1 Maabaho wanhu wa Efulaimu wamulongela Gideoni, "Habali viuhitile kuna ing'hondo kuitowa na Wamidiani huchitangile? Habali kuchitendela vino?" Wamkalikila ng'hani. 2 Mbali Gideoni kawalongela, "Mbuli zonitenda hazifaya one zihalinganyizigwa na ziya zimutendile mweye. Chiwadondola wanhu wa Efulaimu viwamalile kugobola chinogile kufosa chiyagobole ndugu yangu Abiezeli. 3 Mulungu kaweka muna yamakono yenu walangulizi wa Midiani, Olebu na Zeebu. Niye nitenda choni nihalinganyizigwa na mweye?" Gideoni viyakomeleze kulonga yayo, ludoko lwawo luhunguka.

4 Siku izo Gideoni na wanhu wake magana matatu weza kuna ulwanda lwa Yoludani na waloka. Ingawa wakala walegela ng'hani, wagendelela kuwawinga wehi wawo. 5 Ivo kawalongela wanhu wa Sukosi, "Nolamba muweng'he magate wanhu wano wonizile nawo kwaviya walegela ng'hani. Niye nogendelela kuwawinga Zeba na Salimuna weli wafalume wa Midiani."

6 Mbali walangulizi wa Sukosi wamuuza, "Habali chimwing'heni magate ukati mung'hali hamunawahuma Zeba na Salimuna?" 7 Gideoni kawalongela, "Vinoga! Mndewa Mulungu vondayaweke Zeba na Salimuna muna yamakono yangu, nizazidega ng'huli zenu kwa miwa na mbigili za muna dibwilingu!" 8 Gideoni kahita uko Penueli na kawapula viyaviya. Wanhu wa uko Penueli wamwidika fana viwedike wanhu wa Sukosi. 9 Gideoni kawalongela, "Vondanibwele kwa tindiwalo nizabomola lingo dino!"

10 Zeba na Salimuna wakala uko Kalikoi na watowang'hondo fana 15,000 wowasigale kulawa kwa watowang'hondo wa ulawilo wa zuwa, kwaviya watowang'hondo 120,000 wadanganika. 11 Gideoni kasondelela nzila ya wanhu wokala muna yamahema ili ulawilo wa zuwa wa Noba na Yogibeha, kawatowa watowang'hondo wawo wakalile hawaisasale. 12 Wafalume wa Midiani, Zeba na Salimuna waibanga wakimbila, mbali Gideoni kawasondelela, kawagwila na kuwadumbiza watowang'hondo wose.

13 Gideoni mwana wa Yoashi viyabwelile kulawa kuna ing'hondo kafosela nzila ya Helesi, 14 kamgwila mbwanga yolawa Sukoti na kamuuza, nayo kamwandikila mazina malongo saba na saba ya walangulizi wa Sukosi na walala wa bululu. 15 Maabaho kahita kwa wanhu wa Sukosi, kalonga, "Kumbukeni vimulemile kunitaza. Mulonga kuwa hamuweng'ha wanhu wangu walegele ndiya yoyose, kwaviya niye siwahumile Zeba na Salimuna. Vinoga, awano hano!" 16 Maabaho kasola miwa na mbigili kulawa muna dibwilingu na kavisang'hanila ivo kwa kuwatagusa walangulizi wa Sukosi. 17 Iviya kagwisa lingo da uko Penueli na kuwakoma walume wa bululu diya.

18 Maabaho Gideoni kawauza Zeba na Salimuna, "Vilihi wanhu womuwakomile uko Taboli?"

Wamwidika, "Walinga fana weye, mana walinga fana wana wa mfalume."

19 Gideoni kalonga, "Wawo wakala ndugu zangu, wana wa mami yangu yanyeleke. Noilaha kwa Mndewa Mulungu yeli mgima, one hamuwakomile wawo, na niye sigambenimkomeni." 20 Maabaho kamulongela Yeseli yeli chaudele wake, "Gendelela, wakome wawo!" Mbali imbwanga havutile upanga wake. Kadumba, kwaviya kakala yang'hali mbwanga.

21 Maabaho Zeba na Salimuna wamulongela Gideoni, "Gendelela, chikome weye mwenyewo. Ino ni sang'hano ya munhu mkulu." Gideoni kawakoma yeye mwenyewo na kusola mahambo yeli muna zisingo za ngamiya wawo.

22 Maabaho Waisilaili wamulongela Gideoni, "Uwe mtawala wetu, uhakomeleza weye wachitawale welesi wako, kwaviya weye kuchikombola kulawa kwa Wamidiani." 23 Gideoni kedika, "Niye sizakuwa mtawala wenu hebu welesi wangu. Mndewa Mulungu kezakuwa mtawala wenu." 24 Kagendelela kulonga, "Nolonda nimpuleni chinhu chimwe, nopula chila imwe wenu yaning'he vipuli viyatekile." Waja Wamidiani kwaviya wakala Waishumaili, wavala vipuli va zahabu.

25 Wanhu wamwidika, "Chizakwing'ha kwa hiyali." Watandaza chiwalo na chila imwe kasa umo vipuli viwakalile wateka nyala. 26 Nzamo ya vipuli vose viyawalondile wamwing'he vikala chilo malongo maidi. Iviya kahokela mahambo na viwalo va ulujuani vovivaligwe na wafalume wa Midiani na mikufu yoikalile muna zisingo za ngamiya wawo. 27 Gideoni kazisang'hanila kutendela chizibawo choyachikile muna dibululu jake da Afula. Waisilaili wose wahita uko kuchitambikila. Chizibawo icho chiwakong'hela Gideoni na ndugu zake kumuleka Mulungu.

28 Basi, Wamidiani wapotigwa ng'hani sekewawe dumbizo kwa Isilaili, na isi ya Isilaili iwa na tindiwalo kwa lusita lwa miyaka malongo mane chipindi cha ugima wa Gideoni.

29 Yelubaali, niiyo Gideoni mwana wa Yoashi kabwela ukaye yake na kakala uko. 30 Kakala na wana wa chilume malongo saba, kwaviya kakala na wake wengi. 31 Iviya kakala na suliya uko Shekemu, kamwelekela mwana wa chilume, na kamtanga Abimeleki. 32 Gideoni mwana wa Yoashi kadanganika yahawa na miyaka mingi na kawandigwa muna dileme da tati yake Yoashi, uko Afula, bululu da lukolo lwa Abiezeli.

33 Viifosile ifa ya Gideoni Waisilaili kaidi wahinduka na wawatambikila Mabaali. Wamtenda Baali Belisi kuwa Mulungu wawo, 34 na wamzimiza Mndewa Mulungu, Mulungu wawo, yoyawakombole kulawa kwa wehi wawo wose wowawazunguluke. 35 Hawawatendele vinogile ndugu wa Yelubaali niiyo Gideoni kwa yanogile yose yoyatendile muna iisi ya Isilaili.