1 Hule kwayikoku Yesu wakapoteleka muGalile, waka asingatubule poteleka muJudiya, ngobe batungamili bemaJuta baka behaka wumbulaya. 2 Sangwenu nzano wemaJuta weMajatja waka wabe pedlo, 3 ndizo banun'una babe bakati kuwunli, "Ibva pano uyende kuJudiya, kuti badiyiwa babo babone mihingo yawunoyeta. 4 Ngobe akuna nhu unohinga akabgwata iye ehaka zibgwa patjena. Hapa uthama izwezwi zwinhu, thama kuti hango izibe nekuko." 5 (Ngobe nayibo banun'una babe bakabasingagalemoyo muwunli.)

6 Yesu wakati kubali, "Lubaka gwangu agwanhu gwaswika, koga gwenyu lubaka gogala gulipo. 7 Hango ayingamuheme, koga imi inondihema ngobe ndopa busupi nekwemihingo yayo kuti yakayipa. 8 Yendani kunzano imwi tjekwenyu, imi anditoyenda kunzano iwhoyu, ngobe lubaka gwangu agwanhu gwaswika." 9 Ejalo, wakabva asala muGalile.

10 Koga hule kwekusinobe banun'una babe bayenda kunzano, nayiye wakasala etobela kunzano, asipatjena koga akabgwata. 11 Batungamili bemaJuta baka bewumvima kunzano, beti, "Uponi?"

12 Kukabe nekun'un'urika kunji nekukwe pakati kwebanhu. Bamwe beti, "Unlume wakalulama," bamwe beti, "Aa, unotungamilila banhu ntome." 13 Koga nentha yehla batungamili bemaJuta akuna nhu waka elebeleka nekukwe patjena.

14 Kwakati pakati napakati kwelubaka gwenzano Yesu eba eyenda kuthempeli akatangisa diya. 15 Batungamili bemaJuta bakatjenamisiwa nayikoku, bakati, "Koyetiwa neni kuti nlume iwhoyu abeneluzibo, iye esakadiyika."

16 Ndizo Yesu wakabahandula eti, "Tjidiyo tjangu atjite tjangu, koga ndetje wakandituma. 17 Hapa kuda kwenhu kuli kuti ayete kuda kweNdzimu, unowhoziba kuti tjidiyo tjangu tjobva kuNdzimu kene kuti ndolebeleka ngesimba langu. 18 Unolebeleka nesimba lile unozwihakila gudzo, koga iye unohaka gudzo lewakawuntuma unamalebeswa, kakale muwunli akuna manyepwa. 19 Mozisi haazomupa nlayo? Koga akuna umwe wenyu unotjengeta nlayo. Mohaka ndibulayilani?"

20 Banhu bakahandula beti, "Una meyambi! Ndiyani unohaka kubulaya?"

21 Yesu wakabahandula eti, "Ndayeta tjiyeto tjin'ompela, mose tjamutjenamisa. 22 Mozisi wakamupa thumbigwa (kusi kuti kwakabva kuna Mozisi, koga kwakabva kuna bobatategulu), mothumbila mwana wetjilume muhhuba lesabatha. 23 Hapa kuli kuti muhhuba lesabatha mwana wetjilume unowamutjila thumbigwa, kuyetila kuti nlayo waMozisi usitjulukiwe, mandigwadziligwa ngobe ndayeta kuti mbili wose wenlume iwhoyu upole nehhuba lesabatha? 24 Musitonge nekuti nhu unolingika tjini, koga tongani ngetonga kwakalulama."

25 Bamwe bebanhu bemuJerusalema bakakoti, "Haate iye iwhoyu nlume wabanohaka bulaya? 26 Ngono whoyu upano, elebeleka patjena, koga akuna tjabanoleba kuwunli! Kungabe iko kene kuti batungamili banoziba kwelebeswa kuti iwhoyu ndiye Khirisitu? 27 Koga iswi toziba kuti nlume iwhoyu unobva poni; hapa Khirisitu ehha, akuna unowhoziba kuti unobva poni."

