1 Kwakayetikala kuti mulubaka Apholosi ali muKhorinte, Phawuli wakapalama mukati kwentunhu upehhugwi enojitila muEfesu, akahangana nebamwe badiyiwa. 2 Eba eti kubali, "Maka amutjila Meya Yakayengemala pamaka galamoyo?"

Bakahandula beti, "Aa, atizotongogala tawha kuti kuna Meya Yakayengemala."

3 Eba eti kubali, "Ngono makabvubikiwa kwakatini?"

Bakahandula beti, "Bvubika kwaJohane."

4 Phawuli eba eti, "Johane waka ebvubika mbvubiko wehanduka, ebudza banhu kuti bagalemoyo muna iye unowhohha hule kukwe, kuli iye, Yesu."

5 Bakati bakuwha ikoku bakabvubikiwa muzina laHe Yesu. 6 Phawuli akati ababiga maboko, Meya Yakayengemala ikajitila pehhugwi kwabo; bakatangisa lebeleka nendimi kakale baka lebesambeli. 7 Bose baka bangaswika gumi nebabili.

8 Waka engina musinagogu elebeleka asingahle, kwemimwedzi mitatu, ekakabadzana nabo kakale ebakumbilisisa kuti bawamutjile zwaanoleba nekwebumambo gweNdzimu. 9 Koga kwakati bamwe bewomesa mimoyo kakale besingagalemoyo, beleba zwakayipa nekweZila iyeyo mbeli kwegubungano, wakabva pabali, akatola badiyiwa, akanozuwisana nabo mahhuba ose bali mukwele tjaThiranuse. 10 Ikoku kwakayendilambeli kuyetikala kwemakole mabili, kwekuti bose bagali bemuAsiya bakawha dama laHe, bose maJuta nemaGiriki.

11 Ndzimu wakayeta matjenamiso makulu ngemaboko aPhawuli, 12 kwekuti baka betola dzihangatjefu kene dzikhiba pambili uwe dziyendisiwa kubagwele, nghwele dzikabasiya nemeyambi dzikabhuda mubali. 13 Kukakoti amwe maJuta aka epoteleka, edusa meyambi mubanhu, akayedza hingisa zina laHe Yesu pehhugwi kwayibabo bana meyambi, eti, "Ndokutata ngezina laYesu unosumikigwa naPhawuli." 14 Bakololo bali kutondeka bemphirisiti nkulu unoyi Sikeva, waka ali Njhuta, baka bekuthama ikoku.

15 Koga meyambi yakabahandula iti, "Yesu ndowunziba, Phawuli ndowunziba; koga imwi ndimwi boyani?"

16 Nlume waka ana meyambi wakabatjulukila, akabakulila, akabakunda bose, bakabhuda mun'umba betihha bali mbudlo kakale bakubala. 17 Ikoku kwakazibgwa nebagali bose bemuEfesu, maJuta nemaGiriki; bakawigwa neluhlo bose; zina laHe Yesu likakudziwa. 18 Nebagalimoyo bakabuya nebunji, bebvuma kakale belebulula zwiyeto zwabo. 19 Nebanoyeta masalamusi bakalesi nebunji whalo dzabakabehingisa panhu pan'ompela, bakadzipisa mbeli kwebanhu bose; bakabala ntengo wadzo bakawana ulizwiwulu zwili makumi mahanu zwemaloso esiliva. 20 Ndizo dama laHe lakakula ngemasimba likaandama.

21 Kwatjipinda ikoku, Phawuli wakazwipila mumeya, kuti apinde muMakhedoniya nemuAkhayiya, eyenda kuJerusalema, eti, "Hapa ndaswika ko, ndakafanila kuti ndiswike kose nekuRoma." 22 Akati atjituma babili baka bewumbhatsha banoyi Thimothi naErasitasi kuti bayende kuMakhedoniya, iye akagala muAsiya kwelubakanyana.

23 Mulubaka igogo kwakamuka bhonyongo lisihoma ngekweZila yaHe. 24 Ngobe umwe nlume waka eyi Dimethiriyasi, ali mpfuli wesiliva, waka ethama zwitshwantshwa zwesiliva zwethempeli laAthemisi, elipa ntengo upehhugwi kubabehhi. 25 Wakabakubunganya babehhi, kose nebamwe banamihingo inonga yabo, akati kubali, "Botate, moziba kuti fumwa yedu inobva mun'hingo iwhoyu. 26 Mobona, kakale mowha, kuti kusi muno muEfesu koga, koga nemuAsiya yose, Phawuli iwhoyu unotetedza banhu ebadiyila ntome nebunji, eti, midzimu inoyetiwa ngemaboko hayite midzimu. 27 Kuna mboli isi yekuti n'hingo wedu iwhoyu ube nezina lakayipa koga; koga nethempeli yendzimukadzi Athemisi inowholengudziwa, nekuti ungalahikigwa nebukulu gwawo, iye unonamatiwa muAsiya yose nemuhango yose."

28 Bakati bekuwha ikoku, bakahhala buhongola, bakamimila beti, "Unkulukulu Athemisi weBaEfesu!" 29 Banhu munzi-nkulu baka hangana miholo; bakalabuka panhu pan'ompela benongina munhanga, behhuhhuta Gayiyasi naArisitakhasi, balume bekuMakhedoniya, banoba bali ibo baka beyenda njendo naPhawuli. 30 Phawuli akati ehaka nongina mumbunga, badiyiwa bakawundzibisa; 31 nebamwe bo baka bali babhati bakulu bemuAsiya baka beli bakwinya babe, bakawuntumila dama bewuntetedza kuti asitongoyedza ikongina munhanga. 32 Kwakayetikala kuti bamwe baka bemimila yetji, bamwe bemimila yetjiya; kana gubungano laka lakadzongeka; bunji gwebanhu baka basingazibe kuti bakubunganilani. 33 Bamwe mugubungano bakasunda Alekizanda kuti ayende mbeli, saku kuli iye waka ahagwa nemaJuta kuti ayende mbeli. Alekizandha akaba emilidza luboko, kudze banhu banyalale, eyedza kuti alebeleke. 34 Koga bakati bebona kuti uNjhuta, bakatola lubaka gungaba ma awa mabili, bemimila panhu pan'ompela, beti, "Unkulukulu Athemisi weBaEfesu!"

35 Nkwalili wenzi-nkulu wakati atubula dzikamisa mbunga, akati, "Imwi banhu beEfesu, unhu wakatini usingazibe kuti nzi-nkulu weEfesu ndiwo nlondolodzi wethempeli laAthemisi nkulukulu, nebgwe lakayengemala lakawa libva kudzimu? 36 Saku mubona ke kuti zwinhu izwezwi azwingalandugwe, makafanila dzikama, musithame tjinhu mupaparika. 37 Mahhisa balume ibaba ipapa nekene basi mbava mumathempeli kene banotuka ndzimukadzi wedu. 38 Hapa kuli kuti Dimethiriyasi nebabehhi baanabo bana ndebo yabanayo nekwewumwe nhu, mbahhe dzemilandu dzakahhuka, kuna batongi bemilandu; ngabayende banotilikana milandu. 39 Koga hapa kuna tjimwe kakale tjamunohaka, tjowholulamisiwa mun'hangano umunlayo. 40 Ngobe kuna mboli yekuti tingawanikwa tina nlandu nekwebhonyongo layetikala nasi, iko kusina tjatingati nditjo tjayeta kuti kujalo." 41 Wakati aleba matama iyawa, akapaladza gubungano.