1 Yesu wakati apedza tembezela, akayendilambeli etjuluka nkuku weKhidironi nebadiyiwa babe, kwakabe kuna nhiba, yaakangina iye nebadiyiwa babe. 2 Sangwenu Judasi, iye wakawuntengesa, waka eguziba bo igogu bugalo; ngobe Yesu waka egala ehangana nebadiyiwa babe ko. 3 Ndizo Judasi, wakatola bunga lebagwi bengwa nebamwe balindi banobva kubaphirisiti bakulu nebaFarisi, bakayenda ko bakasenga zwivoneko nezwigo. 4 Yesu, ezibazwe kuti ini tjinowhowuwila, wakasedzela akati kubali, "Mohaka yani?"

5 Bakahandula beti, "Yesu wekuNazaretha."

Yesu akabe eti kubali, "Ndimi."

Judasi, wakawuntengesa, waka alimile nabo. 6 Yesu paakati kubali, "Ndimi," bakasedzela hule bakawila pasi. 7 Akababhuzwa kakale eti, "Mohaka yani?"

Bakati, "Yesu wekuNazaretha."

8 Yesu wakahandula eti, "Ndamubudza kuti ndimi; ndizo, hapa muhaka imi letjani balume ibaba bayende." 9 Whoku kwaka kuli kwekuti kuhhadzisike dama laaka aleba eti, "Pana ibabo bamakandipa andizolahikigwa kene newun'ompela."

10 Kukakoti Simoni Phethiro, anabhangatjeke, wakalihomola akatema nlanda wemphirisiti upehhugwi akawunthubula zebe yekuludli. Zina lenlanda laka liyi Malikhasi. 11 Yesu wakati kunaPhethiro, "Bgwiliza bhangatjeke lilo muwhomo; andizofanila kuti ndin'we nkombe wandapiwa naTate bangu?"

12 Ndizo bunga lebagwi bengwa nentungamili wabo nebalindi bemaJuta bakabhata Yesu bakawunsunga. 13 Bakatanga bawuyendesa kunaAnasi; ngobe waka ali tezwale baKhayiyafasi, iye waka alimphirisiti upehhugwi gole ilelo. 14 Kwaka kuliKhayiyafasi wakabe abudza batungamili bemaJuta kuti kuhine kuti nhu un'ompela afile banhu.

15 Simoni Phethiro wakatobela Yesu, umwe ndhiyiwa wakathama ejalo bo. Ndhiyiwa iwhoyo waka ezibgwa nemphirisiti upehhugwi, wakangina mulubahhe gwemphirisiti upehhugwi anaYesu, 16 Phethiro akasala alimile kuhhe kwenkoba. Ndizo iwhoya umwe ndhiyiwa, waka ezibgwa nemphirisiti upehhugwi, wakabhuda akanolebeleka nen'hingikadzi waka alinlindi wenkoba, akanginisa Phethiro. 17 Iwhoyo n'hingikadzi waka alinlindi wenkoba wakati kuna Phethiro, "Awuta uli umwe webadiyiwa benlume iwhoyu?"

Phethiro wakahandula eti, "Andita iye."

18 Sangwenu balanda nebalindi bakabakoka masimbe, ngobe kwakakupota, baka balimile bedziya iwo, Phethiro waka alimile nabo edziya bo.

19 Mphirisiti upehhugwi wakabhuzwa Yesu nekwebadiyiwa babe nezwidiyo zwizwe. 20 Yesu wakawun'handula eti, "Ndakalebeleka patjena kuhango yose; ndogala ndidiya mumasinagogu nemuthempeli, panohangana maJuta ose; akuna tjandakaleba pakasumbikika. 21 Mobhuzwilani imi? Bhuzwani ibabo bakandiwha, kuti ini tjandakaleba kubali; banoziba tjandakaleba."

22 Wakati aleba ikoku, umwe webalindi waka alimile pedlo wakamakula Yesu, eti, "Ndiyo zila yawunohandula nayo mphirisiti upehhugwi iyeyi?"

23 Yesu wakawun'handula eti, "Hapa ndaleba tjisakalulama, ipa busupi gwatjo; koga hapa ndaleba tjakalulama, unondilobelani?"

24 Anasi wakakowumpindisila kunaKhayiyafasi mphirisiti upehhugwi, akasungwa.

25 Simoni Phethiro waka alimile edziya masimbe. Bakati kuwunli, "Iwe bo awuta uli umwe webadiyiwa babe?"

Wakalandula eti, "Andita iye."

26 Umwe webalanda bemphirisiti upehhugwi, hama yenlume waka athubugwa zebe naPhethiro, wakabhuzwa eti, "Andizokubona munhiba unaye?"

27 Phethiro wakalandula kakale, tjinyolotjo gukurume liba lilila.

28 Bakakotjitola Yesu bebva kun'umba yaKhayiyafasi bakayenda naye kun'umba yembhati wentunhu. Kwaka kuli mangwanana, ibo tjekwabo abazotongongina mun'umba yembhati wentunhu wemaRoma, kuti basitongolongwa hambgwa, koga batubule dla phasika. 29 Ndizo Pilatu wakabhudila kuhhe kubali akati, "Mowuntilika nlandu weni iwhoyu nlume?"

30 Bakawun'handula beti, "Hapa nlume iwhoyu wabe asi nthami wezwibi, tabe tisingowhowunlesi kumuli."

31 Pilatu wakati kubali, "Muwuntole imwi muyende naye munowuntonga ngekwenlayo wenyu."

MaJuta akati kuwunli, "Akuta panlayo kuti iswi titongele nhu kuti abulawe." 32 Whoku kwaka kuli kwehhadzisa dama lakalebgwa naYesu elakidza lufu gwaakafanila kuti afe ndigo.

33 Pilatu wakangina mun'umba yembhati wentunhu kakale akadana Yesu, akabe eti kuwunli, "Ndiwe Mambo wemaJuta?"

34 Yesu wakahandula eti, "Unkumbulo uwo iwhoyu, kene bamwe banhu ndibo bakubudza bejalo nekwangu?"

35 Pilatu wakahandula eti, "NdiNjhuta imi? Tjaba tjitjo nebaphirisiti bakulu ndibo bakuhhisa kundili, wathamani?"

36 Yesu wakahandula eti, "Bumambo gwangu agute gwehango ino, hapa bumambo gwangu gwaguli gwehango ino balanda bangu babowhogwa, kuti ndisibhakhwe nemaJuta, koga bumambo gwangu agute gwemuhango."

37 Pilatu wakati kuwunli, "Ngono umambo?"

Yesu wakahandula eti, "Nojalo kuti ndimambo. Ngobe ndakazwaligwa iko, ikoku ndiko kwandakahhila muhango, kuti ndipe busupi gwemalebeswa. Umwe newumwe unobe aliwelebeswa unowha whi langu."

38 Pilatu wakati kuwunli, "Lebeswa ini?"

Hule kwekusinobe aleba ikoku, wakabhudila kuhhe kumaJuta kakale, akababudza eti, "Anditowana nlandu muwunli. 39 Koga munanlenje wekuti ndakafanila musunungulila nsungwa un'ompela paPhasika, ndizo mungahaka kuti ndimusunungulile Mambo wemaJuta?"

40 Bakamimila kakale beti, "Kusi iye iwhoyu nlume, koga Bharabhasi!" Sangwenu Bharabhasi waka alimpanduki.