1 Pilatu akabe etola Yesu kuti bawunsukutile. 2 Bagwi bengwa bakaluka tjiyala tjemimhiwa, bakawumbadza mun'holo, bakawumbadza ngubo yembala welubende. 3 Bakabehha kuwunli, beti, "Ngaakudziwe, Mambo wemaJuta!" bejalo bewumadula.

4 Pilatu wakabhuda kakale, akati kubali, "Lingani, ndowundhusila kuhhe kumuli, kudze mubone kuti anditowana nlandu muwunli." 5 Ndizo Yesu wakabhuda, akambala tjiyala tjemimhiwa nengubo yembala welumende. Pilatu akati kubali, "Lingani! whoyu nhu wenyu!"

6 Baphirisiti bakulu nebalindi bakati bewumbona, bakamimila beti, "Muwunkowhomele, muwunkowhomele!"

Pilatu akabe eti kubali, "Muwuntole munowunkowhomela imwi, ngobe imi anditowuwana ananlandu."

7 MaJuta akawun'handula eti, "Tinawo nlayo, ngenlayo iwhoyo wakafanila kuti afe, ngobe unozwita Nkololo weNdzimu."

8 Pilatu wakati ewha matama iyawa, akahla kwazo, 9 wakangina mun'umba yembhati wentunhu kakale akati kunaYesu, "Unobva poni?"

Koga Yesu haazohandula. 10 Ndizo Pilatu wakati kuwunli, "Awutohaka lebeleka nami? Awutoziba kuti ndina masimba ekukusunungula nemasimba ekukukowhomela?"

11 Yesu wakawun'handula eti, "Wawusingowhobe nemasimba pehhugwi kwangu hapa wawusaapiwa ebva pehhugwi, ndizo ke iwhoyo wandihhisa kukuli ndiye unajinyo gulu."

12 Kubvila ipapo Pilatu wakatangisa haka zila yekuti awunsunungule, koga batungamili bemaJuta bakamimila beti, "Ukasunungula nlume iwhoyu, awuta nkwinya waKhesari, umwe newumwe unozwita mambo unozwigwisanya naKhesari."

13 Pilatu paakawha matama iyawo, wakadusila Yesu kuhhe akagala pasi patjigalo tjetonga pabugalo gunoyi Budzilo gweMabgwe, mutjiHhebheru tjoyi, Gabhatha. 14 Sangwenu kwaka kuli hhuba leBaakanyila Phasika; kwaka kuli masikati, kungabe awa yebutanhatu kubvisila bhuda kwehhuba. Wakati kumaJuta, "Lingani, whoyu Mambo wenyu!"

15 Bakamimila beti, "Ngayende kutjena, ngayende kutjena, muwunkowhomele!"

Pilatu wakati kubali, "Ndikowhomele Mambo wenyu?"

Baphirisiti bakulu bakahandula beti, "Atina umwe mambo kuhhe kwaKhesari."

16 Wakabaswiswa Yesu kuti bawunkowhomele.

Ndizo bagwi bengwa bakatola Yesu, 17 akabhuda akasenga tjileyanyo tjitje, bakayenda naye kubugalo gunoyi Pepe tjeN'holo, (mutjiHhebheru goyi Goligotha). 18 Ndipo ipapo kwabakanowukowhomelela po, kwaka kuna bamwe babili baakakowhomegwa nabo, un'ompela ali kuludli gugwe umwe ali kulumehwe gugwe, iye Yesu elipakati. 19 Pilatu wakakwala tjizibiso akatjinamatidza patjileyanyo, tjakakwagwa kuti, "Yesu wekuNazaretha, Mambo wemaJuta." 20 Bunji gwemaJuta manjinji akabala tjizibiso itjetjo, ngobe bugalo gwakakowhomegwa Yesu gwakaguli pedlo nenzi-nkulu, kakale kwaka kwakakwagwa netjiHhebheru, netjiLathini, kose netjiGiriki. 21 BaPhirisiti bakulu bemaJuta bakakotjiti kuna Pilatu, "Musikwale kuti, ‘Mambo wemaJuta,’ koga kwalani kuti ‘Nlume iwhoyu wakati, NdiMambo wemaJuta.’ "

