1 "Imi ndin'hhambi welebeswa, Tate bangu unlimi wemahhambi. 2 Gumwe negumwe lutabi gwangu gusingazwale mitjelo, banogutema begudusa, gumwe negumwe lutabi gunozwala mitjelo banogusunulila, kuti guzwale mitjelo minjinji. 3 Matjitjenesewa kale nematama andaleba kumuli. 4 Galani mundili, nami ndigale mumuli. Sayikoku lutabi gusingake gukazwala mitjelo guli goga, kuhhe kwekuti gugale mun'hhambi, namwibo amungatubule zwala mitjelo, kuhhe kwekuti mugale mundili."

5 "Imi ndin'hhambi, imwi munhabi. Unogala mundili, nami bo ndigala muwunli, ndiye iwhoyo unowhozwala mitjelo minjinji, ngobe kuhhe kwangu akuna tjamungathama. 6 Hapa nhu asingagale mundili, unolahiwa selutabi ekoswaba; nenhabi dzakajalo dzokubunganyiwa, dzikoposegwa mumoto dzipisiwa. 7 Hapa mugala mundili, nematama angu egala mumuli, kumbilani kene ini tjamunoyemula, mowhotjithamigwa. 8 Nentha yayikoku Tate bangu banokudziwa, kuti mozwala mitjelo minjinji, nayiyeyo zila molakidza kuti mubadiyiwa bangu. 9 Sayikoku Tate bakandida, nami bo ndakamuda; galani muludo gwangu. 10 Hapa mutjengeta milayo yangu, mowhogala muludo gwangu, sekwandakatjengeta milayo yaTate bangu ndigala muludo gwabo."

11 "Ndaleba zwinhu izwezwi kumuli, kuti hanha kwangu kube mumuli, nekuti hanha kwenyu kupelele. 12 Iwhoyu ndiwo nlayo wangu, kuti mudane sekwandakamuda imi. 13 Akuna ludo gukulu kupinda igogu, kuti nhu apile butjilo gugwe ngentha yebakwinya babe. 14 Mubakwinya bangu hapa muthama tjandinomulaya. 15 Anditjamudana nditi mubalanda, ngobe nlanda atoziba kuti batezi babe banothamani; koga imi ndomudana nditi mubakwinya, ngobe kose kwandakawha naTate ndakamuzibisa. 16 Amuzondihala, koga ndakamuhala kakale ndikamupa n'hingo wekuti muyende muzwala mitjelo nekuti mitjelo yenyu ilondolodzeke, kuyetila kuti tjamunokumbila kunaTate muzina langu, bamupe. 17 Iwhoyu ndiwo nlayo wangu. mudane."

18 "Hapa hango imubenga, zibani kuti yakabenga imi isanhu ikabenga imwi. 19 Hapa mamuli behango, hango yayiwhomuda, koga nentha yekuti ndakamuhala ndimudusa muhango, amutjibehango, ndizo hango imuhema. 20 Kumbulani dama landakamubudza nditi, ‘Nlanda haata nkulu panabatezi babe.’ Hapa bedziyidza imi, banowhomudziyidza bo; hapa betjengeta dama langu banowhotjengeta lenyu bo. 21 Koga banowhothama zwinhu izwezwi kumuli ngentha yangu, ngobe abatoziba iye wakandituma. 22 Hapa ndakandisahha ndiwholebeleka nabo, banobe basina jinyo, koga sangwenu abana tjabangabgwata natjo nekwejinyo labo. 23 Unobenga imi unobenga naTate bangu bo. 24 Hapa ndakandisathama mihingo isanhu ikatongoyetiwa nenhu pakati kwabo, banobe basina jinyo; koga sangwenu bakabona, bakatibenga imi naTate bangu. 25 Ikoku kohhadzisa tjakakwagwa munlayo wabo kuyi, ‘Banondibengela tjisipo.’ "

26 "Koga hapa Ntjidzi aswika, iye wandinowhotuma kumuli ebva kunaTate, iye Meya yelebeswa, unobva kunaTate, iye unowhopa busupi nekwangu; 27 namwi bo mubasupi, ngobe makamunami kubvisila kutanga."