1 "Ndaleba kose ikoku kumuli, kuti musiletjedze galamoyo mundili. 2 Banowhomutata mumasinagogu, lebeswa, lubaka gohha gwekuti unomubulaya unowhokumbula kuti unohingila Ndzimu. 3 Banowhokuthama kose ikoku ngobe abazoziba Tate, kene imi. 4 Koga ndaleba zwinhu zose izwezwi kumuli, kuti hapa lubaka gwaswika mukumbule kuti ndakamubudza izo."

"Andizoleba zwinhu izwezwi kumuli kubvisila kutanga, ngobe ndakandinamwi. 5 Koga sangwenu ndoyenda kuna wakandituma; koga akuna umwe wenyu unondibhuzwa kuti, ‘Unoyenda poni?’ 6 Koga nentha yekuti ndaleba zwinhu izwezwi kumuli, buyendasi gwahhala mumimoyo yenyu. 7 Kusineni ndomubudza lebeswa; kwakamunakila kuti ndiyende, ngobe ndikasayenda, Ntjidzi atowhohha; koga hapa ndikayenda, ndowhowuntuma kumuli. 8 Akahha, unowhozibisa banhu behango nekwejinyo nendulamo netongewa, 9 nekwejinyo, ngobe abatondigalamoyo; 10 nekwendulamo, ngobe ndoyenda kunaTate, imwi amutjowhondibona; 11 nekwetongewa, ngobe ntungamili wehango iyeyi wakatongewa."

12 "Nditjina zwinhu zwinjinji zwandinohaka leba kumuli, koga zwingamulemela kwangwenuwali. 13 Hapa Meya yelebeswa yatjihha, inowhomutungamilila mumalebeswa ose; ngobe ayitowholebeleka ngemasimba ayo, koga tjayinowha nditjo tjayinowholeba, kakale inowhomubudza zwinhu zwinohha. 14 Inowhondikudza, ngobe inowhotola kunobe kuli kwangu ikakuleba kumuli. 15 Kose Tate kwabanako ndekwangu; ndizo ndakati Meya inowhotola kunobe kuli kwangu ikakuleba kumuli."

16 "Kwelubakanyana amutjowhondibona, koga hule kwelubakanyana gunotobela mowhondibona."

17 Bamwe bebadiyiwa babe bakabhuzwana beti, "Ini ikoku kwaanoleba kutili eti, ‘Kwelubakanyana, amutowhondibona, koga hule kwelubakanyana, mowhondibona,’ nekuti, ‘ngobe ndoyenda kuna Tate’?" 18 Bakati, "Unobvani hapa eti ‘kwelubakanyana’? Atitoziba kuti unobvani."

19 Yesu wakaziba kuti banohaka wumbhuzwa; ndizo wakati kubali, "Mozwibhuzwa, kuti ndobvani hapa nditi, ‘Kwelubakanyana, amutowhondibona, koga hule kwelubakanyana, mowhondibona’? 20 Ndolebesa, ndolebesa, ndoti kumuli, mowholila mukakuwa, koga hango inowhohanha; mowhobe nebuyendasi, koga buyendasi gwenyu gowhohanduka gukabe hanha. 21 Hapa nkadzimayi ali mukugwadziwa nemimba unobe nebuyendasi, nekuti lubaka gugwe gobe gwaswika; koga hapa atjitshibama, haatjakumbula gwadziwa, nentha yehanhila kuti mwana wazwagwa muhango. 22 Ndizo muna buyendasi sangwenu, koga ndowhomubona kakale mowhohanha mumimoyo yenyu, kakale akuna unowhomutolela hanha kwenyu."

23 "Muhhuba ilelo akuna tjamunowhondikumbila. Ndolebesa, ndolebesa, ndoti kumuli, hapa mukumbila kene ini kuna Tate, banowhomupa itjo muzina langu. 24 Kudza kuwhoswika nasi amanhu makumbila tjimwe muzina langu; kumbilani, mowhopiwa, kuyetila kuti hanha kwenyu kuhhadzisike."

25 "Kose ikoku ndamubudza iko nezwifananidzo; lubaka gowhohha pandisingowholebeleka namwi nezwifananidzo koga ndowhomubudza nekwaTate bangu patjena. 26 Muhhuba ilelo mowhokumbila muzina langu; kakale anditobva kuti ndowhomutembezelela kuna Tate, 27 ngobe Tate tjekwabo banomuda, ngobe mondida kakale mogalamoyo kuti ndakabva kuna Ndzimu. 28 Ndakabva kuna Tate ndikahha muhango; kakale, ndeesiya hango ndikayenda kuna Tate."

29 Badiyiwa babe bakati, "Ehhee, ngwenu moyelebeleka patjena, kusi ngezwifananidzo! 30 Ngwenu teeziba kuti moziba zwinhu zose, kakale amuzofanila bhuzwiwa nenhu; nentha yayikoku togalamoyo kuti makabva kuNdzimu."

31 Yesu wakabahandula eti, "Moyegalamoyo ngwenu? 32 Lubaka gowhohha, nayiko gwatjiswika, pamunowhopaladziwa, umwe newumwe akayenda kanyi kukwe, mukandisiya ndoga; koga ndisindoga, ngobe Tate banami. 33 Ndaleba ikoku kumuli, kuti muwane kunyalala mundili. Muhango mowhoba nekudziyidzika; koga hanhani; ndakunda hango."