1 Yesu wakati eyenda muzila, akabona nlume waka alibhofu kubvisila pakuzwagwa kukwe. 2 Badiyiwa babe bakawumbhuzwa beti, "Rabhi, ndiyani wakatjinya, ndiye nlume iwhoyu kene bazwadzi babe, kuti adze azwagwe ali bhofu?"

3 Yesu wakahandula eti, "Akuta kuli kuti nlume iwhoyu wakatjinya, kene ibo bazwadzi babe, koga ibhofu kuyetila kuti mihingo yeNdzimu ilakidziwe muwunli. 4 Takafanila hinga mihingo yewakandituma, kutjimasikati, busiku gowhohha, pasingowhoba nenhu unotubula hinga. 5 Hapa nditjimuhango, nditjedza tjehango."

6 Wakati ejalo, akapfila mate pasi akathama dope nemate akahhodza meho enlume iwhoyo nedope, 7 eti kuwunli, "Yenda, unongula kugan'wa linoyi Silowamu" (Kuleba kuti Tumwa). Ndizo wakayenda akanongula akahanduka obona.

8 Babakidzani nebamwe bakawumbona kutanga etjayenda ekumbila, bakati, "Akuta iye nlume iwhoya waka etongoba ekumbila?"

9 Bamwe bakati, "Ndiye," bamwe bakati, "Aa, koga unofanana naye."

Iye wakabahandula eti, "Ndimi nlume iwhoya."

10 Bakahwelela bewumbhuzwa beti, "Ngono meho awo ahhulika tjini?"

11 Wakahandula eti, "Nlume unoyi Yesu wathama dope akandihhodza pameho akati kundili, ‘Yenda unongula kuSilowamu,’ ndizo ndayenda ndikanongula ndikabona."

12 Bakati kuwunli, "Uponi?"

Iye wakahandula eti, "Anditoziba."

13 Banhu bakahhisa nlume waka atongoba bhofu kubaFarisi. 14 Sangwenu laka lili hhuba leSabatha Yesu paaka athama dope akapofunula bhofu. 15 BaFarisi bakapamha bakawumbhuzwa kuti wawamutjila bona tjini. Iye wakati kubali, "Wandibhoma dope pameho angu, ndikangula, ndizo ndeebona."

16 Bamwe bebaFarisi bakati, "Nlume iwhoyu haatobva kuNdzimu, Ngobe haatolemekedza Sabatha."

Koga bamwe bakati, "Nhu untjinyi angayeta tjini zwilakidzilo zwakajali?" Kwakabe nekupalalana pakati kwabo.

17 Bakapamha kakale beti kunlume wayelibhofu, "Iwe unotini nekukwe, saku ahhula meho awo?"

Wakati, "Unlebesambeli."

18 Batungamili bemaJuta baka besingagalemoyo kuti waka ali bhofu wapofunuka, bakadza bakadana bazwadzi benlume waka apofunuka, 19 bakababhuzwa beti, "Unkololo wenyu iwhoyu, wamunoti wakazwagwa ali bhofu? Weebona tjini?"

20 Bazwadzi babe bakahandula beti, "Toziba kuti unkololo wedu, kakale kuti wakazwagwa ali bhofu; 21 koga kuti weebona tjini atitoziba, kene iko kuti ndiyani wahhula meho awe. Muwumbhuzwe; watjikula, unowhozwilebelekela." 22 Bazwadzi babe bakaleba ikoku ngobe bakabehla batungamili bemaJuta, ngobe batungamili bemaJuta baka babvumilana kuti kene yani unowhobvuma kuti Yesu ndiye Khirisitu, unowhotakhwa musinagogu. 23 Ndizo bazwadzi babe bakati, "Muwumbhuzwe, watjikula, unowhozwilebelekela."

24 Gwebubili bakadana nlume wayelibhofu, bakati kuwunli, "Lumbidza Ndzimu, toziba kuti nlume iwhoyu untjinyi."

25 Wakabahandula eti, "Kuti kene untjinyi, anditoziba, tjin'ompela nditjo tjandinoziba, kuti nekutobe ndandili bhofu ngwenu ndeebona."

26 Bakati kuwunli, "Wathamani kukuli? Wahhula tjini meho awo?"

27 Wakabahandula eti, "Ndamubudza kale, amuzowhilila. Mohakilani wha kakale? Namwi bo meehaka ba badiyiwa babe kani?"

28 Bakawuntuka, beti, "Iwe ndiwe ndhiyiwa uwe, koga iswi tibadiyiwa baMozisi. 29 Toziba kuti Ndzimu wakalebeleka naMozisi, koga whoyu nlume, atitoziba kuti unobva poni."

30 Nlume iwhoyo wakahandula eti, "Nentha yeni, yeli ijenamiso! Amutoziba kwaanobva, koga wahhula meho angu. 31 Toziba kuti Ndzimu atowhilila batjinyi, koga hapa nhu ali namati weNdzimu kakale eyeta kuda kukwe, Ndzimu unowuwhilila. 32 Kwetjinga hango kwayakabayapo akuna wakatongowha kuyi uyapo wakatongopofula nhu wakazwagwa alibhofu. 33 Hapa nlume iwhoyu wabe asingabve kuNdzimu wabe asingowhothama tjinhu."

34 Bakawun'handula beti, "Wakazwaligwa mujinyo, ngono weyedza tidiya?" Bakawuntatila kuhhe.

35 Yesu wakawha kuti bawuntata, wakati awuwana akati kuwunli, "Unogalamoyo muNkololo weNhu?"

36 Wakahandula eti, "Ndiye yani iwhoyo, mundibudze kuti ndiye yani, He, kuti ndigalemoyo muwunli?"

37 Yesu wakati kuwunli, "Wawumbona, kakale ndiye iwhoyo unolebeleka nawe."

38 Wakahandula eti, "He, Ndogalamoyo." Akawunamata.

39 Yesu wakati, "Ndakahhila tonga hango ino, kuti basingabone babone, nekuti banobona babemapofu."

40 Bamwe bebaFarisi bakabalipedlo bakakuwha ikoku, bakati kuwunli, "Naswi bo timapofu?"

41 Yesu wakati kubali, "Katshene mamuli mapofu, mobe musina nlandu, koga sangwenu muti, ‘Tobona,’ mowhogala muna nlandu."