1 Mahhuba matanhatu kusanhu kwaswika Phasika, Yesu wakaswika kuBhethani, kwakabe kunaLazaro, waka amusiwa naYesu kubafi. 2 Bakawumbhikila tjilayilo ko, Maritha wakabapakulila zodliwa, Lazaro wakabe ali umwe webanhu bakadla naye. 3 Mariya wakatola kumbgwana tjinamafuta enadi yakwako anantengo upehhugwi kwazo akahhodza makumbo aYesu akawabuhika nemavudzi awe, n'umba yose ikahhala nhuwilila kwemafuta. 4 Koga Judasi Isikariyoti, umwe webadiyiwa babe (Iye wake ewhowuntengesa), wakati, 5 "Nentha yeni mafuta iyawa asatengesewa nemakulu matatu emadinari akakopiwa bahayi?" 6 Whoku wakakuleba, kusi kuti unahanya nebahayi koga nentha yekuti waka ali mbava, saku waka etjengeta kwama tjemari waka etongotola zwe tjakatjisiwa mukati.

7 Yesu wakati, "Siyanani naye, letjani ewatjengetele hhuba lebiganyiwa kwangu. 8 Bahayi mogala munabo, koga imi amutowhoba nami tjoselele."

9 MaJuta manjinji akati awha kuti uyipapo, akahha, kusi ngentha yaYesu yega, koga kuti awhobona bo naLazaro, waka amusiwa kubafi. 10 Ndizo baphirisiti bakulu bakalangana kuti babulaye Lazaro bo, 11 ngobe ngentha iye maJuta manjinji aka ebatihha egalamoyo munaYesu.

12 Hhuba linotobela bunga gulu lakalahha kunzano lakawha kuti Yesu waka ewhohha kuJerusalema. 13 Ndizo bakatola nhabi dzemiti yemilala bakayenda benowun'hanganidza, bemimila beti, "Whosana! Wakakombolegwa iye unohha muzina laHe, Mambo weIsirayeli!"

14 Yesu wakawana gondolo lekakambe akagala pehhugwi kwalo, sekwakakwagwa kuti,

15 "Usihle, nkololokadzi weZiyoni!

Linga, mambo uwo unohha,

akatanha gondolo lekakambe!"

16 Badiyiwa babe abazokuwhisisa kutanga, koga Yesu wakati atjikudziwa, bakakotjikumbula kuti ikoku kwaka kwakakwagwa nekukwe kakale kukayetiwa kuwunli.

17 Bunga laaka analo paakadana Lazaro kuti abhude mukumbu akawumusa kubafi lakayendilambeli lipa busupi. 18 Tjakathama kuti mbunga webanhu uwun'hanganidze whuti banhu bakabatjiwha kuti wathama jenamiso ileli. 19 BaFarisi bakati umwe kuwumwe, "Mobona kuti akuna tjamungathama, lingani, hango yose yewuntobela."

20 Sangwenu pakati kwebakayenda kunonamata kunzano kuJerusalema kwaka kuna maGiriki. 21 Ndizo ibabo bakahha kunaFiliphi, waka ebva kuBhethisayida muGalile, bakati kuwunli, "He, tokumbila bona Yesu."

22 Filiphi wakayenda akanobudza Andhireya, Andhireya naFiliphi bakayenda bakanobudza Yesu. 23 Yesu wakabahandula eti, "Lubaka gwaswika gwekuti Nkololo wenhu akudziwe. 24 Ndolebesa, ndolebesa, ndoti kumuli, kuhhe kwekuti mhudzi yelukwehha iwile pasi mumavu ife, inowhogala ili yoga, koga ikafa, inozwala zwidlo zwinjinji. 25 Iye unoda butjilo gugwe gowunlahikila, iye unobenga butjilo gugwe muna ino hango unowhogutjengetela butjilo gusingapele. 26 Hapa kuna unondihingila, wakafanila nditobela; nepandiyapo, ipapo ndiko kunowhobe kunanlanda wangu bo; hapa kuna unondihingila, Tate banowhowunlemekedza."

