1 Baho umwaka, wasemi viwakalile wotawala muna iisi ya Isilaili, kulawilila nzala ng'hulu. Munhu kulawa Beselehemu muna iisi ya Yuda, hamwe na muke wake na wanage waidi wa chilume wahita kukala fana nyambenyambe muna iisi ya Moabu. 2 Munhu iyo katangigwa Elimeleki na muke wake katangigwa Naomi. Wana wawo waidi wa chilume, imwe katangigwa Mahiloni na imwenga Kilioni. Wawo wakala Waefulasi kulawa Beselehemu muna iisi ya Yuda. Wahita muna iisi ya Moabu na wakala uko. 3 Maabaho Elimeleki mulumake Naomi kadanganika. Naomi kalekiligwa wana waidi wa chilume. 4 Wabwanga wawo wasola wandele wa Chimoabu, imwe katangigwa Olipa na imwenga Lusu. Viifosile miyaka longo, 5 wose waidi, Mahiloni na Kilioni nawo wadanganika. Ivo Naomi kadanganikilwa na wanage wa chilume na mulumake.

6 Ivo Naomi viyahulike kuwa Mndewa Mulungu kawatemela mate wanhu wake kwa kuweng'ha ndiya, kalamula kusegela Moabu kubwela kumwake hamwe na wakoi zake. 7 Yeye hamwe na wakoi zake wasegela haja hawakalile , wamhisa nzila kubwela kuna iisi ya Yuda. 8 Naomi kawalongela waja wakoi zake waidi, "Chila imwe yabwele ukaye kwa mami yake. Mndewa Mulungu yamulaguseni ulondo wake fana vimulaguse kumwangu na kwa wanangu waja wadanganike. 9 Mndewa Mulungu yamnogeleni chila imwe wenu yakale goya ukaye kwa mulume imwenga." Maabaho Naomi kawalaga kwa kuwanonela, mbali wawo walila ng'hani. 10 Wamulongela, "Mawe! Chizahita hamwe na weye kwa wanhu wako."

11 Mbali Naomi kalonga, "Bweleni ukaye wakoi zangu. Habali munisondelele? Vino mweye mogesa nodaha kweleka wana wamwenga wa chilume wamsoleni? 12 Bweleni ukaye wakoi zangu, kwaviya niye mulala sidaha kupata mulume. Hata one nilongile ninajo huwilo, hata one nipatile mulume ichilo cha diyelo na kupata wana, 13 vino muhadahile kugozela mbaka wakule? Vino muhadahile kuikimilila sekemusoligwe na walume wamwenga? Siivo wandele zangu! Mbuli iyo ndala kumwangu kufosa mweye, mana Mndewa Mulungu kaniheleleza."

14 Baho walila kwa giyogiyo kaidi. Maabaho Olipa kamulaga mkoi wake kwa kumnonela, mbali Lusu kamnanahila. 15 Naomi kalonga, "Lusu, lola mzengele miyago kabwela kwa wanhu wake na kwa milungu yake, lelo na weye bwela umsondelele mzengele miyago."

16 Lusu kamwidika,

"Sekeunilambe nikuleke,

hebu sekeunigome kukusondelela.

Kokose kondauhite niuko kondanihite,

na hondaukale baho hondanikale,

wanhu wako wezakuwa wanhu wangu,

Mulungu wako kezakuwa Mulungu wangu.

17 Hondaudanganikile na niye nizadananikila baho,

hondauwandigwe na niye nizawandigwa baho,

one nihakuleka weye, ila kwa ifa muhala, Mndewa Mulungu yanitaguse ng'hani."

18 Naomi viyawonile kuwa Lusu kalamula kumsondelela, kaleka kulonga nayo. 19 Ivo wose waidi wagendelela na umwanza mbaka Beselehemu. Viwafikile uko, wanhu wose wazanywa, mbaka wanaake waiuza, "Ino Naomi?" 20 Naomi kawalongela, "Sekemunitange Naomi, nitangeni Mala*, kwaviya Mndewa Mulungu katenda nikale kwa usungu ng'hani. 21 Nisegela hano kuno nimemezigwa, mbali sambi Mndewa Mulungu kanibweleza makono muhala. Habali monitanga Naomi na Mndewa Mulungu kaniheleleza, Mndewa Mulungu yeli na udahi kanitenda nikale kwa usungu?"

22 Ivo niivo Naomi viyabwelile kulawa kuna iisi ya Moabu hamwe na Lusu Mmoabu yeli mkoi wake. Wafika Beselehemu chipindi cha kugobola shayili chokwandusa.