele banjinji balele po, mapofu, zwilema, nebakalobgwa negulukadzi. 4 *[Mugumwe lubaka ntumwa waHe waka edelukila mugan'wa ebva kudzimu, ehha edzonga vula. Waka etangila bamwe ngina mugan'wa hule kwedzongewa kwevula waka epola bugwele gwaanago nekutobe guli gupi.] 5 Ipapo kwaka kuna umwe nlume, waka egwala kwemakole alimakumi matatu anahhanakadzi. 6 Yesu wakawumbona alilele ipapo, akaziba kuti waka egwala kwelubaka gulefulefu, ndizo wakawumbhuzwa eti, "Unohaka naya kene?"

7 Nlume unogwala wakati, "He, akuna nhu ipapa ungandisa mugan'wa vula payinodzongeka, ndoti nditjahaka ngina, umwe ebe engina enditangila."

8 Yesu wakati kuwunli, "Milika, tola nhobo iyo, uyende." 9 Tjinyolotjo nlume iwhoyo wakabva anaya, wakamilika akatola nhobo iye akayenda.

Nsi wakayetika kose ikoku waka uli nsi wesabatha. 10 Ndizo bakulu bemaJuta bakabudza nlume waka apodzewa beti, "Nasi ihhuba lesabatha, kakale akuta munlayo kuti usenge nhobo iyo."

11 Wakahandula eti, "Wandipodza wandibudza eti nditole nhobo yangu ndiyende."

12 Bakawumbhuzwa beti, "Ndiyani iwhoyo nlume wati kukuli utole nhobo iyo uyende?"

13 Koga nlume waka apolesewa waka asingazibe kuti kwakabe kuliyani, ngobe Yesu waka atjingina mubanhu akamila, ngobe kwakakuna mbunga webanhu mubugalo igogo.

14 Hule kwayikoku, Yesu wakawuwana muthempeli akati kuwunli, "Bona, watjinaya! Usitjatjinye kakale, kuyetila kuti usitjawigwe nekwakayipa kunopinda ikoku."

15 Nlume iwhoyu wakayenda akanobudza bakulu bemaJuta kuti wapodzewa ndiYesu. 16 Ndizo bakulu bemaJuta bakatangisa dziyidza Yesu, ngobe ikoku waka ekuthama muhhuba leSabatha. 17 Yesu wakabahandula eti, "Tate bangu banogala behinga, nami bo ndakafanila hinga."

18 Ndebo iyeyi yakathama kuti bakulu bemaJuta bazwipile kwazo wumbulaya, ngobe wakabe asavuna nlayo wesabatha koga, koga wakabe eti Ndzimu ndiTate babe, nayiyeyo zila wake azwilizanyisa neNdzimu.

19 Yesu wakati kubali, "Ndolebesa, ndolebesa, ndoti kumuli, akuna Nkololo tjaangathama ali yega, koga unothama tjaanobona Tate babe bethama, ngobe kene ini tjinothamiwa naTate, neNkololo bo unotjithama. 20 Ngobe Tate banoda Nkololo, kakale banowunlakidza kose kwabanothama ibo tjekwabo, kakale banowhowunlakidza mihingo mikulukulu kupinda iyeyi, kuti imwi mutjename. 21 Ngobe saTate bemusa bafi bebapa butjilo, Nkololo bo unopa butjilo kuna waanoda pa. 22 Kakale, Tate abatotonga nhu, koga bakapa masimba ose etonga kuNkololo, 23 kuyetila kuti bose balemekedze Nkololo, sekwabanolemekedza Tate. Iye usingalemekedze Nkololo haatolemekedza Tate bakawuntuma."

24 "Ndolebesa, ndolebesa, ndoti kumuli, iye unowha dama langu akagalamoyo muna wakandituma, unabutjilo gusingapele, haatowhoswika pakutongwa, koga watjipinda mulufu wabe kubutjilo. 25 Ndolebesa, ndolebesa, ndoti kumuli, lubaka gohha, nangwenu gwaswika, ipapo bakafa pabanowhowha whi leNkololo weNdzimu, kakale ibabo banoliwha banowhotjila. 26 Ngobe saTate banabutjilo mubali tjekwabo, bakapa Nkololo kuti abe nebutjilo muwunli, 27 kakale bakawumpa masimba ekuti atonge, ngentha yekuti uNkololo weNhu. 28 Musitjenamisiwe nayikoku, ngobe lubaka gowhohha ipapo bose bamuzwikumbu pabanowhowha whi lile 29 banowhobhuda muzwikumbu, bakabeyeta zwibuya banowhomuka bakatjila, na ibabo bakayeta zwibi banowhomusiwa beyenda kunotongewa.

30 "Akuna tjandingathama ngemasimba angu, ndotonga sewha kwangu, netonga kwangu kwakalulama, ngobe anditohaka kunobe kulikuda kwangu koga tjinodiwa nayiwhoyo wakandituma."

31 "Hapa ndizwilebela busupi, busupi gwangu aguta gwelebeswa, 32 kuna umwe nhu unopa busupi nekwangu, kakale ndoziba kuti busupi gwaanopa nekwangu ndegwelebeswa. 33 Makatuma banhu kunaJohane, akapa busupi nekwelebeswa. 34 Akuta kuti ndohaka busupi gunobva kubanhu; koga ndoleba ikoku kuyetila kuti imwi mutjidziwe. 35 Johane waka elitjivoneko tjinopfuta kakale tjingayima, namwi bo makahala hanha mutjedza tjitje kwelubakanyana. 36 Koga busupi gwandinago gopinda gwaJohane; ngobe mihingo yandakapiwa naTate kuti ndiyipedze, iyo iyeyi mihingo yandinoyeta, inopa busupi nekwangu kuti Tate bakandituma. 37 Nayibo Tate bakandituma banopa busupi nekwangu. Imwi amanhu mukatongowha whi labo, netjimo tjabo amanhu mukatjibona, 38 nedama labo alitogala mumuli, ngobe amutogalamoyo muna iye wabakatuma. 39 Mohakisisa mudziwhalo, ngobe mokumbula kuti mudzili munabutjilo gusingapele, koga ndidzo ke dzinopa busupi nekwangu, 40 koga molamba hha kundili kuti mube nebutjilo."

41 "Anditowamutjila gudzo linobva kubanhu. 42 Koga ndomuziba imwi, ndoziba kuti amuna ludo gweNdzimu mumuli. 43 Ndahha muzina laTate, amutondiwamutjila, koga kukahha umwe ehha muzina lile, ndiye wamunowhowamutjila. 44 Mungagalamoyo tjini, imwi muwamutjila gudzo linobva kuwumwe newumwe koga musingahake gudzo linobva kuNdzimu iye yega? 45 Musikumbule kuti ndowhomulonga nlandu mbeli kwaTate, ndiMozisi unomulonga nlandu, iye wamunogalabgwe. 46 Hapa mamugalamoyo munaMozisi, mamowhogalamoyo mundili, ngobe wakakwala nekwangu. 47 Koga hapa musingagalemoyo muna zwaakakwala, mowhogalamoyo matama angu tjini?"