1 Kwaka kuna umwe nlume wekuBhethani unoyi Lazaro waka egwala, Bhethani unzi paka kugala Mariya naMaritha, hazwadzi dzidze. 2 Iwhoyu Mariya waka egwaligwa nehazwadzi iye Lazaro, ndiye iwhoyo wakawhohhodza He nemafuta akawumbuhika makumbo ehingisa mavudzi awe. 3 Ndizo ke hazwadzi dzidze dzakatumila dama kunaYesu dziti, "He, iye wamunoda unogwala."

4 Koga Yesu wakati ekuwha akati, "Gwala ikoku akute kwelufu, ndekwegudzo leNdzimu, kuyetila kuti Nkololo weNdzimu awane gudzo ngentha yako."

5 Sangwenu Yesu waka eda Maritha nenun'una uwe naLazaro. 6 Ndizo wakati ewha kuti Lazaro unogwala, akagala mahhuba mabili pabugalo gwaaka aliko. 7 Hule kwayikoku wakati kubadiyiwa babe, "Ayindeni kuJudiya kakale."

8 Badiyiwa bakati kuwunli, "Rabhi, ngwenu zwako maJuta ayehaka mukhikitidza nemabgwe, ngono moyenda ko kakale?"

9 Yesu wakahandula eti, "Akuna ma awa gumi nemabili muhhuba? Hapa nhu eyenda masikati, haatokunhiwa, ngobe unovonekegwa netjedza tjehango ino. 10 Koga hapa nhu eyenda busiku, unokunhiwa, ngobe tjedza atjipo muwunli." 11 Wakaleba ejalo, akakoti kubali, "Nkwinya wedu Lazaro wayezela, koga ndoyenda ndinowumusa muwhope."

12 Badiyiwa bakati kuwunli, "He, hapa kuli kuti wayezela, unowhonaya."

13 Ipapa Yesu waka eleba nekwelufu gwaLazaro, ibo bakakumbula kuti waka eleba nekwenyaluluka akayezela. 14 Yesu akabe ebabudza patjena, "Lazaro wafa, 15 kakale ndohanha kuti ndandisipo ndiyetila imwi, kuti mugalemoyo. Koga ayindeni kuwunli."

16 Tomasi, unodan'wa kuyi Phahla, wakati kubamwe bebadiyiwa, "Ayindeni bo kuti tinofa naye."

17 Yesu wakati aswika, akawana kuli kuti Lazaro waka atjibiganyiwa, atjibe nemahhuba mana ali mukumbu. 18 Bhethani yaka ingaba makhilomitha matatu kubva muJerusalema, 19 bunji gwemaJuta aka ahha kunaMaritha naMariya ewhobalekula nekwehazwadzi yabo.

20 Maritha wakati ewha kuti Yesu unohha akayenda enowun'hanganidza, Mariya akasala mun'umba. 21 Maritha wakati kunaYesu, "He, hapa mamulipano, hazwadzi yangu yabe isingowhofa. 22 Nangwenu ndoziba kuti keneni tjamunokumbila kuNdzimu, Ndzimu unowhomupa."

23 Yesu wakati kuwunli, "Hazwadzi iyo inowhomuka kakale."

24 Maritha wakati kuwunli, "Ndoziba kuti unowhomuka kakale pakumuka muhhuba lebupelo."

25 Yesu wakati kuwunli, "Imi ndimi kumuka kubafi nebutjilo, iye unogalamoyo mundili, nekutobe akafa, unowhotjila, 26 yani nayani unotjila kakale egalamoyo mundili haatowhofa kene nalini. Nokugalamoyo ikoku?"

27 Wakati kuwunli, "Ee, He, ndogalamoyo kuti ndimwi Khirisitu, Nkololo weNdzimu, iye unowhohha muhango."

28 Maritha wakati aleba ikoku, akayenda enodana nun'una uwe Mariya, enyebezela eti, "Ndhiyi bapano, banokudana." 29 Wakati ekuwha ikoku akamilika nekulibilidza akayenda kuwunli. 30 Sangwenu Yesu waka asanhu akaswika kunzi, koga waka atji kubugalo gwaaka awan'wa naMaritha. 31 MaJuta aka anaye mun'umba, ewunlekula, paakabona Mariya emilika nekulibilidza ebhuda, akawuntobela ekumbula kuti unoyenda kukumbu enolila.

