1 Waisilaili wailaha uko Misipa, walonga, "Habule munhu yoyose kumwetu yondayamfungile zengele mwanage kwa wanhu wa kabila da Benyamini." 2 Wanhu weza Beseli na wakala haulongozi ha Mulungu mbaka ichigulogulo. Walandula madizi yawo na wamulilila ng'hani. 3 Walonga, "Weye Mndewa Mulungu, Mulungu wa Isilaili, habali mbuli ino ilawilila mbaka chihungukilwe na kabila muna iisi ya Isilaili?"

4 Igolo yake imitondo ng'hani wanhu wazenga lupango uko na walava nhambiko za kutimbula na nhambiko za kugala tindiwalo. 5 Maabaho Waisilaili wauza, "Yelihi mwa Waisilaili hawile uko kuna umting'hano woutendeke haulongozi ha Mndewa Mulungu?" Kwaviya wakala wailaha kuwa munhu yondayaswele kuwa uko Misipa haulongozi ha Mndewa Mulungu kolondeka yakomigwe. 6 Waisilaili wawawonela ubazi ndugu zawo wa kabila da Benyamini, walonga, "Diyelo kabila dimwe da Isilaili dinangigwa. 7 Lelo chizatendaze muladi kuwapatila wanaake walume wa kabila da Benyamini wowasigale? Kwaviya chiilaha kwa zina da Mndewa Mulungu kuwa hachizaweng'ha wanetu wawe wake zawo!"

8 Maabaho walonga, "Kabila dilihi muna yamakabila ya Isilaili hadifikile haulongozi wa Mndewa Mulungu uko Misipa?" Habule munhu yoyose kulawa Yabeshi ili Gileadi yakalile uko. 9 Waisilaili viwapetigwe uko Misipa habule mkaya yoyose wa Yabeshi ili Gileadi yoyakalile uko. 10 Ivo mting'hano wa Waisilaili wawatuma wanhu wawo 12,000 weli magalu ng'hani, wawalagiliza, "Hiteni mukawakome wakaya wa Yabeshi Gileadi, wanaake hamwe na wana. 11 Molondeka mutende vino, wakomeni walume wose na wanaake wose weli siyo mhambe." 12 Mwa wanhu wose wa Yabeshi Gileadi mhambe wakala 400 hawanaibanda na mulume, ivo wawasola na wawagala kuna dilago uko Shilo kuna iisi ya Kanaani.

13 Maabaho mting'hano wose watuma usenga wa tindiwalo kwa wanhu wa kabila da Benyamini wowakalile kuna uluwe lwa Limoni. 14 Siku izo wanhu wa kabila da Benyamini wabwela na weng'higwa wanaake wa Yabeshi Gileadi wowasigale. Mbali wanaake wawo hawenele walume wose.

15 Wanhu wawawonela ubazi wanhu wa kabila da Benyamini kwaviya Mndewa Mulungu katenda wanhu wa makabila ya Isilaili wahunguke. 16 Ivo walala wa mting'hano walonga, "Wanaake wose wa kabila da Benyamini wanangigwa, lelo chizatendaze kuwapatila wanaake walume wasigale?" 17 Walonga, "Walume wasigale wa kabila da Benyamini wolondeka weng'higwe wanaake muladi wagendese kabila, ivo sekejage kabila jojose mwa makabila ya Isilaili. 18 Mbali hachidaha kuwatogolela wawo wasole wandele wetu wawe wake zawo." Kwaviya Waisilaili wailaha, "Yaduwiligwe munhu yoyose yondayamfungile zengele mwanage kwa wanhu wa kabila da Benyamini." 19 Maabaho walonga, "Dugila da Mndewa Mulungu da chila mwaka uko Shilo ili ubanzi wa kasikazi wa Beseli, ubanzi wa ulawilo wa zuwa wa nzila ng'hulu yoihita kulawa Beseli kuhita Shekemu, ubanzi wa kusi wa Lebona." 20 Wawalagiliza wanhu wa kabila da Benyamini, walonga, "Hiteni mukaifise kuna imigunda ya mizabibu 21 na mulole. Wanaake wadododo wa Shilo wondaweze kuvina kuna didugila, laweni kunze ya migunda ya mizabibu. Chila imwe wenu yasole muke kwa shuluti na mubwele nawo kuna iisi ya Benyamini. 22 One tati zawo hebu lumbu zawo waheza kumwenu kumulongani, longeni, ‘Cholamba, lekeni chiwasole kwaviya hachiwasolile kulawa kumwenu kuna ing'hondo kuwa wake zetu. Kwaviya hamuching'hile hamwizatagusigwa bule.’ "

23 Wanhu wa kabila da Benyamini watenda vino, chila munhu kasagula muke mwa wanaake wakalile wovina uko Shilo na kusegela nayo. Maabaho wabwela kuna yamabululu yawo, wazenga kaidi mabululu yawo na wakala umo. 24 Lusita ulo ulo Waisilaili wasegela, chila munhu kabwela kuna dibululu na wanhu wake na kabila jake. Chila munhu kabwela hanhu hoyeng'higwe.

25 Siku izo Isilaili kukala kwabule mfalume, chila munhu katenda viyolonda.