1 Koga Yesu wakayenda kuDombo leMitoba. 2 Mangwanana ngwanana wakahha kakale kuthempeli, banhu bose bakahha kuwunli, akagala pasi akabadiya. 3 Bakwali nebaFarisi bakangina behhisa nkadzimayi waka abhakhwa ethama bupombgwe, bakawumisa mbeli kwabo bose. 4 Bakati kuwunli, "Ndhiyi, nkadzimayi iwhoyu wabhakhwa elipakati kwethama bupombgwe. 5 Sangwenu munlayo Mozisi wakatilaya kuti tikhikitidze banhu bakajali ngemabgwe. Motini nekukwe?" 6 Bakaleba bejalo kuti bawunlike, kuti bawane nlandu wabangawuntilika. Koga Yesu wakahunama akakwala mumavu nelunyala gugwe. 7 Pabakayendilambeli bewumbhuzwa, wakahunamuka akati kubali, "Usina jinyo pakati kwenyu ngaabe iye unotanga unowumposa nebgwe." 8 Akapamha akahunama ekwala mumavu ngelunyala. 9 Koga bakati bekuwha ikoku, umwe newumwe akabva ipapo akayenda, kutanga newhola pabamwe, Yesu akasala aliyega nenkadzimayi ali mbeli kukwe. 10 Yesu wakamilidza meho akati kuwunli, "Nkadzimayi, baponi? Utjiyapo wakuwana nlandu?"

11 Wakati, "Akuna He."

Yesu wakati, "Nami bo anditokuwana nlandu, yenda, usitjapamhe ukatjinya."

12 Yesu wakalebeleka nabo kakale eti, "Imi nditjedza tjehango, unonditobela haatowhoyenda muhhalima, koga unowhobe netjedza tjebutjilo."

13 BaFarisi bakakotjiti kuwunli, "Unozwiyetila busupi, busupi gugo aguta gwelebeswa."

14 Yesu wakahandula eti, "Nekutobe ndizwiyetila busupi nekwangu, busupi gwangu ndegwelebeswa, ngobe ndoziba kwandakabva nekwandinoyenda, koga imwi amutoziba kwandakabva kene kwandinoyenda. 15 Tonga kwenyu ndekwenyama, koga imi anditotonga nhu. 16 Ngono nekene nditonga, tonga kwangu ndekwelebeswa, ngobe akuta imi ndoga ndinotonga, koga ndimi naTate bakandituma. 17 Munlayo wenyu kwakakwagwa kuti busupi gwebanhu babili gulebeswa, 18 ndopa busupi nekwangu, naTate bakandituma banopa busupi nekwangu."

19 Bakakotjiti kuwunli, "Tate babo baponi?"

Yesu wakahandula eti, "Amutondiziba naTate bangu amutobaziba, hapa mamundiziba, mamowhoziba Tate bangu bo."

20 Matama iyawa wakaaleba ediya muthempeli, alipedlo nepanobigwa zwipo, koga akuna wakawunsunga, ngobe lubaka gugwe gwakagusanhu gwaswika.

21 Wakapamha akati kubali, "Ndoyenda, mowhondihaka mukafila mujinyo lenyu, kwandinoyenda, amungahhe ko."

22 Batungamili bemaJuta bakati, "Unowhozwibulaya, saku eti, ‘Kwandinoyenda, amungahhe ko.’ "

23 Wakati kubali, "Imwi mobva pasi, imi ndobva pehhugwi, imwi mubehango iyeyi, imi andite wehango ino. 24 Ndamubudza kuti mowhofila mumatjinyo enyu, ngobe mowhofila mumatjinyo enyu kuhhe kwekuti mugalemoyo kuti imi ndimi iye."

25 Bakati kuwunli, "Ndiwe yani?"

Yesu wakabahandula eti, "Ikoku kwandakamubudza kubvisila kutanga. 26 Ndina kunjinji kwandinohaka leba nekwenyu, nekunjinji kwandingatonga nekwenyu, koga iye wakandituma ulebeswa, kakale ndowhobudza hango kwandakawha kubva kuna iye."

27 Abazowhisisa kuti wakabe elebeleka nabo nekwaTate. 28 Ndizo Yesu wakati, "Hapa mamilidzila pehhugwi Nkololo weNhu, ndiko kwamunowhoziba kuti ‘ndi Iye’; kakale akuna tjandinoyeta nemasimba angu koga ndolebeleka sekwandakadiyiwa naTate bangu. 29 Newakandituma unami, haazondisiya ndoga, ngobe ndogala ndiyeta tjinowun'hanhisa."

