1 Hule kwayikoku Yesu wakayenda seli yegungwa lekuGalile, ilo linoyi gungwa leThibheriyasi. 2 Akatobegwa nebunga lebanhu, ngobe bakabebona zwilakidzilo zwaaka ethama kubanhu banogwala. 3 Yesu wakatanha pehhugwi kwedombo, akaswika egala pasi nebadiyiwa babe. 4 Sangwenu Phasika, nzano wemaJuta waka wabe pedlo. 5 Emilidza meho awe, ebona kuti bunga lebanhu gulu lohha kuwunli, Yesu wakati kunaFiliphi, "Tingatenga poni tjinkwa, kuti banhu ibaba badle?" 6 Wakangoleba ikoku kuti alike Filiphi, kanha wake eziba zwe kuti unowhothamani.

7 Filiphi wakawun'handula eti, "Makulu mabili emadinari* haangatenge zwinkwa zwekuti umwe newumwe angowana kuhomanana kwebhata bula."

8 Umwe webadiyiwa babe, unoyi Andhireya, nun'una waSimoni Phethiro, wakati kuwunli, 9 "Kuna mbisana ipapa una zwinkwa zwihanu zwebhali newhobe mbili, koga kungalizana banhu bose ibaba?"

10 Yesu wakati kubali, "Thamani kuti banhu bagale pasi." Kwaka kulihhele buhwa ipapo; ndizo banhu bakagala pasi; kwaka kuna balume bangaswika zwiwulu zwihanu. 11 Yesu wakakotola zwinkwa, akaboka Ndzimu, wakati apedza boka, akakobela ibabo bakabaligele pasi; akathama ejalo bo newhobe, bose bakadla sekwabaka betubula. 12 Bakati badla baguta, akati kubadiyiwa babe, "Wolelani zwipemu zwasala, kusibe netjinozanisika." 13 Ndizo bakawolela zwipemu zwezwinkwa zwebhali zwihanu zwakazwasiyiwa nebakabedla, bakahhadza zwitundu zwiligumi nezwibili.

14 ✝Banhu bakati bebona tjilakidzilo tjaayeta, bakati, "Iwhoyu ndiye nlebesambeli dumbu wakafanila kuti ahhe muhango!" 15 ✝Yesu wakati ebona kuti banobva bebuya bewhowuntola nemasimba kuti bawunthame mambo, akabe enyeluka enobgwata mudombo ali yega.

16 Kwakati kwatjiba madekwana badiyiwa babe bakajitila kugungwa, 17 bakangina mukepe, bakamilika bepalama gungwa beyenda kuKhaphenawume. Kwaka kwatjibe hhalima, koga Yesu asanhu akahha kubali. 18 Vula yegungwa yakakabhukana ngobe kwakakuhhuhhudza mhepo inamasimba. 19 Kwakati kepe tjatjiyenda kwemakhilomitha angaba mahanu kene matanhatu, bakabona Yesu eyenda pehhugwi kwegungwa esedzela pedlo nekepe. Bakahla, 20 koga iye wakati kubali, "Ndimi, musihle." 21 Bakahanha kuti bawunginise mukepe, tjinyolotjo kepe tjakabva tjaswika pahango kwabaka beyenda.

22 Muhhuba linotobela banhu bakabaliseli yegungwa bakabona kuti kwakuna kepe tjin'ompela koga ipapo, nekuti Yesu haazongina mukepe nebadiyiwa babe, koga badiyiwa babe bakabamilika baliboga. 23 Koga ke, kwakaswika zwikepe zwinobva kuThibheriyasi pedlo nebugalo gwabakadlila tjinkwa hule kwekusinobe He aboka. 24 Ndizo banhu bakati bebona kuti Yesu aatapo, kene ibo badiyiwa babe, bakangina muzwikepe bakayenda kuKhaphenawume, behaka Yesu.

25 Bakati bewuwana seli yegungwa, bakati kuwunli, "Rabhi, makahha lini ngeno?"

26 Yesu wakabahandula eti, "Ndolebesa, ndolebesa, ndoti kumuli, mondihaka, kusi nentha yekuti makabona zwilakidzilo, koga nentha yekuti makadla mukaguta zwinkwa. 27 Musihingile zodliwa zwinowhopalala, koga hingilani zodliwa zwinogala kudzina kunobe kubutjilo gusingapele, gwamunowhopiwa neNkololo weNhu, ngobe pawunli Ndzimu Tate bakasa lutjayo gwabo gwebvuma."

28 Bakakotjiti kuwunli, "Titeni, kuti tithame mihingo yeNdzimu?"

29 Yesu wakabahandula eti, "Iwhoyu ndiwo n'hingo weNdzimu, kuti mugalemoyo muna iye waakatuma."

30 Ndizo bakati kuwunli, "Ngono nowhothama tjilakidzilo ludzini, kuti tibone, tikugalemoyo? Unowhotiyetila n'hingo ludzini? 31 Bobatategulu bedu bakadla mana mutjilambanyika, sekwakakwagwa, ‘Wakabapa tjinkwa tjinobva kudzimu kuti badle.’ "

32 Yesu wakakoti kubali, "Ndolebesa, ndolebesa, ndoti kumuli, kwaka kusiMozisi wakamupa tjinkwa tjinobva kudzimu, Tate bangu ndibo banomupa tjinkwa tjakwako tjinobva kudzimu. 33 Ngobe tjinkwa tjeNdzimu ndi iwhoyo unojita ebva kudzimu, unopa butjilo muhango."

