1 Sangwenu kwaka kuna umwe nlumetate waka elimFarisi, waka eyi Nikodimasi, ali umwe webatungamili bemaJuta. 2 Nlume iwhoyu wakahha kuna Yesu busiku akati kuwunli, "Rabhi, toziba kuti mundhiyi unobva kuNdzimu, ngobe akuna nhu ungathama zwilakidzilo izwezwi zwamunothama, kuhhe kwekuti Ndzimu abe anaye."

3 Yesu wakawun'handula eti, "Ndolebesa, ndolebesa, ndoti kukuli, kuhhe kwekuti nhu azwagwe butshwa, aangabone bumambo gweNdzimu."

4 Nikodimasi wakati kuwunli, "Nhu ungazwagwa butshwa tjini iye atjikula? Angangina gwebubili muntumbu wameyabe akakozwagwa kakale?"

5 Yesu wakahandula eti, "Ndolebesa, ndolebesa ndoti kukuli, kuhhe kwekuti nhu azwagwe nevula nangeMeya, aangangine mubumambo gweNdzimu. 6 Tjinozwagwa nenyama inyama, kakale tjinozwagwa neMeya imeya. 7 Usitjename kuti ndati kukuli, ‘Wakafanila kuti uzwagwe butshwa.’ 8 Mhepo inohhuhhudza iyenda kwayinoda, kakale unowha hhoba yayo, koga usingazibe kuti inobvayi kene kuti inoyenda poni, kwakajalo bo nemubanhu bose banozwagwa neMeya."

9 Nikodimasi wakati kuwunli, "Kungayetika tjini ikoku?"

10 Yesu wakawun'handula eti, "Undhiyi webaIsirayeli, ngono awutokuwhisisa ikoku? 11 Ndolebesa, ndolebesa, ndoti kukuli, toleba tjatinoziba, kakale topa busupi gwezwinhu zwatabona; koga imwi amutowamutjila busupi gwedu. 12 Hapa ndamubudza zwinhu zwehango koga mukasagalamoyo, mowhogalamoyo tjini hapa ndingamubudza zwinhu zwekudzimu? 13 Akuna nhu wakatongoyenda kudzimu kuhhe kweNkololo wenhu yega, iye wakadeluka ebva kudzimu. 14 Saku Mozisi akamilidza nyoka mutjilambanyika, ndizo Nkololo weNhu unowhomilidzigwa pehhugwi, 15 kuti nhu wose unogalamoyo muwunli abe nebutjilo gusingapele."

16 Ngobe Ndzimu wakada hango zwingapa, kwekuti wakapila Nkololo uwe uyega, kuti nhu wose unogalamoyo muwunli asife koga abe nebutjilo gusingapele. 17 Ngobe Ndzimu wakatuma Nkololo muhango, esingahhile tonga hango, koga kuti hango itjidziwe muzina lile.

18 Iye unogalamoyo muwunli haatopiwa nlandu; koga iye usingagalemoyo watjiwanikwa nlandu kale, ngobe haazogalamoyo muzina leNkololo iye yega weNdzimu. 19 Iwhoyu ndiwo ntongo, kuti tjedza tjahha muhango, koga banhu bakada hhalima kupinda tjedza, ngobe zwiyeto zwabo zwakazwilizwibi. 20 Ngobe umwe newumwe unoyeta zwibi unohema tjedza, kakale haatohha kutjedza, ngobe eti swiyo zwiyeto zwizwe zwingafumugwa. 21 Koga iye unoyeta zwinhu zwelebeswa unohha kutjedza, kuti kubon'we patjena kuti zwiyeto zwizwe zwayetiwa ngekugalamoyo muNdzimu.

22 Hule kwayikoku Yesu wakayenda nebadiyiwa babe kuntunhu weJudiya; akagala nabo ikweno ebvubika banhu. 23 Johane waka ebvubika kuAyenoni pedlo neSalimu, ngobe kwakakuna vula njinji ipapo, banhu bakabehha bebvubikiwa. 24 Johane waka asanhu akasiwa mujele.

25 Kwakaba nekukakabadzana pakati kwebadiyiwa baJohane newumwe Njhuta nekwetjenesewa. 26 Bakahha kuna Johane, bakati kuwunli, "Rabhi, iye wamaka munaye seli yaJorodani, iye wamakapa busupi nekukwe, whoyoke, weebvubika, kakale banhu bose beyenda kuwunli."

27 Johane wakahandula eti, "Akuna ungawamutjila kene ini kuhhe kwekuti atjipiwa tjibva kudzimu. 28 Namwi bo muna busupi, kuti ndakati, ‘Andita iye Khirisitu, koga ndakatumwa mbeli kukwe.’ 29 Iye una nlongo ndiye nkwaha; nkwinya wenkwaha, unoma ntome kukwe ewhilila, unohanhila whi lenkwaha; ndizo ke hanha kwangu ikoku kwapelela. 30 Wakafanila kuti akudziwe imi nditelele."

31 Iye unobva pehhugwi upehhugwi kwabo bose; iye unobva muhango ndewehango, kakale unoleba kwehango; iye unobva kudzimu upehhugwi kwabo bose. 32 Unopa busupi gwezwinhu zwaabona nezwaawha, koga akuna unowamutjila busupi gugwe, 33 Iye unowamutjila busupi gugwe unobvuma kuti Ndzimu ulebeswa. 34 Nekuti iye wakatumwa neNdzimu unoleba matama eNdzimu, ngobe Ndzimu haatopa Meya ngetjiyelo, 35 Tate banoda Nkololo, ndizo bakasa zwinhu zose mumaboko awe. 36 Iwhoyo unogalamoyo muNkololo unabutjilo gusingapele, usingawhilile Nkololo haatowhogubona butjilo, koga buhongola gweNdzimu gugele pehhugwi kukwe.