30 Bunji gwebakawuwha elebeleka matama iyawa bakagalamoyo muwunli.

31 Yesu wakakotjiti kumaJuta akabe agalamoyo muwunli, "Mukayendilambeli mulimudama langu, mubadiyiwa bangu kwemalebeswa, 32 kakale mowhoziba lebeswa, kakale lebeswa lowhomuthama kuti mube bakasununguka."

33 Bakawun'handula beti, "Tibana baAbhurahhamu, kakale atanhu tikabebalanda kene bayani zwe. Ngono unoleba tjini uti, ‘Mowhosunungugwa?’ "

34 Yesu wakabahandula eti, "Ndolebesa, ndolebesa, ndoti kumuli, nhu wose unoyeta jinyo unlanda wejinyo. 35 Nlanda haana bugalo tjoselele mun'umba tjatjose, koga nkololo unogala tjatjose. 36 Ndizo Nkololo akamusunungula, moba masunungugwa dumbu. 37 Ndoziba kuti mutjizekugwana tjaAbhurahhamu, koga mohaka ndibulaya, ngobe matama angu ahaya bugalo mumuli. 38 Imi ndoleba tjandakabona muna Tate bangu, imwi mothama tjamakawha natate benyu."

39 Bakawun'handula beti, "Abhurahhamu nditate bedu."

Yesu wakati kubali, "Hapa mamuli bana baAbhurahhamu, mamowhothama tjakayetiwa naAbhurahhamu, 40 koga sangwenu mohaka ndibulaya, imi nlume wakamubudza lebeswa landakawha neNdzimu, ikoku ateyiko kwakayetiwa naAbhurahhamu. 41 Mothama tjakayetiwa natate benyu."

Bakati kuwunli, "Atizozwagwa ngepinga, tina Tate ban'ompela, iye Ndzimu."

42 Yesu wakati kubali, "Hapa Ndzimu babeli Tate benyu, mamowhondida, ngobe ndakahha ndibva kuNdzimu, andizozwihhila, koga bakandituma. 43 Ngentha yeni musingawhisise tjandinoleba? Kungentha yekuti amutotubula wha dama langu. 44 Mubana batate benyu, Satane, kuda kwenyu whuyeta zwinoyemugwa natate benyu. Waka alimbulayi kubvisila kwekutangisa, kakale haana tjimwe nekwelebeswa, ngobe muwunli akuna lebeswa. Hapa enyepa, unoleba kunoyendilana nembumbiko iye, ngobe unyepi kakale nditate bemanyepwa. 45 Koga, ngentha yekuti ndoleba lebeswa, amutondigalamoyo. 46 Ndiyani wenyu unganditi ndina jinyo? Hapa ndileba malebeswa, kungentha yeni musingandigalemoyo? 47 Iye unobva kuNdzimu, unowha matama eNdzimu, tjinoyeta kuti musi awhe whuti amuta beNdzimu."

48 Batungamili bemaJuta bakawun'handula beti, "Atitolebesa hapa titi uNsamariya kakale unameyambi?"

49 Yesu wakahandula eti, "Andina meyambi, koga ndolemekedza Tate bangu, imwi amutondilemekedza. 50 Imi anditozwihakila gudzo, uyapo unolihaka kakale ndiye unowhoba ntongi. 51 Ndolebesa, ndolebesa ndoti kumuli, hapa alipo unotjengeta dama langu, haatowhobona lufu kene nalini."

52 Batungamili bemaJuta bakati kuwunli, "Ngwenu teeziba kuti unameyambi. Abhurahhamu wakafa, nebalebesambeli bo, iwe unoti, ‘Hapa kuna unotjengeta dama langu, haatowhobona lufu kene nalini.’ 53 Unkulu pana tate bedu Abhurahhamu, ibo bakafa? Nebalebesambeli bakafa! Iwe unozwithama yani?"

54 Yesu wakahandula eti, "Hapa ndizwikudza, gudzo langu alitetjimwe; ndiTate bangu banondikudza, ibo bamunoti ndiNdzimu wenyu. 55 Koga amutobaziba, imi ndobaziba. Hapa ndingati, anditobaziba, ndowhoba nyepi samwi, koga ndobaziba kakale ndotjengeta dama labo. 56 Tate benyu Abhurahhamu bakahanha kuti banowhobona hhuba langu; bakalibona bakahanha."

57 Batungamili bemaJuta bakakoti kuwunli, "Awunhu ukaba nemakole makumi mahanu, ngono Abhurahhamu wakawumbona poni?"

58 Yesu wakahandula eti, "Ndolebesa, ndolebesa, ndoti kumuli, Abhurahhamu asanhu akabepo, ndi Iye."

59 Ndizo bakanunga mabgwe kuti bawumphobole nawo, koga Yesu wakabgwata, akabhuda muthempeli.