1 Siku dimwe Naomi kamulongela Lusu, "Mndele wangu vinoga nikuzahilile mulume muladi ukale goya. 2 Vino, ino Boazi yousang'hane hamwe na wasang'hani wake wa chike, siyo wa lukolo lwetu? Lelo tegeleza, ichigulogulo kezakuwa kobeta shayili hanhu ha kuhululila. 3 Ivo oge na uibobode mavuta yonung'ha goya na uyawale vinogile, maabaho uhite hanhu hoyohululila, mbali uiteganye sekeumanyike kumwake mbaka vondayakomeleze kuja na kung'wa. 4 Iviya uhamanye hanhu hondayagone, yahakukila, muhitile ugaluga umgubule vizegeyu vake na utambalale hajahaja. Kezakulongela cha kutenda."

5 Lusu kedika, "Nizatenda chochose choulonga." 6 Ivo Lusu kahita hanhu ha kuhululila na katenda chila chinhu chiyalongeligwe na mkoi wake.

7 Boazi viyakomeleze kuja na kung'wa, kadeng'helela muna umoyo wake. Ivo kahita kuinzingo ya dibugulu da shayili kugona. Lusu kahita ugaluga, kamgubula vizegeyu vake na kagona.

8 Ichilo chikulu, Boazi kagumhuka, kahinduka na kamuwona mwanamke kagona muna yamagulu yake.

9 Kamuuza, "Weye iyo yelihi?"

Lusu kamwidika, "Niye Lusu msang'hani wako. Kwaviya weye ndolezi wangu, unigubike na mhindo ya walo jako fana chilaguso cha ukalizi wako, niye msang'hani wako." 10 Boazi kalonga, "Mndewa Mulungu yakutemele mate mwali wangu, yaja youtenda sambi yanoga kufosa yaja youtendile ichanduso, kwaviya humzahile mbwanga imwenga yawe ngayengaye hebu yawe tajili. 11 Lelo mwali wangu sekeudumbe, nizakutendela chila chinhu chiupulile, kwaviya wanhu wose muna dibululu wavimanya kuwa weye mwanamke yanogile. 12 Kweli niye ndolezi, mbali kuna ndolezi yeli habehi ng'hani kufosa niye. 13 Kala hano ichilo chino, igolo imitondo chizawona fana kezatogola kukulola goya hebu kukulema. One yahakulola goya, vinoga. Yahalema, kwa zina da Mndewa Mulungu yeli mgima, nizakulola goya. Gona hano mbaka imitondo." 14 Ivo Lusu kagona muna yamagulu ya Boazi mbaka imitondo, mbali kalamka chilochilo muladi sekeyawoneke, kwaviya Boazi halondile munhu yavimanye kuwa mwanamke kakala hanhu ha kuhululila.

15 Maabaho Boazi kalonga, "Ning'he walo jako diuyawale uditandike hasi." Lusu katenda ivo, nayo kamwikila debe da shayili na kamtwika. Maabaho kabwela kuna dibululu. 16 Lusu viyafikile, Naomi kamuuza, "Iwaze mndele wangu?" Lusu kamulongela chila chinhu chiyamtendele Boazi. 17 Maabaho kagendelela kulonga, "Kaning'ha debe da shayili, kalonga, ‘Sekeubwele kwa mkoi wako makono muhala.’ "

18 Naomi kalonga, "Mkoi wangu, gozela mbaka uwone chondachilawilile, kwaviya Boazi hezahumula mbaka mbuli zikale goya diyelo."