1 Siku iyo Debola na Balaka mwana wa chilume wa Abinoamu wemba wila uno,

2 "Walangulizi wa Isilaili viwawalongoze wanhu kuhita kuna ing'hondo,

wanhu viwailavile wawo wenyewo kuna ing'hondo,

mtogozeni Mndewa Mulungu.

3 Tegelezeni mweye wafalume,

hulikeni mweye watawala,

nizamwimbila Mndewa Mulungu,

nizamtowela lukenze Mndewa Mulungu, Mulungu wa Isilaili.

4 "Weye Mndewa Mulungu, viulawile uko Seili kowakala Waedomu,

viuhitile kuna ing'hondo kulawa kuna iisi ya Edomu,

isi igudemeka,

ulanga ulagaza mazi,

ona, mawingu yatonya mvula.

5 Milima itingisika haulongozi hako Mndewa Mulungu, Mulungu wa Sinai,

haulongozi hako Mndewa Mulungu, Mulungu wa Isilaili.

6 "Muna zisiku za Shamgali mwana wa chilume wa Anasi,

muna ichipindi cha Yaeli,

wanhu waleka kufosa muna zinzila ng'hulu,

wafosela nzila za mumgwazo.

7 Walimi waleka kulima uko,

waleka kulima uko Isilaili,

mbaka vinilawilile niye Debola,

mama muna Isilaili.

8 Viwasagule milungu ya imwenga,

ng'hondo ingila muna ulwivi lukulu lwa bululu,

Mbali hapatike munhu yeli na panga hebu ngao,

hagati ya wanhu 40,000 wa Isilaili.

9 Moyo wangu wahamwe na walangulizi wa Isilaili,

wahamwe na wanhu wowailavile wenyewo.

Mtogozeni Mndewa Mulungu!

10 "Geseni mbuli ino, mweye wakwelavihongwe wazelu,

mweye womkala mchanyha ya vihongwe na malili yanogile ng'hani.

Geseni mweye womugenda muna inzila.

11 Tegelezeni wokwimba muna ivisima va mazi,

wogong'onda sang'hano zinogile za Mndewa Mulungu,

sang'hano zinogile za wanhu wa Mndewa Mulungu!

Maabaho wanhu wa Mndewa Mulungu wahita kuna ulwivi lukulu lwa bululu.

12 ‘Lamka, lamka, Debola!

Lamka, lamka wimbe wila!

Lamka Balaka mwana wa Abinoamu,

uwasole wanhu wasoligwe kuing'hondo.’

13 Maabaho watowang'hondo wasigale wagima wawahitila walangulizi,

waja wanhu wa Mndewa Mulungu wanizila niye Debola.

14 Kulawa Efulaimu wahulumuka kuna dikolongo,

wasondelela ndugu zawo wanhu wa Benyamini,

wahulumuka walangulizi kulawa Makili,

wahulumuka kulawa Zabuloni waja wokwamha fimbo za walangulizi.

15 Wakulu wa Isakali waisondelela na Debola,

wanhu wa Isakali wakala na Balaka,

wamsondelela kwa kukimbila mbaka kuna dikolongo.

Mbali ng'holo zimwenga muna zing'holo za Lubeni,

wakala wosinhasinha ng'hani muna umoyo.

16 Wanhu wa kabila da Lubeni, habali musigala muna ivikwama,

kutegeleza miluzi yoitowigwa kuwatanga wanyama?

Muna zing'holo za Lubeni wakala wosinhasinha kwiza.

17 Kabila da Gadi disigala kuumwambu wa lwanda lwa Yoludani,

na kabila da Dani, habali wasigala muna ingalawa?

Kabila da Asheli disigala uko mhwani ya bahali,

dikala kuna ibandali yake.

18 Mbali wanhu wa Zabuloni wauhonza ugima wawo,

wanhu wa Nafutali wauhonza ugima wawo kuna ing'hondo.

19 "Wafalume weza na waitowa,

wafalume wa Kanaani waitowa uko Taanaki habehi na nzasa za Megido,

hawasolile chinhu chochose kulawa kuing'hondo.

20 Nhondo ziitowa kwa ubanzi wa Mulungu,

kulawa kuulanga, ziitowa na Sisela.

21 Lwanda lwa Kishoni luwakulula,

gombo kulu da lwanda Kishoni.

Weye muhe wangu gendelela kuulongozi kwa nguvu!

22 Maabaho vihongwe weza kuwabojoga kwa sindo ng'hulu,

wabojoga isi kwa nguvu mizayo yawo.

23 Msenga wa Mndewa Mulungu kolonga,

‘Duwileni Melosi,

waduwileni kwa usungu wanhu wake,

kwaviya hawezile kumtaza Mndewa Mulungu, kwa kuitowa na wanhu weli na nguvu.’

24 "Yaeli yatemeligwe mate kufosa wanaake wose,

muke wa Hebeli Mkeni.

Kezatemeligwa mate kufosa wanaake wose,

wokala muna yamahema.

25 Kapula mazi, mbali kamwing'ha maziwa,

kamwing'ha maziwa muna dihamha da hishima.

26 Kagolosa mkono wake kumoso kamha chigingi cha hema,

mkono wake wa kulume kamha nyundo ya fundi,

kumduluga Sisela muna iditwi,

kamuhoma muna imhalagutwi.

27 Sisela kaidulika kagwa,

katambalala hupi muna yamagulu yake.

Haja hayaidulike kagwa na bahobaho kadanganika.

28 "Mami yake Sisela kalola kuna dizonzo,

kasungulila na kalila,

‘Habali tololi jake ukalama kufika?

Habali misindo ya mituka yake haihulikike?’

29 Wanaake wabala wamwidika na kailongela mwenyewo muumoyo,

30 ‘Vino hawapatile mateka na kuyagola,

mndele imwe hebu waidi kwa chila munhu?

Walo da langi kwa ichimu cha Sisela,

walo dinogile,

mawalo yanogile kwa ichimu changu cha kuiyawala.’

31 "Mndewa Mulungu, wehi wako wose wanangigwe!

Mbali mbwiya zako wawe fana zuwa,

vidilawa na nguvu yake."

Isi iwa na tindiwalo kwa miyaka malongo mane.