34 Bakati kuwunli, "He, mugale mutipa tjinkwa itjetji."

35 Yesu wakati kubali, "Imi ndimi tjinkwa tjebutjilo, iye unohha kundili haatowhobe nehhala, kakale unogalamoyo mundili haatowhobe nenyota. 36 Koga ndati kumuli, mandibona koga amutondigalamoyo. 37 Bose bandinopiwa naTate banowhohha kundili, kakale bose banowhohha kundili anditowhobatata. 38 Nekuti ndakajetuka ndibva kudzimu, kusi kuti ndiwhothama kuda kwangu koga kuti ndiyete kuda kwewakandituma. 39 Whoku ndiko kuda kwewakandituma, kuti ndisitongolahikigwa newumwe wa ibabo bose baakandipa, koga kuti ndibamuse bose muhhuba lebupelo. 40 Ngobe whoku ndiko kuda kwaTate bangu, kuti umwe newumwe unobona Nkololo akagalamoyo muwunli abe nebutjilo gusingapele, kakale ndowhowumusa pahhuba lebupelo."

41 MaJuta akatangisa n'un'una nekukwe, ngobe wakati, "Nditjinkwa tjakajita tjibva kudzimu." 42 Bakati, "Haate iye Yesu iwhoyu, nkololo waJosefa, unatatayi namayi batinoziba? Ngono unoti, ‘Ndakajita ndibva kudzimu tjini?"

43 Yesu wakabahandula eti, "Musin'un'une pakati kwenyu. 44 Akuna nhu ungahha kundili kuhhe kwekuti Tate bakandituma bawuhhisa, kakale ndowhowumusa muhhuba lebupelo. 45 Kwakakwagwa nebalebesambeli kuti, ‘Bose banowhodiyiwa neNdzimu.’ Umwe newumwe wakawha akadiyika kubva kuna Tate unohha kundili. 46 Akuna wakatongobona Tate kuhhe kwayiye unobva kuNdzimu, ndiye wakabona Tate. 47 Ndolebesa, ndolebesa, ndoti kumuli, iye unogalamoyo unabutjilo gusingapele. 48 Imi ndimi tjinkwa tjebutjilo. 49 Bobatategulu benyu bakadla mana mutjilambanyika, bakafa. 50 Yetji nditjo tjinkwa tjakajita tjibva kudzimu, kuti nhu unotjidla asife. 51 Imi nditjinkwa tjipenyu tjakabva kudzimu, unowhotjidla itjetji tjinkwa, unowhotjila nekusingapele, tjinkwa tjandinowhopa kuti hango yose ibe nebutjilo umbili wangu."

52 MaJuta akakakabadzana eti, "Nlume iwhoyu ungatipa mbili uwe kuti tidle tjini?"

53 Ndizo Yesu wakati kubali, "Ndolebesa, ndolebesa, ndoti kumuli, kuhhe kwekuti mudle mbili weNkololo weNhu kakale mun'we malopa awe, amuna butjilo mumuli, 54 iye unodla mbili wangu en'wa malopa angu unabutjilo gusingapele, kakale ndowhowumusa muhhuba lebupelo, 55 ngobe mbili wangu izodliwa zwakwako, kakale malopa angu ndetjinon'wiwa tjakwako. 56 Iye unodla mbili wangu kakale en'wa malopa angu unogala mundili, nami ndogala muwunli. 57 Sekwandakatumwa naTate bapenyu, ndotjila nentha yaTate, ndizo unondidla unowhotjila nentha yangu. 58 Nditjo itjetji tjinkwa tjakajita tjibva kudzimu, atjitonga tjinkwa tjakadliwa nabobatategulu benyu bakakofa, iye unodla tjinkwa itjetji unowhotjila nekusingapele."

59 Wakakuleba kose ikoku musinagogu, ediya muKhaphenawume.

60 Bunji gwebadiyiwa babe, bakati bekuwha ikoku, bakati, "Indebo inolema iyeyi, ndiyani ungayiwhilila?"

61 Koga Yesu, eziba mukati kukwe kuti badiyiwa banon'un'urika nekwako, wakati kubali, "Magwadziwa nayikoku? 62 Ngono mukabona Nkololo weNhu ewulukila pehhugwi eyenda kwaaka aliko kutanga ke? 63 Meya ndiyo inopa butjilo, nyama ayina bhatsho, matama andaleba kumuli ameya nebutjilo. 64 Koga kuna bamwe benyu basingagalemoyo." Ngobe Yesu waka eziba kubvisila kutanga kuti ndiboyani basingagalemoyo, nekuti ndiyani unowhowuntengesa. 65 Wakati, "Ndizo ndakamubudza kuti akuna nhu unowhohha kundili kuhhe kwekuti abvumigwa naTate."

66 Hule kwayikoku bunji gwebadiyiwa babe bakabgwilila hule bakaletja yenda naye. 67 Yesu wakati kuna baligumi nebabili, "Namwi bo moyemula yenda bo?"

68 Simoni Phethiro wakawuhandula eti, "He, tokoyenda kuna yani? Imwi muna matama ebutjilo gusingapele; 69 kakale tegalamoyo, kakale teeziba kuti imwi ndimwi wakaYengemala weNdzimu."

70 Yesu wakabahandula eti, "Andizomuhala, imwi muligumi nebabili? Koga umwe wenyu ndiSatane." 71 Waka eleba nekwaJudasi nkololo waSimoni Isikariyoti, ngobe nekene waka ali umwe webaligumi nebabili, waka ewhowuntengesa.