22 Pilatu wakahandula eti, "Tjandakwala ndakwala."

23 Bagwi bengwa bakati bakowhomela Yesu bakapalalanya zwiyambalo zwizwe zwikabe zwikamu zwina, tjimwe netjimwe tjitogwa nengwhi; bakatola kose nengubo iye yaaka akambala. Koga ngubo iye yaka isina pakabhatshanyiwa, yakayakalukiwa kubva pehhugwi kuyenda pasi, 24 ndizo bakati umwe kuwumwe, "Ngatisiyipaluleni, koga ayikandileni malipa tibone kuti inowhobe yani." Whoku kwakayetika kuti kuhhadzisiwe lukwalo gunoti,

"Bakakobana zwiyambalo zwangu,

ngubo yangu bakayikandilila malipa."

Ndizo ikoku kwakayetiwa nebagwi bengwa.

25 Pedlo netjileyanyo tjaYesu kwaka kulimile meyabe, namayi bakulu babe, naMariya mfumakadzi waKilopasi, naMariya wekuMagadala. 26 Yesu wakati ebona meyabe, nendhiyiwa waanoda alimile pedlo, akati kuna mayi babe, "Mme, lingani, whoyo nkololo wenyu!"

27 Wakati kundhiyiwa iwhoyo, "Linga, ibabo ndimeyabo!" Kubvila lubaka igogo ndhiyiwa iwhoyo wakabatola akanogala nabo kunzi uwe.

28 Hule kwayikoku Yesu, eziba kuti kose kwatjipela, wakati (kudze lukwalo guhhadzisike), "Ndina nyota."

29 Kwaka kuna nkombe waka ulihhele wayini inohababa ipapo, bakatola lungudze guhhele wayini bakagubhayila paluhanga gwehhayisopi bakasedzedza panlomo uwe. 30 Yesu wakati an'wa wayini inohababa, akati, "Kwapela!"

Akakotamisa n'holo akapela meya.

31 Saku laka lili hhuba leBaakanyila, kuyetila kuti basisiye mitumbi ili patjileyanyo muhhuba lesabatha (ngobe sabatha ilelo laka lili hhuba gulu kwazo), batungamili bemaJuta bakakumbila kunaPilatu kuti makumbo ebakakowhomegwa avun'we, nekuti mitumbi yabo idusiwe. 32 Ndizo bagwi bengwa bakahha bakavuna makumbo ewekutanga, neewebubili waka akakowhomegwa naye, 33 koga bakati beswika kunaYesu bebona kuti watjifa kale, abazovuna makumbo awe. 34 Koga umwe webagwi bengwa wakawumbhaya nethumo palubabvu, kukabhuda malopa nevula. 35 Iwhoyo wakakubona ndiye wakapa busupi-busupi gugwe gulebeswa, kakale unoziba kuti unoleba lebeswa-kudze namwi bo mugalemoyo. 36 Ngobe zwinhu izwezwi zwakayetika kuti whalo dzihhadzisike. "Akuna fupa lile linowhovun'wa." 37 Kakale gumwe lukwalo goti, "Banowholinga kuwunli wabakabhaya."

38 Hule kwayikoku Josefa wekuArimathiya, wakabe alindhiyiwa waYesu, koga akazwisumbika, nentha yehla batungamili bemaJuta, wakakumbila kuna Pilatu kuti atole ntumbi waYesu, Pilatu akawumbvumila. Ndizo ke wakahha akatola ntumbi waYesu. 39 Nikodimasi bo, iye waka ahha kuwunli kutanga kuli busiku, wakahha akasenga mure yakahanganyiwa nenkonde, kuna nsindo ungaba makhilogiremu alimakumi matatu. 40 Bakatola ntumbi waYesu, bakawumpetelela nejila lelineni, bakawhuhhodza nemhoza yemure yakahanganyiwa nenkonde, senlenje webiganya kwemaJuta. 41 Sangwenu mubugalo gwaaka akowhomegwa kwakakuna nhiba, munhiba ipapo kwakakuna kumbu tjakatjisanhu tjikabiganyiwa nhu mutjili. 42 Ndizo ngentha yehhuba leBaakanyila kwetjiJuta, sekumbu itjetjo tjaka tjilipedlo, bakabiganya Yesu ipapo.