28 Ndizo Yesu wakaleba newhi lipehhugwi, paaka ediya muthempeli eti, "Mondiziba, kakale moziba kwandinobva. Koga andizozwihhila, iye wakandituma ulebeswa, amutowhunziba. 29 Imi ndowunziba, ngobe ndobva kuwunli, kakale wakandituma."

30 Ndizo bakahaka kuti bawunsunge, koga akuna nhu wakawumbhata, ngobe lubaka gugwe gwakagusanhu gwaswika. 31 Koga banhu banjinji bakabegalamoyo muwunli, bakati, "Hapa Khirisitu ehha, unowhoyeta zwilakidzilo zwinopinda zwayetiwa nenlume iwhoyu?"

32 BaFarisi bakawha banhu ben'un'urika nekukwe, baphirisiti bakulu nebaFarisi bakatuma balindi kuti banowunsunga. 33 Yesu wakakoti, "Ndowhobe namwi kwelubaka gufupifupi, ndikobgwilila kuna wakandituma, 34 mowhondihaka mukandihaya, kwandinowhoba ndiliko amungahhe ko."

35 MaJuta akati umwe kuwumwe, "Nlume iwhoyu unowhondayi kwatisingowhowuwana? Angabe ehaka yenda kuna bakapalalila kumaGiriki enodiya maGiriki? 36 Unobvani hapa eti, ‘Mowhondihaka mukandihaya,’ kakale eti, ‘Kwandinowhoba ndiliko amungahhe ko’?"

37 Muhhuba lebupelo lenzano, linoba lilihhuba gulu, Yesu wakamilika akadanilila eti, "Hapa kuna unanyota ngaahhe kundili an'we. 38 Iwhoyo unogalamoyo mundili sekwakwakakwagwa mulukwalo kuti, ‘Kubva mukati kukwe kowhowunga njizi dzevula inopa butjilo.’ " 39 Sangwenu whoku waka ekuleba eleba nekweMeya, yakayowhowamutjigwa nebanogalamoyo muwunli, ngobe Meya yaka isanhu ikapiwa banhu, ngobe Yesu waka asanhu akakudziwa.

40 Bakati bewha matama ihawa, bamwe banhu bakati, "Iwhoyu ndiye Nlebesambeli ntja."

41 Bamwe bakati, "Iwhoyu ndiye Khirisitu."

Koga bamwe bakati, "Kuti Khirisitu unowhohha ebva kuGalile? 42 Whalo adzizoleba kuti Khirisitu unowhobhuda muludzi gwaDavida, ebva kuBhethelehhema, kunzi waka ugala Davida?" 43 Ndizo kwakabe nemhalalano pakati kwebanhu nentha yaYesu. 44 Bamwe babo baka behaka wunsunga, koga akuna nhu wakawumbhata.

45 Balindi bakabgwilila kubaphirisiti bakulu nebaFarisi, bakabe beti kubalindi, "Maletjelani hha naye?"

46 Balindi bakahandula beti, "Akuna nhu wakatongolebeleka senlume iwhoyu!"

47 BaFarisi bakabahandula beti, "Matjitungamiligwa ntome, namwi bo? 48 Kuna bamwe bebatungamili kene baFarisi bagalamoyo muwunli? 49 Imwi banhu basingazibe nlayo, makalongwa bhiso."

50 Nikodimasi, wakatongoba ayenda kuwunli, ali umwe wabo, wakati kubali, 51 "Nlayo wedu unowana nhu nlandu, nhu asanhu akatongobhuzwiwa kukazibgwa tjaayeta?"

52 Bakahandula beti, "Nawe unobva kuGalile bo? Hakisisa unowhobona kuti akuna nlebesambeli ungabva kuGalile." 53 Umwe newumwe wakayenda kunzi uwe.