1 "Mimoyo yenyu isidziyidzike, galanimoyo muNdzimu, mugalemoyo nemundili. 2 Munzi waTate bangu kunan'umba njinji, hapa kwakusakajalo, ndandowhomubudza kuti ndoyenda ndinomubaakanyila bugalo? 3 Hapa ndatjiyenda ndinomubaakanyila bugalo, ndowhohanduka ndiwhomutola kuti mube nami, kuyetila kuti pandiyapo mubepo bo. 4 Kwandinoyenda zila moyiziba."

5 Tomasi wakati kuwunli, "He, atitoziba kwamunoyenda, zila tingayiziba tjini?"

6 Yesu wakati kuwunli, "Ndizila, nelebeswa, nebutjilo; akuna unoyenda kunaTate kuhhe kwekuti ayende nemundili. 7 Kadzene mamundiziba, mamuwhoziba Tate bangu bo, kubva ngwenu mebaziba kakale matjibabona."

8 Filiphi wakati kuwunli, "He, mutilakidze Tate, towhogutshikana."

9 Yesu wakati kuwunli, "Ndagala nawe lubaka gulefu zwingapa, koga awutondiziba, Filiphi? Wabona imi wabona Tate, ngono unoleba tjini uti, ‘Mutilakidze Tate’? 10 Awutogalamoyo kuti ndimuna Tate naTate bamundili? Matama andinoleba kumuli haate emasimba angu, koga Tate banogala mundili ndibo banoyeta mihingo yabo. 11 Mundigalemoyo hapa nditi ndimuna Tate naTate bamundili, kene ke, galanimoyo mundili ngentha yemihingo tjekwayo. 12 Ndolebesa, ndolebesa, ndoti kumuli, unogalamoyo mundili unowhothama mihingo yandinothama, nemihingo mikulu pana iyeyi unowhoyithama, ngobe ndoyenda kunaTate. 13 Kene ini tjamunokumbila muzina langu, ndowhotjithama, kuyetila kuti Tate bakudziwe muNkololo. 14 Mukakumbila kene ini muzina langu, ndowhotjithama.

15 "Hapa mundida, mowhotjengeta milayo yangu. 16 Ndowhotembezela kunaTate, bakamupa umwe Ntjidzi, kuti abe namwi ngekusingapele, 17 ndiye Meya yemalebeswa, usingake akawamutjigwa nehango, ngobe ayitowumbona kene iko wunziba, imwi mowunziba, ngobe unogala namwi, kakale unowhobe mumuli."

18 "Anditowhomusiya muli sesiyan'wa, ndowhohanduka kumuli. 19 Kwelubakanyana, hango ayitjowhondibona, koga imwi mowhondibona, ngobe ndotjila, namwi mowhotjila bo. 20 Muhhuba ilelo mowhoziba kuti ndimuna Tate bangu, imwi mumundili, nami ndimumuli."

21 "Unamilayo yangu kakale eyitjengeta, ndiye unondida; unondida unowhodiwa naTate bangu, nami ndowhowundha ndikazwilakidza kuwunli."

22 Judasi, usi Isikariyoti, wakati kuwunli, "He, kowhoyetika tjini kuti muzwilakidze kutili, koga musingazwilakidze kuhango?"

23 Yesu wakawun'handula eti, "Hapa nhu endida, unowhotjengeta dama langu, naTate bangu banowhowundha, kakale towhohha kuwunli tikagala naye. 24 Usingandide haatotjengeta matama angu. Nedama lamunowha haate langu, koga ndelaTate bakandituma."

25 "Ndaleba zwinhu izwezwi nditjinamwi. 26 Koga Ntjidzi, Meya Yakayengemala, unowhotumwa naTate muzina langu, unowhomudiya zwinhu zose, akamukumbudza zwinhu zose zwandakaleba kumuli."

27 "Ndomusiyila kunyalala, ndomupa kunyalala kwangu, anditomupa sekwamunopiwa nehango. Mimoyo yenyu isidziyidzike, kene iko kuti ibe nekuhla. 28 Makawha nditi kumuli, ‘Ndoyenda, koga ndowhohanduka kumuli.’ Hapa makamundida makamowhohanha, nekuti ndoyenda kunaTate, ngobe Tate bakulu pandili. 29 Sangwenu ndatjimubudza kusanhu kukayetika, kuyetila kuti pakunowhoyetika, mugalemoyo. 30 Anditjowholebeleka kwazo namwi, ngobe ntungamili wehango ino unohha. Haana masimba pehhugwi kwangu, 31 koga ndoyeta sekwandakalayiwa naTate, kuyetila kuti hango izibe kuti Tate ndobada."

"Milikani, ayibveni pano."