1 Kukala na munhu yatangigwe Boazi yolawa muna ulukolo lumwe na Elimeleki mulumake Naomi. Iyo kakala tajili na kamanyika ng'hani. 2 Siku dimwe Lusu Mmoabu kamulongela Naomi, "Nitogolele nihite kumgunda nikasalale. Nodaha kumpata munhu yondayanitogolele kusalala kuchisogo chake." Naomi kamulongela, "Haya, hita mndele wangu." 3 Ivo Lusu kahita kumgunda, kawasondelela waja wagobolaji kuchisogo muladi yakasalale, mbali havimanyile kuwa mgunda uja wa Boazi, ija wa lukolo lumwe na Elimeleki.

4 Maabaho Boazi kafika kulawa Beselehemu na kawalamsa wagobolaji, "Mndewa Mulungu yawe na mweye!"

Wawo wamwidika, "Mndewa Mulungu yakutemele mate!" 5 Boazi kamuuza mwimilizi wa wagobolaji, "Mwali ino wa yelihi?" 6 Nayo kamwidika, "Ino ni Mmoabu yabwelile na Naomi kulawa muna iisi ya Moabu. 7 Kanipula nimulekele yawasondelele wagobolaji kuchisogo muladi yakasalale hagati ya miganda. Kasang'hana usang'hano kwandusila imitondo, sambi kahita kuhumula kuna ichizewe."

8 Ivo Boazi kamulongela Lusu, "Mwali wangu tegeleza, sekeuhite kusalala hanhu hamwenga ila muna umgunda uno muhala. Isondelele na wasang'hani wangu wa chike. 9 Lola hanhu howogobola usalale kuchisogo yawo. Niwazuma wabwanga wano sekewakugaze. Uhawona ng'hilu hita ukang'we mazi kuna ing'hupulilo yowatekile wasang'hani wano."

10 Lusu kamtumbalila mavindi Boazi mbaka chihanga chake chidalisa hasi, kamulongela, "Nipataze kutogoleligwa na weye? Habali koniwonela ubazi niye nili nyambenyambe?"

11 Boazi kamwidika, "Nihulika mbuli zose ziumtendele mkoi wako kwandusila mulumako viyadanganike. Nivimanya viya viuwalekile tati yako na mami yako, kuileka isi yako yowelekigwe na kwiza kukala kwa wanhu hawakumanyile. 12 Mndewa Mulungu yakulihe kwa chila chinhu chiutendile. Mndewa Mulungu, Mulungu wa Isilaili youmkimbilile muladi yakukalize fana viya kolo da nguku vidikaliza wanage."

13 Lusu kamwidika, "Mwenevale wangu, kunitendela mbuli zinogile ng'hani, ingawa niye sili imwe wa wasang'hani wako. Kuniguma moyo na kulonga na niye kwa uhole."

14 Lusita lwa ndiya, Boazi kamgoneka Lusu kamulongela, "Izo hano uje gate na udizanhike muna umsuzi." Ivo Lusu kakala hamwe na wagobolaji, Boazi kamwing'ha mhule zikanzingigwe. Kaja mbaka keguta na kasigaza. 15 Lusu viyagendelele kusalala, Boazi kawalagiliza wasang'hani wake, "Mulekeni yasalale mbaka hana imiganda, sekemumkalikile. 16 Somoleni makungwi kulawa muna imiganda na muyaleke muladi yadondole na sekemumkalikile."

17 Ivo Lusu kakala yosalala muna umgunda mbaka ichigulogulo. Viyahulule shayili kapata debe dimwe na chidogo. 18 Kaitwika kahita kuna dibululu, kamulagusila mkoi wake shayili iyasalale. Iviya kalava ndiya iyasigaze viyegute, kamwing'ha. 19 Mkoi wake kamuuza, "Kusalala kulihi ino yose? Kukala kuna umgunda wa yelihi? Mulungu yamtemele mate munhu yakutazile!"

Maabaho Lusu kamulongela mkoi wake kuwa kakala muna umgunda wa munhu yatangigwe Boazi. 20 Naomi kamulongela Lusu, "Mndewa Mulungu yamtemele mate Boazi! Mulungu kofikiza chilagano chake kwa wagima na wadanganike. Munhu iyo ndugu yetu wa habehi, ndolezi muna ulukolo lwetu."

21 Maabaho Lusu Mmoabu kalonga, "Iviya kanilongela, ‘Usigale hano na wasang'hani wangu mbaka vondawakomeleze kugobola.’ "

22 Naomi kamulongela Lusu, "Mndele wangu, vinoga kusang'hana usang'hano na wanaake wamwenga muna umgunda wa Boazi, kwaviya one uhitile kuna umgunda wa munhu imwenga yodahika wahakugazile."

23 Ivo Lusu kasang'hana usang'hano hamwe na wasang'hani wa chike wa Boazi. Kasalala mbaka viwakomeleze kugobola ngano na shayili. Kakala yokala na mkoi wake.