Kulawa 2

Kwelekigwa kwa Musa

1 Siku izo munhu yolawa kabila da Lawi kasola muke wa kabila jake mwenyewo, 2 nayo kapata wimo na kaibasula mwana wa chilume. Viyamuwone kakala mwana yanogile ng’hani‚ kamfisa kwa miyezi mitatu. 3 Mbali viyapotwile kumfisa kampatila chigelo cha mayani na kachibulugiza tulasi‚ kamwika mgati yake na kuchika hana yamayani yokota muna ulwanda lwa Naili. 4 Lumbu jake imwana kema hatali hainzila muladi yadahe kulola chiya chondachimulawilile.

5 Mwana wa chike wa mfalume wa Misili kahumuluka kuulwanda yoge‚ wasang’hani wake wakala wogenda genda mumgwazo ya ulwanda. Viyawone ichigelo muna yamakengega‚ kamtuma msang’hani wa chike yachisole. 6 Kachivugula na kawona mwana wa chilume. Kakala kolila, ivo kamuwonela ubazi na kalonga, "Ino imwe wa wana wa Chiebulaniya."

7 Maabaho lumbu wa imwana kamuuza mndele wa mfalume wa Misili‚ "Nihite nikamtange muke wa kumong’heza imwana mwa wanaake wa Chiebulaniya?" 8 Mndele wa mfalume wa Misili kamwidika, "Wona." Ivo imndele kahita na kamgala mami yake imwana. 9 Mndele wa mfalume wa Misili kamulongela mwanamke ija, "Msole imwana ino unyong’hezele, nizakuliha." Ivo mwanamke ija kamsola imwana kamong’heza. 10 Hamwande mwana viyakulile kamgala kwa mndele wa mfalume wa Misili‚ nayo kamtenda kuwa mwanage. Mndele wa mfalume kalonga, "Nimulava muna yamazi." Ivo kamtanga zina jake Musa.