27 "Sangwenu meya yangu yedziyidzika. Ngono nditini? ‘Nditi, ‘Tate, munditjidze palubaka igogu’? Aa, kungentha yayikoku ndaswika palubaka igogu. 28 Tate, kudzani zina lenyu."

Kukawhakala whi libva kudzimu, liti, "Ndalikudza, ndowhopamha ndikalikudza."

29 Bunga lakalilimile ipapo lakawha whi, bamwe mubunga bakati kwatitima, bamwe bo bakati, "Ntumwa weNdzimu walebeleka naye."

30 Yesu wakahandula eti, "Whi ileli lahhila imwi, kusi imi. 31 Ngwenu tongewa kwehango iyeyi kwatjiswika, sangwenu ntungamili wehango ino unotjowhoposegwa kuhhe. 32 Nami, hapa ndatjimilidzigwa pehhugwi kubva muhango, ndowhokwebela banhu bose kundili." 33 Ikoku wakakuleba elakidza lufu gwaakafanila kuti afe ndigo.

34 Bunga lakawun'handula liti, "Takawha munlayo kuti Khirisitu unotjila tjatjose. Ngono iwe unoti Nkololo weNhu unowhomilidzigwa pehhugwi tjini? Nkololo weNhu iwhoyu ndiyani?"

35 Yesu wakabahandula eti, "Tjedza tjipakati kwenyu kwelubakanyana gunotobela. Yendani mutjina tjedza, swiyo mungabva mubhakhwa nehhalima, unotjila muhhalima atoziba kwaanoyenda. 36 Hapa tjedza tjitjiyapo, galanimoyo mutjedza kuti mubebana betjedza."

Yesu wakati aleba ikoku, akamilika akanobabgwatila. 37 Nekutobe aka athama zwilakidzilo zwinjinji mbeli kwabo, koga abazowunghalamoyo, 38 kuyetila kuti dama lakalebgwa nenlebesambeli Isaya lihhadzisike,

"He, ndiyani wakagalamoyo muna tjatakaleba,

kakale luboko gwaHe gwakazumbunuligwa yani?"

39 Ndizo baka basingake bakagalamoyo. Ngobe Isaya wakati kakale,

40 "Wakata meho abo akaba mapofu

akata mimoyo yabo ikaba mikukutu,

swiyo bangabva bebona nemeho abo

bakawhisisa nemimoyo yabo,

bakahandukila kundili

kuti ndibapolese."

41 Isaya wakaleba ikoku nentha yekuti wakabona gudzo laYesu akaleba nekukwe.

42 Ndizo ke, batungamili bemaJuta banjinji bakagalamoyo munaYesu; koga ngentha yebaFarisi bakabasingakulebe patjena, kuyetila kuti basitongotakhwa musinagogu, 43 ngobe bakabeda lumbidziwa nebanhu kupinda lumbidziwa neNdzimu.

44 Yesu wakamimila eti, "Unogalamoyo mundili, haatogalamoyo mundili, koga unogalamoyo muna iye wakandituma. 45 Wabona imi wabona iye wakandituma. 46 Ndakahha ndilitjedza tjehango, kuti kene yani unogalamoyo mundili asitongogala alimuhhalima. 47 Hapa kuna unowha matama angu akasawatjengeta, anditowuntonga, ngobe andizobinga whotonga hango koga ndakabinga whotjidza hango. 48 Iye unondilamba kakale asingawamutjile matama angu, kuna unowuntonga; dama landaleba lowhobe ilo ntongi muhhuba lebupelo. 49 Ngobe andizolebeleka ngemasimba angu, Tate ibo bakandituma ndibo bakandipa nlayo wezwandinoleba nezwandinoteketa. 50 Kakale ndoziba kuti nlayo wabo butjilo gusingapele. Tjandinoleba, ndizo, ndotjileba sekwandabudziwa naTate."