32 Ndizo Mariya, paakaswika kwakakunaYesu wakawumbona, akapfigama pamakumbo awe, eti kuwunli, "He, hapa mamulipano hazwadzi yangu yabe isingowhofa."

33 Yesu wakati ewumbona elila, nemaJuta aka ahha naye elila bo, akawha zogwadza mumeya, akamanikana, 34 akati, "Makawumbiganya poni?"

Bakati kuwunli, "He, ihhani moobona."

35 Yesu wakalila. 36 Ndizo maJuta akati, "Lingani kuti wabe ewundha tjini!"

37 Koga bamwe babo bakati, "Iwhoyu wakapofunula nlume waka elibhofu waka asingowhothama kuti nlume iwhoyu asife?"

38 Yesu wakadziyidzika mumeya kakale, akaswika kukumbu, tjakatjiliguwhu, kunabgwe lakabigiwa pankoba watjo. 39 Yesu wakati, "Dusani bgwe."

Koga Maritha, hazwadzi yemfi, wakati, "He, ndobona ngwenu weenhuwa, ngobe kwabe nemahhuba mana akafa."

40 Yesu wakati kuwunli, "Andizokubudza kuti ukagalamoyo unowhobona gudzo leNdzimu?" 41 Ndizo bakadusa bgwe. Yesu wakalinga pehhugwi akati, "Tate, ndomuboka kuti mandiwha. 42 Ndandiziba kuti mogala mundiwha, koga ndaleba ikoku nentha yebanhu bamile ipapa, kudze bagalemoyo kuti makandituma." 43 Wakati atjileba ikoku, akamimila eti, "Lazaro, bhuda." 44 Mfi wakabhuda, akasungwa nematjila maboko nemakumbo, buso gugwe gwakapombegwa nejila.

Yesu wakati kubali, "Muwunsunungule, muwunletje ayende."

45 Ndizo bunji gwemaJuta, aka ahha naMariya akabona tjaakathama, akawunghalamoyo, 46 koga amwe abo akayenda kubaFarisi akanobabudza zwakayetiwa naYesu. 47 Ndizo baphirisiti bakulu nebaFarisi bakakubunganya lubahhe, bakati, "Tithameni? Ngobe nlume iwhoyu unoyeta zwilakidzilo zwinjinji. 48 Tikawunletja eyendilambeli akajali, nhu wose unowhowunghalamoyo, baRoma banowhohha betipaladzila thempeli ledu netjaba tjedu."

49 Koga umwe wabo, Khayiyafasi, waka ali mphirisiti upehhugwi gole ilelo wakati kubali, "Amuna tjamunoziba, 50 amutobona kuti kuhine kumuli kuti nhu un'ompela afile banhu, kuyetila kuti tjaba tjose tjisipalale." 51 Ikoku haazokuleba iye tjekukwe, koga semphirisiti upehhugwi gole ilelo waka elebesambeli kuti Yesu wakafanila fila tjaba tjemaJuta, 52 kusi tjaba tjemaJuta tjoga, koga kuti akubunganye panhu pan'ompela bana beNdzimu bahhele hango yose.

53 Ndizo kubva muhhuba ilelo bakalangana kuti bangawumbulaya tjini. 54 Yesu akabe asingatjayende alipatjena pakati kwemaJuta, koga wakabva ipapo akayenda kuhango ipedlo netjilambanyika, kunzi unoyi Ifureyimu, ndiko kwaakanogala nebadiyiwa babe.

55 Sangwenu Phasika yemaJuta yakayabepedlo, banjinji bakahha kuJerusalema bebva muhangwana yose,Phasika isanhu yaswika, kuti bawhozwitjenesa. 56 Bakabehaka Yesu, bebhuzwana umwe kuwumwe balimile muthempeli, "Mokumbulani? Kuti atowhohha kunzano?" 57 Sangwenu baphirisiti bakulu nebaFarisi bakabalaya kuti hapa kuna unoziba kwaayako, abazibise, kudze bawunsunge.